RSS

اخيرا معا واخيرا اصلاح

الحقيقة ياجماعة انا حبيت اكتب فى الموضوع ده بسبب المجهود اللي بيقوم بيه شباب المدونين اليومين دول
فى محاوله منهم للتوصل لحل لبعض مشاكل البلد يعني على سبيل المثال

الفكره اللي بيقوم بيها اخونا علاء صاحب مدونة مش انا بمساعدة مجموعة من اخوه اصحاب مدونات اخرى
وهي فكرة المدون خانة


والفكرة دي هدفها هو الدفاع عن حرية راينا والتعبير عن افكارنا ومبادئنا بدون ماحد
يقيدنا او يثبط من عزيمتنا
كمان الحملة اللي بيقوم بيها دلوقتي اخونا صاحب البوابة ربنا يكرمه واللي بعنوان افضحوا تجار الكيف


طبعا هدف الحملة واضح جدا من عنوانها هاتقولولي وده ايه بقى علاقته بعنوان البوست هاقولكم
مانا جايلكم في الكلام اهو بس ماتزهقوش بسرعة
انا ياجماعة الحقيقة بقالي حوالي سنه او اكتر بشوف دايما شعار معا للاصلاح (في الجامعة, فى المكتبات, على النت ,وعلى الشرايط والكثير والكثير) المهم انه انا لا كنت قادرة المس معا ولا كنت بشوف اصلاح بس كل اللي كنت
بلاحظه ان ماحدش حاسس بحد ومشاكل البلد عمال تزيد ورغم ان كله على دماغنا احنا بس برده ماحدش حاسس بحد ولا حد كان بيحاول يحرك اي ساكن


الا القله القليله واللي منهم شباب المدونين حقيقي حاسين بالبلد وبيحاولوا على قد مايقدروا يعبروا عن حبهم ليها لكن للاسف مجهودهم كان بيوصل اكتر للمدونين اللي زيهم بس دي كانت بداية التغيير ويشكروا عليها لكن تعالوا دلوقتي هاتلاقوا محاولاتهم الجاهدة علشان يوصلوا
للي عنده نت واللي ماعندوش وكمان اللي بيعرفوا يقروا واللي مابيعرفوش


يعني بجد حسسوني بمعنى الشعار اللي نفسي من زمان احس بيه
فعلا اصبحوا معا وان شاء الله هايكونلهم بالفعل دور فى الاصلاح
وعلى فكره ياجماعة علشان اللبس اللي بيحصل الشعار ده مش بس اللي بيرفعوا الاخوان الشعار ده لاي حد بيحب بلده ويهمه مصلحتها

في النهايه انا بدعوا كل واحد منكم يكون معاهم ويحاول يكون زيهم يعني ليه كل واحد مننا مايشوفش ايه المشكله اللي يقدر يناقشها ويقود التوصل لحلول ليها واحنا كلنا هانكون معاه الموضوع سهل اوي بس عايز عزيمه قويه وايمان بالمبدء نفسه
يالا ياجماعة عايزين نكون معا وعايزين نشوف اصلاح

وكله فى حب بلدنا الغاليه مصر وكمان من اجل دينا ومبادئنا
لان حب الوطن من الايمان وهانتسال عنه يوم القيامه وياريت
كلنا نجاوب على السؤال ده

هل حولت تغير في شىء غلط بيحصل من حولك ولو حاولت ازاااااااي
(بأيدك -بلسانك -بقلبك وده اضعف الايمان -ولا ماحولتش اصلا)
احتفظ بالاجابة لنفسك

