RSS

مممممم ... والله ماعرفة


مش لازم عنوان شوية لخبطة كدا على الماشي

اخر مرة كنت فى جامعة القاهرة خلصت متاخر شوية وانا خارجة
انا وزميلتي كان فى شوية شباب طالعين سلالم المترو يغنو بصوت
عالي ومش فى الدنيا خالص زميلتي بتقولي ايه دا قولتلها تصدقي
انا حاسة اننا جوا التلفزيون ..قالتلي ايه قولتله اه والله
حاسة اننا قاعدة جوا التلفزيون يعني الحاجات اللي كنت بشوفها
بس فى التلفزيون بقيت بشوفها عادي قدامي كدا والواحد بيحمد ربنا
ان عنيه اتعودت تشوف اللي متعودة عليه وبس غير كدا
بتقفل لوحدها توماتيكي الحمد لله وكمان مرة الحمد لله على تربية الريف
ولو اللي الواحد فيه دا بالنسبة لكتير رجعية وتخلف فاللهم ادمها عليا نعمة
واحفظها من الزوال يارب طبعا مش معنى دا ان كل من فى القاهرة
بهذا النظام بس فعلا ربنا يتولى الشباب ويهدي البنات ويهدينا جميعا

لما فجأة سي السيد يقولك عايز اتعشى بورجر فادا عادي لكن لما يجيبلك
مع البورجر فيجيتار وتساليه ليه يقولك علشان تعملي بيه البورجر
فادا بئا اللي ...عادي برده
اجيبه شمال اجيبه يمين علشان افهمه انه لايجوز عمل البورجر
بالفيجيتار مع ذكر الاسباب والدلائل المقنعة وهو بردو مصمم
على اساس انك طول عمرك بتدخلي المطبخ
تخترعي ولا اكنك فى معمل الكيميا بتاع الكلية واحنا بناكل
جات على دي يعني طبعا فى الوقت دا قدامك حل من الاتنين ياما ترضيه .
. ياما ترضيه وانصحك يعني انك ترضيه
تخيلت للحظة لو مستقبلا زوجي جه قالي عايز كفتة بالفيجيتار هاعمل ايه
هاعمله كفتة بالفيجيتار اينعم طاعة الزوج واجب وبعدين انا هاتجوزه
علشان يكون سبب فى دخولي الجنة ومين عارف
يمكن ادخلها بسبب الكفتة بالفيجيتار اللي هاعملهاله ماهي كدا
بتيجي على اهون سبب :)

معلش استحمله اكيد بتقولو ربنا يشفي ماعلينا

معرض الكتاب على اد مازيارتي ليه السنة اللي فاتت ليها ذكرى بعتز بيها
على اد ماهي مؤلمة جدا بالنسبالي الى الان ولكن مايمنعش اني هاروح بردو
علشان زهرواتي اللي واحدة فيهم شبطانة من دلوقتي وقاطعة اشتراك
ومش عارفة هاخدها ازاي بس هانتصرف البركة
فى سي السيد الشوفير بتاعي بس محدش يقوله . ربنا يقويه عليا يارب


انك تتعلق بحد وتفقده بجد بيكون احساس صعب ومايتوصفش وله مضاعفات
كتير مهما كان الحد دا حتى لو قريب حتى لو صديق رغم انها حالة لا ارادية
بس من كتر مالدنيا بتقسى علينا اوي فى الاوقات دي الواحد بئا بيفكر
فى لحظات الفراق اكتر من لحظات اللقاء ودا الحل الوحيد ان الناس تتأنى
فى مشاعرها تجاه اي حد حتى الاصدقاء
خصوصا لو انت اصلا شخصية مش بتقرب من حد بسهولة ..
لكن ارجع واقول الكلام سهل لكن التنفيذ .....الله المستعان

القبول .. انك تكون مقبول من اللي حواليك حتى لو مايعرفوكش حتى
لو ماشفوكش قبل كدا انك تعرف بس ان مجرد سيرتك تخلي الناس تبتسم
دي حاجة جميلة اوي ونعمة ربنا يديمها على من يملكها ويرزقها
لكل من يستحقها فاحب الناس فعلا شىء مش سهل

حد فهم حاجة من كل الرغي دا ...هاقولكم على سر بس محدش يقول
للدكتورة ايمان سوووووووول حبيبتي اصل انا هربانة من البوست
اللي المفروض اعمله بس كدا كدا هاعمله والامر لله واحدة
المرة الجاية بئا ان احيانا الله

