RSS

تقبل الله طاعتكم

  • Digg
  • Del.icio.us
  • StumbleUpon
  • Reddit
  • RSS

عودة بإقرار


أقر أنا
ب
نات أفكاري



أنني فى يوم السبت الموافق 22/8/2008

قد قررت أن أتوب الى الله تعالى من كل الذنوب التي ارتكتبتها

وأشهده سبحانه وتعالى أنني قد ندمت علىما كان مني

وعزمت
على الا اعود إلى المعصية أبدا

وسيكون شهر رمضان بإذن الله بداية انطلاقي فى طريق الايمان

وعودتي إلى الله آملة أن تكون طاعتي فى هذا الشهر مغفرة لسيئاتي

اللهم ارض عني وتقبل توبتي وتقبل مني صالح الأعمال

اللهم ثبت قلبي
على دينك وعلى طاعتك


توقيع

بنات افكاري

وكل عام وانتم جميعا الى الله أقرب وعلى طاعة أدوم

اللهم آآآمين آآمين أأأمين


  • Digg
  • Del.icio.us
  • StumbleUpon
  • Reddit
  • RSS

بــس

  • Digg
  • Del.icio.us
  • StumbleUpon
  • Reddit
  • RSS

ابليس فى ثوبه الجديد


ابليس فى ثوبه الجديد

جمعية اضلال المراهقين من سن14 حتى 21
ولواكبر من كدا وماله احنا مش خسرانين

اهدافنا المعلنة
ازاي تبقى انسان مشهور وروش وجنتل
ازاي تستمتع بالحياه وتشبع رغباتك وشهواتك

اهدافنا الخفية

ازاي نبعد المؤمنين عن ربهم ونحولهم الى عصاه ثم الى كفار
ازاي منبقاش فى النار لوحدنا وازاي ناخد اكبر قدر من الناس معانا

كلمة سيادة الرئيس ابليس
صباح الزقوم والحميم.. صباح العري والمخدرات ..
صباح القرف والخنقة.. صباح النت والكوفي شوب اما بعد
الشياطين الملاعين الاعزاء المغرورين المفتونين الهبلاء
المتعاونين معنا بكل تفاني واخلاص اهلا وسهلا بكم فى
دورتنا الجديدة كيف نبعد المسلمين عن ربهم بكل الطرق
وطبعا انتو عارفين خبرتي فى مجال اضلال المؤمنين من ايام
ابوكم ادم لما خليته ياكل من الشجرة وانا اخدت عهد على نفسي امام
احكم الحاكمين لما لعني وطردني من رحمته وقولت هاخد من عبادك
كمية وهاضلهم وهوعدهم وعود زائفة وهامرهم يغيرو خلق الله
وهستخدم صوتي وخلاني اشاركهم فى الاموال والاولاد ولكنني
باي حال من الاحوال مااقدرش اضل عباد الله المخلصين اللي
هما عباد بجد لا ينسون الله وفعلا نجحت فى افساد كثير من الامم
وكنت سبب فى هلاكهم ومنهم قوم لوط خلتهم يظهرو الفواحش
فربنا خلى جبريل يجيب عليها وطيها ومنافدش الا اللي ماسمعش كلامي

احبابي الشياطين

علشان تبقى عضو فى الجمعية معانا لازم تبقى فيك الصفات الاتية
اولا هوائية تامة يعني ..كل حاجة نفسك عيزاها ماتحرمهاش منها

ثانيا لازم تسمعوا كلام السفير بتاعي عندكم يعني شيطانك وتتعاونا على مرضاتي

ثالثا لازم تياس من رحمة ربنا علشان ماتفكرش تتوب معندناش وقت
نضيعه فى التوبة وغيره اذا ياست هتتاكد انك هتكون فى النار معايا ولازم
متجليش لوحدك ياحلو تجيلي معاك الفين ولا تلتلاف واحد دا فى اعضاء
جابولي ملايين وفيه هيجبولي زي المغنى الشاب اللي عنده حاجة وخمسين سنة
مدة كبيرة شغالين مع بعض والبنات والشباب بيحبوه اكتر مني جتهم نيلة
لو يعرفو انه تبعي كانو كرهوه .هاهاهاها