  • Digg
  • Del.icio.us
  • StumbleUpon
  • Reddit
  • RSS

حاجة كده على زكر الكوسة

للكوسه فى بلادى شئون
بتخلي المسنود فرعون
يتفرعن فين مهما يكون
وتخلي الجاهل أستاذ
والأعرج لاعب جمباز
وتخلي الأحول هداف
والكوره الآوت ف الجون
للكوسه ف بلادي شئون
لو تعرف واحد ف الشرطه
راح تخرج من أجدع ورطه
والراجل اللي انت ظلمته
تلاقيه متلقح مسجون
أو تعرف شخصيه كبيره
شغاله ف البنك مديره
راح تاخد من غير ضمانات
كام قرض بمليون مليون
وهروبك طبعا مضمون
ويا عيني لو تعرف نايب
ف المجلس مش نايب خايب
راح تبني أبراج وهميه
أوراقها مظبوطه أكيد
وفلوس الناس المهريه
حتجيلك م الجيب للإيد
بعديها تروح المستشفى
وتقيد نفسك مجنون
أحكامك تسقط ف ساعتها
بعديها ترجع موزون
ويا عيني لو تعرف شيخ
فجنابك طاهر علطول
وصيامك طبعا مقبول
وإذا فرضا حبيت تتجوز
تتجوز من غير مأذون
وإذا ساكن ف عماره جديده
وحبيبك راجل مسئول
فسيادتك من غير ما تقول
يركب لك فورا تليفون
ولو انت عندك عربيه
ونمرها سوده بنسرين
حتعدي أجدعها كمين
وحتكسر أوضحها إشاره
ماهو نمرك سوده جباره
ولا تعرف أيتها قانون
ولو انت بتعرف فرّان
أو واحد بياع جرنان
راح تاخد طلبك وحتمشي
من غير ولا دوشه ولا دور
والناس الغلبانه حتاخد
طلباتها بعدك وتغور
ماهو كله غيرك بيهون
ولو انت زميل الحلاق
راح تحلق اولها زبون
وإذا كنت بتعرف دكتور
حتعيش متطمن مسرور
وحتسلك ف لجان الشفوي
ومجال تعيينك موفور
وحتطلع فالتليفزيون
بالبدله وفيها الببيون
تتكلم وبكل بساطه
عن شرف المهنه المدفون
لكن لو شاعر غلبان
قلت اللي ف نفسك على طول
حيقولو مين قال لك قول
ويهاجمك مليون إنسان
للامانة اللى بنتكلم عنها فى ميثاق شرف المدون خانة
هذا الزجل مقتبس لكنه عاجبني فحبيت انزلهولكم خاصة وانه متعلق بالموضوع

  • Digg
  • Del.icio.us
  • StumbleUpon
  • Reddit
  • RSS

محصول الكوسة فى بلدنا المحروسة


تعالوا بقى اكلمكم النهاردة على حاجة مهمة

على موسم الكوسة اللى مابيخلصش ابداااا ياجماعة فى بلدنا تفتكروا ليه؟

بس ان جيته للحق الكوسة زى ماكتير منكم عارفين خضار لذيذ وماليان فيتامينات

وكمان بتتعمل فى اشكال كتيرة مرة مطبوخة ومرة محشية ومرةبالباشاميل

ومرة كمان باللحمة المفرومة اكيد طبعاااااااا جوعتوا انته دلوقتى

بس مش الكوسة اللى بتتاكل ونهضمها احنا اللى جاية النهاردة اكلمكم عنها

انا هاكلمكم عن الكوسة التانية اللى بتهضم حقوقنا معاها اكيد عرفتوها كويس واكيد كمان

الكتير منكم داق طعمها كويس والكوسة دى كلمة لكن جواها معاني كتير منها

(الظلم ,هضم حقوق الغير ,والحصول على مزايا مش من حق صاحب الكوسة )

كمان الكوسة فى مصرنا المحروسة هى المحسوبية يعني عدم اعطاء كل ذي حق حقه

يعنى مثلا اعطاء مهمة معينة للي معندوش المميزات الكافية للمهمةفقط

لانه قريب فلان اوحبيب علان فى المحروسة رغم وجود اللى يستحق

ياسلااااام ياولاااااااد يابختة من كان له حد ليه فى الكوسةكل حاجة هاتجيله لحد عنده

الوظيفة وبعدها الترقيات وبعدهاالعلاوات لاحياء منهم والاموات .ااااااااااااااااااااااه يابلد

طبعا ياجماعة ده كله الكلام اللى لا هيودي ولا هيجيب تعالوابقى نتكلم فى المهم


ااااااااااااااااااايه الحل؟تفتكروا ايه؟

انا هاقولكم رايي اولا فيه صفات لازم تتوفر فينا علشان

نقدر نتغلب على الكوسة قصدي على المشكلة واهم هذه الصفات

1-الايمان القوي بالله سبحانه وتعالى

2-اليقين ياجماعة بانه رزقك مش هيكون لحد غيرك

3-التوكل على الله يعنى تعمل اللى عليك وتسيب الباقي عليه

4- الضميييييييييييييييييييييييييييييييييييييييييييييييييييييييييييييييير

لو الحاجات دي ياجماعة اتوفرت انا شايفة انه المشكلة ان شاء الله هيكون ليها حل

وهقولكم ازااااي يعنى انت مثلا حد حب يهاديك بكوسايه وانت شايف انه انت متستاهلهاش

وتعرف غيرك اللى يستاهلها ليه ماتروحش وتهاديه بيها من باب

(من ترك شىء لله بدله الله خيرا منه)وكمان من باب (وأدوا الأمانات الى أهلها)