صحيح كنت هانسى نظرا لبعض الظروف الصحية الملخبطة
حضرة الناظرة بتابعلي احيانا وواضح كدا انها هاتبدء تتعود
على دخول المدونات خصوصا اللي انا بقولها عليهم


فاني من موقعي هذا من فوق الكرسي احذر لو حد لاحظ انها عملت مدونة

من ورايا يقولي اه احنا عشرة بردو وبينا بوستات وتعليقات

واحذر ايضا مش كل ماعرفها على حد يوصل
الموضوع لتبادل موبيلات كدا هابدء اقلق هااااااااا انا حذرت وخلاص

ادي اخرة معرفة المدونين

طبعا بعد كل الرغي دا ماليش عين اقول ادعولي معاكم
بس لو لسه فى حد هنا وكمل للآخر يدعي وكله بثوابه:)

  • Digg
  • Del.icio.us
  • StumbleUpon
  • Reddit
  • RSS

محدش بيجيب سيرتهم ليه ؟؟؟؟




المرضى اللي كانو فى مستشفيات غزة قبل القصف محدش بيتكلم عنهم ليه

اللي كانو حالتهم خطيرة راحو فين عايشين ولاماتو من الاهمال وقلة الامكانيات

الناس اللي زمانها بتموت بالبطيء دي فين الاطفال اللي عايشين على علاج

واللبان صناعية راحو فين الناس اللي بتتغذى وحياتها متعلقة باجهزة دول فين

مرضى الفشل الكلوي ماتو ولا عايشين

مفيش مية ومفيش كهربا محدش يقولي انهم لسه عايشين

هاتقولولي ليه هاقولكم مريض الفشل الكلوي عبارة عن ايه علشان تعرفو

انا ليه بتكلم كدا وليه متاكدة ان اكيد حصل تدهور ووفيات بينهم كتير


ببساطة ومن غير كلام كتير هاحاول اوصلكم بعض المعلومات

احنا عارفين طبعا ان وظيفة الكلى هي تنقية الجسم من السموم والمواد

الذايدة وتخليص الجسم منها فى صورة عملية الايض او الاخراج ودي الكلى الطبيعية

لكن لو حصل قصور فى الكلى بتصبح حالة مرضية وبيحتاج المريض فيها لعملية بديلة

عن الكلى تخلصه من السموم دي وهي عملية الغسيل الكلوي بجهاز ما

القصور فى وظائف الكلى عبارة عن خمس مراحل وهاختصر بردو الشرح فيهم

اخطرهم المرحلة الخامسة ودي اللي بيحتاج المريض فيها اما لعملية زرع كلى
ودي طبعا مش هاقول اد ايه مكلفة اذا لقيت متبرع اصلا او الغسيل الكلوي ودا بيكون

تلت مرات فى الاسبوع كل جلسة عبارة عن 4 ساعات مايمنعش ان احيانا مرضى

المراحل التالتة والرابعة احيانا بيحتاجو لعملية الغسيل دي وقت الضرورة

وعملية الغسيل الكلوى بالدم يتم خلالها نقل دم المريض إلى ماكنة الغسيل الكلوى وبعدين

يمر الدم عبر المُغتسل أو ما يسميه عامة الناس الفلتر ودا عبارة عن غشاء

شبه منفذ يكون عازل ميكانيكي بين الدم من جهة والماء المعالج من جهة أخرى ويخلط الماء

المعالج مع عناصر كيميائية بشكل دقيق

.وخلال هذه العملية تقوم الماكنة بضخ الدم بكمية 250 – 500 ملليلتر / دقيقة

وضخ تيار معاكس من الماء المعالج للدم بسرعة 500- 800 ملليلتر / دقيقة يفصل بينهم الغشاء الشبه منفذ,

دي العملية ببساطة لو محصلش كل دا بقى يحصل ايه فى خلال اربع ساعات بس ممكن يموت المريض
بسبب تراكم سموم البولينا والاملاح المعدنية اللي الجسم مش بيقدر يتخلص منها
زي املاح البوتاسيوم والكالسيوم وغيرها

طبعا العملية دي بمواعيد ماينفعش التخلف عنها وباحتياطات كتير اوي اهمها التعقيم وخصوصا المية