رابعا لازم تقفل ودانك عن السماع وقبلك عن الاحساس وعقلك عن التفكير فى
اي خير وحسك عينك تتفرج على برنامج ديني او قناة محترمة زي الرسالة
او اقرا او الرحمة او الناس او غيرهم احسن دول هايبوظوك خاااالص

خامسا اوعى تقرب من المساجد والمقابر علشان محدش يشوفك من الدعاة
ويقلك تعالى الى الله ولو رحتله مين اللي هيونسني فى النار ياحبيب قلبي

سادسا لازم تصاحب الواد اسمه ايه علشان الواد ده شاطر فى المواضيع
اللي بالي بالك ولازم تتعرف على اسمه ايه التاني دا علشان ده واد مدردح
بيعرف يعلق البنات ومتنساش تعرف الواد بلية علشان ده متخصص فى الكيف
يعني بانجو وحشيش وهايعرفك على المساطيل كلهم

سابعا لازم تشيل بواقي الحياء اللي عندك علشان تعرف تتباهى بالمعصية
كويس بين الناس وتنشرها ياحلو

ثامنا لازم تبقى واد عيل وحقير امام اي شهوة حتى لو ها تتنازل عن حاجات كتير
كفاية عليكم كدا المرة دي واقابلكم المرة الجاية مع كتالوج الافساد
اعوذ بالله من الشيطان الرجيم :))

  • Digg
  • Del.icio.us
  • StumbleUpon
  • Reddit
  • RSS

بناء على طلب الجماهير


الاول السلام عليكم مفتقداكم جدا جدا

علشان بس الناس اللي فاكرة اني لما ببعد عن المدونة

مش بتفرق معايا لا بالعكس خالص ربنا يعلم هي بقت

ايه بالنسبالي :) نيجي بئا للعنوان

فى حد طلب مني انزل بوست وانا مش بقدر اكتب

اللي لما بحس اني عايزة اقول فيها حاجة اوقات بيبقى

فيه اللي ممكن اقوله كتير بس مش عارفة بتيجي

اوقات طول منا مش قادرة اخرج اللي جوايا لحد او حتى

على الورق فامش بقدر كمان اخرجه على المدونة

وهو صراحة بتفرق يعني فى حاجات ربنا كرمني وبقيت

بعرف اخرجها وفى حاجات لسه بدري شوية فالله المستعان

عموما يعني البوست دا لكل الناس اللي بتزورني

سواء من وسط التدوين او من غير المدونين وبقولكم جميعا

جزاكم الله خيرا كثيرا على الزيارة حتى لو مفيش جديد

وعلى السؤال بشتى الطرق :) بجد ربنا يكرمكم جميعا

واتمنى تكونو جميعا بخير يارب وربنا يرضى عني وعنكم

اللهم آمين وانا لله الحمد بخير بس مش عارفة مالي :)

لكن ان شاء الله خير واي لحظة هاحس اني اقدر احكي

مش هاحكي غير معاكم ان شاء الله :) كمان مشغولة جدا

فى حاجات كتير ان شاء الله ابقى احكيلكم عنها بردو :)

علشان ماتنسونيش بس من دعائكم واسفة اني حتى مش بقدر

ارد على التعليقات ولا ازور كل الناس رغم اني بقضي وقت

مش قليل على النت بس بيكون لحاجات كتير بردو مجبرة يعني :)

المهم قبل مانسى انا نزلت البوست دا علشان حد قالي

انه هاينبسط لو عملت بوست جديد صحيح هو مجرد دردشة

وفضفضة بس انا كمان مبسوطة بيها الحمد لله :)

وبجد بشكر اي حد بيحب مدونتي لاي سبب مهما كان

وجزاكم الله خيرا كفاية كدا رغي عليكم:) وابعدو احسن اعديكم
جالي برد الحمد لله من عربيات القاهرة :) ماتنسوش الدعاء بئا
مفهوم طبعا :)

