اه والله ماكنش العشم بنات افكاري تغيب كل دا ومحدش يسال عليها
ماكنش تعليقات وبوستات اللي بينا دي دا انا طيبة وماكنتش عايزة حاجة والله
يعني كيس جوافة بس حتى مش هاقول مانجا علشان غالية يلا انا مسامحاكم
بمناسبة التسامح اللي متكلمة عنه من شهر دا واللي ربنا يقدرنا عليه اللهم آمين
المهم غبت كتير اوي وطبعا لازم المدونة وكل حاجة توحشني اوي يلا الحمد لله
المهم بنغيب نغيب ونرجع الله المستعان وربنا يقدرنا بس ونقدر نستمر ان شاء الله
ااقولكم بئا انا غبت كل دا ليه اولا كدا لله الحمد مريت بفترة تعب ومازلت بحاول
الخروج منها والحمد لله على كل حال وثانيا انشغلت بمجموعة كورسات
وثالثا لي صديقة صاحبة معمل تحاليل كانت هاتتجوز عقبالكم جميعا فاكنت
ماسكالها المعمل لحد ماترجع هاتقولولي انتي جيولوجيا مالك انتي بالتحاليل
هاقولكم معلش اصلي حشرية اوي وغاوية ادخل نفسي فى كل حاجة ولله الحمد
اكتسبت خبرة فى مجال التحاليل كمان خصوصا اني دارسة كيميا وكمان كنت
بعمل حاجة عجيبة شوية كنت وقت ماكون فاضية فى ايام الدراسة كنت ادخل
احضر سكاشن مش مهم بئا مش تخصصي دفعة اكبر دفعة اصغر كنت بحضر
لدرجة المعيدين حفظوني ابقى معدية عليهم بدل مايقلولي اتفضلي شاي ولا حاجة
يقلولي اتفضلي سكشن بس كل دا طبعا مايجيش حاجة جمب حبي للجيلوجيا
كفاية كدا فى النقطة دي نيجي بئا لرابعا والاهم سي السيد بتاعنا خطب الحمد لله
عقباااالكم جميعاااااااا والخطوبة كانت امبارح وكانت فى القاهرة كان نفسي اعزمكم
جميعا بس ملحوقة فى الفرح ان شاء الله بس دعواتكم ليه علشان تعبني على ماخطب
مش عارفة على مايتجوز بئا هايعمل فيا ايه المهم ربنا يحميه يارب ويتممله على خير
بس كدا دا اللي كان شغالني وفيه حاجات مازالت شغلاني بس ان شاء الله احاول اظبط
نقطة تانية كل عام وانتم الى الله اقرب اقترب شهر رمضان وربنا ييسرها ان شاء الله
ونقدر نتابع معاكم ونستفيد منكم ونحاول نفيدكم باي شىء فالله المستعان دا هايكون تاني
رمضان ليا معاكم السنة اللي فاتت انا فاكرة كنت تعبت قبلها بردو لفترة الحمد لله
وكمان كنت بتابع قليل نحاول السنة دي نستمر بس ربنا يقدرنا ان شاء الله
ويدينا الوقت ويباركلنا فيه واقدر اتباع الله المستعان وماتنسوناش
من دعائكم بئا وابقو اسالو نرجع لماكانش العشم تاني كنت فاكرة ورايا ناس تسال
رجعت لقيت العنكبوت مالي المدونة بس يلااا سماح بردو المرة دي وربنا يعينكم
يارب جميعا ويقدركم وييسرلكم الخير ويباركلكم فى شعبان ويبلغكم رمضان اللهم امين
صحيح لازم اشكر حبايب قلبي اللي كانو معايا الفترة دي ودايما يسالو عليا
حبيبتي عاشقة الفردوس اللي زهقت من كتر ماببعتلها وش مكسوف لما بكلمها
ورغم كدا مستحلية الحكاية وهي عارفة ان ااقل حاجة بتكسفني بس بموت فيها بردو
وحبيبتي اميرة اساطير اللي هاتعلمني حاجة كدا بس مش هاقولكم عليها
وحبيبتي اللؤلؤة المكنونة اللي مش بشبع من الكلام معاها ابداا ربنا يسعدها يارب
ماتنسوش بئا تدعولي كتيييييييييير بالاستقرار ان شاء الله ولكم مثله وزيادة