امال بقى لو مفيش مية من اصله هاتقولولي اكيد فى خزانات للطواريء دي طيب اذا كان مفيش

كهربا هاتشتغل الخزانات دي ازاي نفسي افهم وكمان المفروض الخزانات دي بتتنقى وتتغير المية

فيها باستمرار الموضوع ماهواش وجود مية والسلام وحسبنا الله ونعم الوكيل

انا نفسي اعرف فين الناس دي دلوقتي وحالتهم ايه لو لسه بينهم احياء . كل كلامهم عن الشهداء

والمصابين وفى كارثة اكبر من كدا بتحصل ومحدش حاسس انا اتكلمت بلسان حالات معينة

واكيد غيرهم كتير اوي الله اعلم بحالهم الان كل اللي حساه انهم اصعب من الشهداء بكتير

الشهداء بيموتو فى لحظات دول بيموتو بالبطيء نفسي دماغي تقف عن التفكير شوية

الواحد بجد تعب .استغفر الله العظيم وناس كتير عايشة حياتها ولا اكن بيحصل شىء

ياريت الناس كلها تلزم الاستغفار كلنا محتاجين نستغفر ربنا فى كل لحظة على حاجات كتير

وان شاء الله ينقذنا مما نحن فيه ياريت كمان الناس تبطل خلافات بقى تعبتونا مش وقته خالص

  • Digg
  • Del.icio.us
  • StumbleUpon
  • Reddit
  • RSS

مش مهم عنوان




الحقيقة مش عارفة انزل اي بوست من فترة لظروف كتير ودا البوست رقم 7
اللي كان هايتركن فى الدرافت جمب الباقي بس يلا هاتستحملوني كالعادة
طلبت من حد قريب مني يقفلها من فترة لحد مااستقر بس ماسمعتش الكلام

المهم فى كذا حاجة بس نفسي حد يفهمهالي لاحظتها كتير اليومين دول وانا
فى البيت حتى لما ربنا قدرني وخرجت لقيت الاسوء . انا عايزة اعرف

معقول لسه فى ناس مش فاهمة
معقول لسه في حد بيسال هو ايه اللي بيحصل فى غزة
معقول فى كدا طلبة جامعة وبيسالو مالها غزة
معقول فى ناس لسه بيقولو دول يستاهلو ؟ اللي هما مين مش عارفة
الاطفال ولا النساء ولا حتى الرجال ولا ايه مش فاهمة
احيانا بحسد اللي مش فاهمين دول على راحة بالهم وعدم تحملهم اي
مسؤلية لكن برجع اشفق اوي عليهم لان كل دا هايتحاسبو عليه

باسال كمان اللي مش قادرين على المقاطعة بحجة منتجاتهم افضل
واللي مش قادرين على التبرعات بحجة انها مابتوصلش
واللي مش قادرين كمان على الدعاء بحجة هي يعني جات عليا ماالشيوخ وكله بيدعي
واللي مش قادر يساهم حتى بكلمة حق خوف من بني آدم زيه ويمكن ااقل منه
حرام عليكم ايه السلبية دي كفاية تعبتونا نفسيا وجبتولنا احباط
ماتعملو اللي عليكم وخلاص دا ربنا فوق كل شىء


عايزة اقول كمان لاي حد ربنا ابتلاه باي شىء مهما كان صعب يحمد ربنا اوي
ويحاول يعمل لنفسه قيمة على قدر الابتلاء دا ويحمد ربنا انه مفيش عدو
متربصله فى كل حتة منتظر يرميه بصاروخ لوني حاسة ان خلاص مش بعيد
ييجي علينا كلنا يوم زي دا بس ياترى هانقدر نقاوم زيهم ولا ؟؟؟؟؟؟؟
على الاقل هما بيموتو شهداء لكن احنا ......

اخر حاجة بدعي ربنا يعين اي حد بيحاول يساعد باي شىء فى اللي بيحصل
حتى لو بكلمه حتى لو بتوصيل معلومة صحيحة للناس اللي مش فاهمة
وبدعي ربنا يشفي كل مريض ويوفق كل الناس اللي عندها امتحانات


هاحاول ماغبش كتير تاني بس دا مش وعد لكن هاحاول ان شاء الله
والله المستعان



  • Digg
  • Del.icio.us
  • StumbleUpon
  • Reddit
  • RSS