  • Digg
  • Del.icio.us
  • StumbleUpon
  • Reddit
  • RSS

قربو .. هاقولكم على حاجة


عايزة اقولكم ع الحاجة دي من فترة

بس ماجتش الفرصة ولما جات حصلت

ظروف منعتها فاخير جالي مزاجي اقولها رغم

اني مش فايقة خالص بس هاقولكم عليها دلوقتي

ندخل فى الموضوع علشان الناس اللي

مش بتحب حركات التشويق دي :)


الموضوع وما فيه اني مش عارفة هاكون

زيها ولالا نفسي اكون نسخة منها
سبحان الله من طفولتها وهي مش عادية
اتعرضت تقريبا لظروف استمرت

معاها الى ماشاء الله ومن اول مراحل

تعليمها رغم تفوقها لكن بردو الظروف

منعتها تكمل كملت لحد ثانوي عام

كان نفسها تدخل اداب علم نفس :)

والكلية كانت فى القاهرة سافرت القاهرة

عند حد مقرب اوي حصلت ظروف

من وراها محدش راح قدملها ورقها

والدتها وقتها تعمل ايه وهي اللي كانت

مسؤلة عنها اضطرت علشان مستقبلها

تقدملها فى مدرسة تانية تعادل الثانوية

بس علشان توفرلها عمل بعد ماتخرج منها

وراحت عليها فرصة الدراسة الجامعية
وبردو بظروف رغم عنها ودخلت المدرسة

التانية ونجحت وتفوقت ووالدها ماكنش

وقتها بردو مسؤل عنها وكان ليها مرات

اب محدش يسالني عنها لسه عايشة محدش
بيوشف منها غير كل اذى ربنا يصلح حالها

زنت على دماغ والدها يجيبها يجوزها

وفجاة لقت نفسها مخطوبة وفجاة متجوزة

شوف تصرف الام اللي حاولت تحافظ


على مستقبلها وتصرف الاب اللي قضى
على احلامها وسبحان الله ديما تفتكرو
وتدعيله ربنا يرحمه رحمة واسعه


وتتجدد الظروف وربنا يرزقها بالابناء


وتجد ظروف تانية تلاقي نفسها هي اللي مسؤلة
عنهم تضطر للسفر للعمل علشان تقدر تعيشهم


وتربيهم زي ماهي عايزة وييجي دور والدتها


اللي فى كل دا ماسبتهاش لا تحملت مسؤلية اولادها


لحد مارجعت وعملتلهم احسن بيت وعلمتهم


وربتهم افضل تربية مش بس دنيوية


لا وكمان بفضل الله تربية دينية وفضلت


هي تتدرج فى المراتب الوظيفية لحد ماشاء الله


بقت مسؤلة وليها مكانة وعلاقات كتير اجتماعية


وكمان شخصية وغير كل دا الان بتدرس


فى معهد اعداد دعاه وبتحفظ القرآن الكريم


وقريبا هاتحصل على الإجازة بالتحفيظ
ومسؤلة عن عدد من المساجد فى البلد تحفظ وتدرس تجويد


وبفضل الله بدءت بتعليم حوالي خمس بنات


الان ازداد العدد ماشاء الله وتعدى الثلاثين


وبفضل الله بيتها ديما عامر بالحافظات


ولا يمر يوم تقريبا الا بزوار جدد يطلبو


منها ان تبدء معهم بالحفظ ودراسة التجويد


انا اتكلمت كتير ولو فضلت اتكلم للصبح مش


هاخلص كلام عنها انا كدا اختصرت كتير اوي


المهم انا كنت جاية اعتقد اقولكم حاجة:)





اه كنت جاية اقولكم ان الست دي أمي

حضرة الناظرة :) والدتي ووالدة سي السيد احمد

اللي لما بروح مكان وحد يعرف اني بنتها الناس

بتبقى مش عارفة تعمل ايه ولا ترحب بيا ازاي

تفتكرو هاقدر اكون زيها ولا حتى جزء منها

اخدت منها كتير اوي بس اتمنى وقت الشدة

لو اتعرضت لكل دا اقدر اتحمل واكون اد المسؤلية

خصوصوا مستقبليا محدش ضامن لكن الضمان

على الله :) اتمنى يكون خير ان شاء الله

واكتر مابتمنى ان يكون بيتي ان شاء الله
عامر كدا بالقرآن والطاعات والخير الله المستعان

