RSS

ابليس فى ثوبه الجديد


ابليس فى ثوبه الجديد

جمعية اضلال المراهقين من سن14 حتى 21
ولواكبر من كدا وماله احنا مش خسرانين

اهدافنا المعلنة
ازاي تبقى انسان مشهور وروش وجنتل
ازاي تستمتع بالحياه وتشبع رغباتك وشهواتك

اهدافنا الخفية

ازاي نبعد المؤمنين عن ربهم ونحولهم الى عصاه ثم الى كفار
ازاي منبقاش فى النار لوحدنا وازاي ناخد اكبر قدر من الناس معانا

كلمة سيادة الرئيس ابليس
صباح الزقوم والحميم.. صباح العري والمخدرات ..
صباح القرف والخنقة.. صباح النت والكوفي شوب اما بعد
الشياطين الملاعين الاعزاء المغرورين المفتونين الهبلاء
المتعاونين معنا بكل تفاني واخلاص اهلا وسهلا بكم فى
دورتنا الجديدة كيف نبعد المسلمين عن ربهم بكل الطرق
وطبعا انتو عارفين خبرتي فى مجال اضلال المؤمنين من ايام
ابوكم ادم لما خليته ياكل من الشجرة وانا اخدت عهد على نفسي امام
احكم الحاكمين لما لعني وطردني من رحمته وقولت هاخد من عبادك
كمية وهاضلهم وهوعدهم وعود زائفة وهامرهم يغيرو خلق الله
وهستخدم صوتي وخلاني اشاركهم فى الاموال والاولاد ولكنني
باي حال من الاحوال مااقدرش اضل عباد الله المخلصين اللي
هما عباد بجد لا ينسون الله وفعلا نجحت فى افساد كثير من الامم
وكنت سبب فى هلاكهم ومنهم قوم لوط خلتهم يظهرو الفواحش
فربنا خلى جبريل يجيب عليها وطيها ومنافدش الا اللي ماسمعش كلامي

احبابي الشياطين

علشان تبقى عضو فى الجمعية معانا لازم تبقى فيك الصفات الاتية
اولا هوائية تامة يعني ..كل حاجة نفسك عيزاها ماتحرمهاش منها

ثانيا لازم تسمعوا كلام السفير بتاعي عندكم يعني شيطانك وتتعاونا على مرضاتي

ثالثا لازم تياس من رحمة ربنا علشان ماتفكرش تتوب معندناش وقت
نضيعه فى التوبة وغيره اذا ياست هتتاكد انك هتكون فى النار معايا ولازم
متجليش لوحدك ياحلو تجيلي معاك الفين ولا تلتلاف واحد دا فى اعضاء
جابولي ملايين وفيه هيجبولي زي المغنى الشاب اللي عنده حاجة وخمسين سنة
مدة كبيرة شغالين مع بعض والبنات والشباب بيحبوه اكتر مني جتهم نيلة
لو يعرفو انه تبعي كانو كرهوه .هاهاهاها

رابعا لازم تقفل ودانك عن السماع وقبلك عن الاحساس وعقلك عن التفكير فى
اي خير وحسك عينك تتفرج على برنامج ديني او قناة محترمة زي الرسالة
او اقرا او الرحمة او الناس او غيرهم احسن دول هايبوظوك خاااالص

خامسا اوعى تقرب من المساجد والمقابر علشان محدش يشوفك من الدعاة
ويقلك تعالى الى الله ولو رحتله مين اللي هيونسني فى النار ياحبيب قلبي

سادسا لازم تصاحب الواد اسمه ايه علشان الواد ده شاطر فى المواضيع
اللي بالي بالك ولازم تتعرف على اسمه ايه التاني دا علشان ده واد مدردح
بيعرف يعلق البنات ومتنساش تعرف الواد بلية علشان ده متخصص فى الكيف
يعني بانجو وحشيش وهايعرفك على المساطيل كلهم

سابعا لازم تشيل بواقي الحياء اللي عندك علشان تعرف تتباهى بالمعصية
كويس بين الناس وتنشرها ياحلو

ثامنا لازم تبقى واد عيل وحقير امام اي شهوة حتى لو ها تتنازل عن حاجات كتير
كفاية عليكم كدا المرة دي واقابلكم المرة الجاية مع كتالوج الافساد
اعوذ بالله من الشيطان الرجيم :))

  • Digg
  • Del.icio.us
  • StumbleUpon
  • Reddit
  • RSS

9 comments:

abdo said...

اللهم إني أعوذ بك من الشيطان الرجيم من همزه ونفخه ونفثه

مشروع انسان said...

نعوذ بالله من الشيطان
ومن طريقه
ومن صحبته


نسأل الله ان يعيننا على أنفسنا

بنت أبيها said...

اللهم آمين

Soul.o0o.Whisper said...

اييييييييييييييه دااااااااااااا

البوست دا نزل امتى؟؟؟؟؟؟؟


طب مش تقوليلى طيب
عشان أحجز؟؟



ياللا معلش




بجد بوست رائع يا حبيبة قلبى

ربنا يجعله فى ميزان حسناتك

و يعيننا على الشيطان





وحشانى خااااااااااااالص

اللى تشوفه said...

وقل رب اعوذ بك من همزات الشياطين
واعوذ بك ربى ان يحضرون

جزاك الله خيرا

دنيتى الجميله said...

السلام عليكم ورحمه الله وبركاته
ازيك يا بنت بلدى
وحشتينى
معقوله نكون فى محافظه واحده ومشفتكيش لحد دلوقتى

وبالنسبه للبوست ففعلا نعوذ بالله من الشيطان الرجيم ومن شياطين الانس والجن
وربنا يرزقنا الصحبه الصالحه

محمود النجمي said...

اللهم باعد بيننا وبينه
كما باعت بين المشرق والمغرب

dr. Ahmed Sakr said...

نعوذ بالله من شر إبليس وأحنا دلوقتى باقى أيام معدودة على رمضان

لازم نحترز منه علشان ربناينجينا وكمان الحسنة بسبعين فى رمضان

اللهم بلغنا رمضان


تم إضافة التدوينة على موقع نافذة الفيوم

http://www.fayoumwindow.net/index.php?t=content&tid=30&cid=526

احمد وفيق said...

موضوع مميز ومدونه جميله
ياريت حضرتك تزوري مدونتي وتفيديني برايك
mypenwithme.blogspot.com