تفتكروا ايه اللى هيحصل اكيد ربنا هيرزقك باللى انته احسن منه

ويعمل معاك زي انت ماعملت مع اللى احسن منك فهمته حاجة؟

يارب ماكونش باحلم احلام ورديه وتوافقونى الرأي فى انه كل حاجة ممكنه

يعنى ياجماعة اليقيييييييييييييييييييييييين اولا والايمان ثانيا والضمير ثالثا

يااااااااااااااااجماعة ده اناخايفة بعد كام سنة نتخذ من الكوسة شعااااار لينا

وكمان بعد كده يلغوا من تاريخنا حضارة الفراعنة ويبقى يدرسوا لولدنا

حضاره بس تحت اسم تاني مش هقلوكم عليه احسن يفتكرونابنتكلم فى السياسة لاسمح الله

واخدين بالكم انا مستنية تعليقاتكم

سلاااااااااااااااام بقى وربنا يسترها علينا وعلى وليانا يارب

  • Digg
  • Del.icio.us
  • StumbleUpon
  • Reddit
  • RSS

حرية اخر موضة






تعالوا نشوف مع بعض الحرية اللى بيتكلموا عنها النهاردة حرية اخر زمن
نفرض مجرد فرض اني اخدت بلدياتي فلان بالحضن وقبلته وقبلني عشرين
مرة هل يترتب على ذلك حصولى على تقدير امتياز او الوصول الى منصب
ممتاااااااااااااااااااااااااااااااااااااااااااااااااااااااااااااااااااااااااااااااااااااااز


تعالوا كمان نفرض مجرد فرض اني اخدت الصحفى فلان صديقى بالحضن
وحشتني والله لك وحشة وسألته ايه اخر اخبار الحملات الاعلامية وقالى
تمااااااااام نحن نتمتع كاعلاميين بكامل الحرية هل يعني ذلك اني اصبحت
مع حرية الراي والتعبير التى من الممكن ان تمس الذااااااااااااات النبوية


وماااااااادام هذا لا يحدث ولن يحدث فما معنى هذه المهزلة التى نسميها
افطار الحرية والوطنية يعنى اااااااااااااااااااااااااااااااااااااااااااااااااايه؟

يعنى اذا اكلنا من طبق رئيس الهيئة فلااااان ووضعنا ملح من عند المدير
علان وفلفل من عند المدير علاااان ثم عصرنا ليمون من عند الموظف
تركااااان هل لو حدث ذلك اصبحنا سمن على عسل وحبايب وبالروح
بالدم حصلنا على حريتنا لاااااااااااااااااااااااااااااااااااااااااااااااااااااا


لقد اتت الشريعة الاسلامية للبشرية لتقوى فيها الحيوية وتنمي فيها
الاخلاص وتهيئها للحرية . شرع قد جاء به الله ليقول لنا ما معناها

حرية نفسك.حرية نفسك
معناااااااااااااااااااااها
( ان تملك نفسك وهواها)

  • Digg
  • Del.icio.us
  • StumbleUpon
  • Reddit
  • RSS

اعرفكم بنفسى


انا بنت مسلمة

زيى زي اى حد بيحب دينه وبلده وبيغير عليهم

وغيرتى عليهم كانت بتطلع على هيئة افكار ويمكن

علشان كده انا سميت المدونة بنات افكاري بس اللى

كان بيحصل اني كنت بحتفظ بالافكار دى لنفسى ومكنتش

بشرك حد معايا فيها يمكن ده كان بسبب طبيعة شخصيتى

وكمان انا بصراحة مكنتش عارفة ازاي اوصل افكاري دى

للناس وخصوصا الشباب اللى من سني لحد ماعرضت عليه

صديقة عزيزة فكرة المدونة ومن وقتها وانا واخدة القرار

بس زى مانتم عارفين الفترة اللى فاتت دى كانت فترة امتحانات

بس خلاص انا دلوقتى فري واحب اني اشركم فى افكاري البسيطة

واتمنى كمان انكم تشركونى بأراكم وتعليقاتكم وانتظروا ان

شاء الله اول موضوع ليه فى القريب العاجل ان شاء الله

السلام عليكم

  • Digg
  • Del.icio.us
  • StumbleUpon
  • Reddit
  • RSS