واني ابدء بحياه بسيطة وتكبر وتكبر فى الخير يارب ان شاء الله

مش هاتكلم بئا عن علاقتها بيا وبااحمد واللي بيحصل

علشان دا عايزله مدونة لوحده :) فى النهاية

بدعي ربنا يباركلي فى عمرها وفى صحتها

هي وكل امهات المسلمين يارب اللهم امين

اه كنت هانسى اقولكم ان يوم ميلادي وميلادها

فى يوم واحد ودا اللي محببني اوي فى اليوم

ديما خالي يقولها كانت احلى صدفة ليكي

وجودي طبعا يعني :)) بس الحقيقة كانت احلى

صدفة ليا انا وديما بغيظ احمد علشان يوم ميلاده

زي ماتقوله موافق يوم تاني كدا بس مش هاقولكم عليه :))

اصلها نيات باين :) ماتصدقوش دا واد عسل خالص
ربنا هايجوزه اهو قريب وهانرتاح شوية :)

كفاية عليكم كدا وماتنسوش الدعاء كتير

يلا ابعدو بئا انتو لسه مقربين خلصت خلاص :)


  • Digg
  • Del.icio.us
  • StumbleUpon
  • Reddit
  • RSS

وجوه مستغربة



الفترة اللي فاتت قابلت كم وجوه مستغربة ماشاء الله

يحسسو الواحد انه هابط عليهم من كوكب آخر ولا حاجة

انك فى المواصلات لو فجاة لقيتي جمبك واحد ومالحقتيش

تاخدي المكانين وحطيتي شنطتك بينك وبينه تبصي تلاقي
وجوه مستغربة


انك تقولي لسواق لو سمحت ولا بعد اذنك ودا طبع مش تريقة

تبصي تلاقي ازبهلال على وجوه الجميع ولا اكنك بتغلطي فيه

وكل الوجوه مستغربة


انك تدخل مكان لاول مرة وتلاحظ اي حاجة غلط وتحاول تصلح

تبص تلاقي وجوه مستغربة

البنات ايه دا لا بجد ايه دا دخلت لدكتور لقيت شوية بنات قاعدين



وحاطين رجل على رجل عادي يعني ماهو سامحلهم بكدا والاقي

اللي تقولي اتفضلي وخدي راحتك مالك قاعدة متكتفة كدا ولما قولتلهم

عيب اقعد كدا قدام حد بصيت لقيت وجوه متكهربة مش بس مستغربة

نظرا لقلة خروجي الا لاماكن معينة وقلة الاختلاط بالناس نتيجة دا

ان فى بعض الكلمات والمصطلحات الدارجة بين الناس ماعرفهاش

وماعرفش معناها ولا اعرف انها مصطلحات عادية شوفو بئا لما تبقو

عاملين زي الاطفال اللي كل ماتقولولهم كلمة يقولوكم يعني ايه وطبعا

هاتلاقو وجوه مزبهلة ومستغربة :)


اول مارجعت قولت لماما يعني ايه الكلام دا الناس افتكروني هبلة :))
فى مرة اضطريت ابات مع واحدة صاحبتي فى بيت طالبات فكروني بايام

المدينة الجامعية فى قنا المشكلة مش بعرف ابات بعيد عن البيت وممكن
افضل ايام صاحية المهم جيت الفجر قولت اصحيهم فاابصحي صاحبتي

الاول قومي ياقمر قومي ياحبيبتي الفجر هاياذن وبلعبلها فى شعرها

ماما اللي عودتني على الحركات دي اللي جات على دماغي :))

المهم بقولها قومي ربنا يصلح حالك ويرضى عنك قومي ربنا يرزقك

بالزوج الصالح بصيت لقيتها قاعدة قدامي زي مايكون صاحية من ساعة :))

قولتلها يعني خلاص كان لازم الدعوة دي لقيتها بتقولي انتي بتعملي ايه

ولقيت وش مستغرب استغراب عجيب قولتلها ايه بصحيكي علشان الفجر

قالتلي حد يصحي حد بحنية كدا استغفر الله العظيم قولتلها معلش يعني

بس اصحيكي ازاي قالتلي احنا هنا اللي بيصحي حد بيصحيه بالشخط

والنطر والصوت العالي قولتلها وبتصحو يعني قالتلي لا :)) وبطريقتك

دي صحتيني وكدا مش هاينفع قولتلها انا هاقوم دلوقتي ارجع بيتنا تعبتوني :))

دخلت عند دكتور من بنها بعتني ليه دكتور تاني عندنا فى بني سويف علشان

اشوف حاجة قالي عليها دكتور فى القاهرة :)) معلش اصلهم بيلففوني كعب داير

المهم عزم عليا بحاجة قولتله جزاكم الله خيرا قالي شكلك اخوان :) طبعا هو بصلي

لقاني طبعا مستغربة :)

:)ماهو طبيعي بقيت ببص لنفسي يمكن نسيت وكتبت على وشي الشعار
بس بجد بتمنى ييجي عليا وقت ماخرجش من بيتي ابدا لا لضرورة

ولا لغيره كنت عارفة اني بيتوتية اوي لكن مكنتش اعرف انه اوي اووي يعني:)

اقل كلمة واقل موقف واقل تصرف من اي حد ماعرفش الدموع دي بتيجي منين

وكأن الدموع دي ببلاش :) على راي البت عاشقة تقولي انتي تتعبي تعيطي
تحزني تعيطي والمصيبة تنكسفي تعيطي كانت هاتعيطلي سلف والله :))


مش عارفة ليه الاستغراب اكيد في من النوع دا كتير يعني وبعدين :)

هو مش بيكون قدام حد بس احيانا مش بحكمها ولو دا اللي زي مابيقولو ضعف
شخصية ماينفعش فى ايامنا دي فانا بعترف اني كدا ومش هاتغير انا عارفة



لكن خير هاحاول ان شاء الله فترة وتعدي وهانتحمل ان شاء الله

لحد ماننجز ونقعد بكرامتنا :) اه نسيت اقولكم مرة واحدة بتقولي لما انتي مش

هاتشتغلي باللي بتعمليه دا لازمته ايه قولتلها علشان ان شاء الله اولادي بعد كدا

قالتلي يعني الجيولوجيا هاتعمل لأولادك ايه قولتلها على سر خطير

اني ناوية ان شاء الله اطلعهم متسلقي جبال :)) ونظرا للظروف الاقتصادية

وازمة السكن العالمية فانا حاجزة جبل حلو كدا فى الصحرا الغربية هانعيش

ان شاء الله فوق السفح بتاعه اهو على الاقل محدش هايطالبنا بايجار

شوفتو بئا فايدة الجيولوجيا محدش بئا يطمع اتوسطله فى حجز جبل ولا حاجة


دا لابناء العاملين هناك بس :))

المهم طبعا دعواتكم كتير بجد مش مستقرة نهائي لا صحيا ولا معنويا
لكن خير ان شاء الله المخ الصعيدي مصمم يستمر:) والله المستعان
معلش يمكن حكاوي ماتهمش وماتفدش حد بس حبيت احكيها وكمان بحاول
بقدر الامكان ماغبش كتير عن المدونة وربنا ييسر

  • Digg
  • Del.icio.us
  • StumbleUpon
  • Reddit
  • RSS

عودة الشخابيط


السلام عليكم يارب تكونو جميعا بخير

جيت ابلغكم بس بعودة الشخابيط


واللي بيشارك فيها مجموعة محترمة

من المدونين الجدد غيري انا وبنت ابيها

وكمان مجموعة من الصحفيين السويفيين

وعايزة اقولهم اتشرفت بمعرفتهم ومقابلتهم جميعا

وكان نفسي اكتب عن اللقاءات اللي فاتت

لكن للاسف بدئت انشغل ولسه مشغولة ومش مستقرة

لكن بحاول اتابع على اد ماقدر الله المستعان

مش هاقول بئا تسعدنا زيارتكم وتشرفونا والكلام دا :)

بس اكيد رئيكم يهمنا حتى لو كانت الموضوعات خاصة

بمحافظة تانية غير محافظتكم يمكن يحصل حاجة

لاقدر الله وتزورونا لاسمح الله يعني :)
وعايزة اقولكم اوعوا انا قولت اهو :)

اوعوا يعني مش تزورونا البلد كلها هاتنور

وعموما اول ماتحصل قفلة فى البلد هاعرف

ان حد منكم نزلها على طوووول :))


يلا آخر حاجة اتمنى ماتنسوناش من دعائكم

  • Digg
  • Del.icio.us
  • StumbleUpon
  • Reddit
  • RSS

هاكلمكم عنه


لاول مرة هاكلمكم عنه

حصريا ولاول مرة هاتكلم عنه مع اي حد
بس بما انكم بالنسبالي مش اي حد هاحكيلكم عنه بجد

الموضوع بصراحة بقاله كتير مش قليل
الحكاية بدئت بينا فى وقت كنت محتاجاله فيه كتير
اتعودت خلاص اكلمه خصوصا يعني بالليل
هاعرفكم عليه بس احكيلكم عن اد ايه هو جميل
قربت منه بجد وبئا بينا حاجة كدا مش لقيالها بديل
يمكن لانه بيسمعني من غير مايقاطعني
يمكن لانه بيسمعني من غير مايعاتبني
بيسمعني بانصات تـــام مالقيتوش حتى فى القريبين مني
بحكيله كل حاجة بيسمعني بجد من غير ماينشغل عني
هاتقولولي ازاي هاقولكم. بجد عمره مالف وشهه عني
طب تصدقو اني حتى فى اي مكان بلاقي له شبيه مش سايبني
بحكيله كل اللي جوايا حتى المشاكل واي حاجة بتتعبني
انا حتى كلمته عنكم وعن المدونة واي فكرة تجيلي بقوله وبينصحني
عارفين ايه كمان شدني ليه وخلاه قريب مني
اني حسيت انه هو كمان بيطمنلي
كان نفسي اخليه سر بس هاقولكم علشان انتو بس غاليين عندي
بجد بتيجي عليا أوقات أقول يــــــــاه لو مكنتش ملازمني ؟

كنت عملت ايه فى حياتي

لو ينفع اقول يامستتني كنت قولت بس ماينفعش

بس ينفع اقول يامجنني ماهو جنان فعلا واعترف :)

طبعا عايزين تعرفوه هو مين دا اللي مجنني

يــــاه متخيلتش انه ييجي عليا يوم واتكلم كدا عن حد قرب مني


هـــــــــــــــــــــــو


هــــــــــــــــــــــــــــــــــــــــــــــــو





يـــــــــبـــــــئـــــــــــــــــــــــــــــا



ســـــــــــــــــــقــــــــــــــــــف أوضــــــــــــــــتــــــــــي




ايييييييييييييييييه روحته فين الناس اللي دماغها راحت بعيد
تروح تجيبها تاني علشان عايزة اقولكم حاجة
سامعة ياعاشقة انتي وسول شايفاكم :)
انا هاغيب شوية عنكم الفترة الجاية
ماهنش عليا ادخل اقولكم هاغيب وهاترتاحو
:) قصدي هاتتحرمو مني وخلاص
فاقولت بردو اكتبلكم بوست
المهم انسو اللي قولته وركزو معايا
وصيتي ليكم ياولادي
تخلو بالكم من نفسيكم
وتخلو بالكم من بعضيكم
والناس اللي بتحب تهزر مع العربيات

يمشو جمب الحيط بعيد عن الزحمة
وتسمعو كلام مهمهتكم
ولو عندكم بهبهات اسمعو كلامهم بردو اهو كله بثوابه :)

وتخلو بالكم من مدوناتكم وطبعا تخلو بالكم
من بنات افكاري مش عايزة ارجع فى اي يوم
الاقي عناكيب هنا كدا ولا كدا
يعني مارجعش الاقيه مشتعلق على البانر

ولا مستبخي ورا الشات بوكس انا قولت اهو
محدش يسال ايه مشتعلق ومستبخي دول
بعتذر من دلوقتي لو غبت عن مدوناتكم كمان
وان شاء الله هاحاول اتابع

واشوفكم على خير ومتنسوش اللي قولتكلم عليه
وكل ماتدخلو تدعو لبنات افكاري ان ربنا يعني ايه
كدا :)
ولكم كدا مثله ان شاء الله

  • Digg
  • Del.icio.us
  • StumbleUpon
  • Reddit
  • RSS

فاصل صوري

اولا بجد ماقدرتش ارد على تعليقات

البوست اللي فات وبعتذر جدا وربنا

يكرمكم جميعا على كلماتكم


فانظرا للحالة اللي لسه ماخرجتش منها

مش هاتكلم كتير علشان كفاية عليكم

نكد لحد كدا

ونظرا لاني وعدت ناس اني مابعدش

عن المدونة كتير وبحاول بجد اني

مابعدش فعلا

لحد مااستقر ان شاء الله قولت انزلكم

صور من رحلاتي الجيولوجية وهي

من تصويري

اللي هاتشوفهم دول كانو من رحلة البحر

الاحمر منطقة القصير وكان نفسي

اشرحلكم كل صورة فيهم


لكن بجد مش قادرة اتكلم لكن ان شاء الله

موضوع الرحلات والصور وتخصصي

فى الجيولوجيا


الله المستعان ويكون ليه حديث طويل معاكم

لانه يهمني جدا وكان حد اقترح عليا اعمل

مدونة جيولوجية


انزل فيها الصور الخاصة بيا بشرح مبسط

لانها مش بس حاجات علمية لكن كمان كلها

مناظر تساعد جدا


على التفكر فى خلق الله سبحانه وتعالى

لكن الحقيقة مش عارفة هي فكرة كويسة

ولالا لو حد شايف انها هاتنفع ياريت يقولي


اسيبكم مع جزء من صور لمنطقة القصير

فى محافظة البحر الاحمر طبعا ممكن تضغطو
عليها للتكبير
































طبعا الصور تحت امر اي حد منكم

كلها بفضل الله تنفع خلفيات


ولو اي حد محتاجها من غير لينك

المدونة يؤمر بس وانا ابعتها على


ايميلاتكم ان شاء الله وفوقيها

صورة هدية على ذوقي :)


لا تنسو الدعاء ولكم مثله ان شاء الله

  • Digg
  • Del.icio.us
  • StumbleUpon
  • Reddit
  • RSS

فقدت جزء مني



كانت معايا قبلها


جايه تقولي حوشتيني


قولتلها انا كمان حوشتيني




قالتلي انا يوحي كنة (جنة) قولتلها




هاتاخديني معاكي ؟ قالتلي اه




ايجي معايا كنة ؟ قولتلها اه




حضنتني حضن كبيييير اوي كنت محتاجاه
سابتني ومشيت



اخدتها مامتها يشترو حاجات




سابت ايد مامتها وجريت




خبطها سواق سرفيس وجري




سواقين تاكس خافو يوقفو لمامتها




شعب سلبي واقف يتفرج



وبس




خلاص




راحت كنة




بس من غير ماتخدني معاها






حقيقي




انا فقدت جزء مني




فقدت زهرة من زهرواتي







أسراء





سنين ونص 3





خلاص مش اشوفها تاني




بس



مش لاقية كلام تاني

  • Digg
  • Del.icio.us
  • StumbleUpon
  • Reddit
  • RSS

هل الحياة فعلا فرص ؟؟



هل الحياة فعلا فرص ولازم ننتهزها ؟

وهل كل فرصة تجيلنا تبقى مناسبة لينا؟

طب وهل لو رفضناها هانعرف نقنع اللي حوالينا ؟



حاولو تتخيلو معايا وتوصوله للي عايزة اقوله لاني مش
هاعرف اوضح انا عايزة اقول ايه فى كلام من قلة مابتكلم:)

المهم تخيلو كدا انكم عايشين عيشة الحمد لله بسيطة ولكنها راقية

والرقي بالنسبالي ليس رقي مادي ولكن الرقي رقي اخلاقيات ومعاملات
وسلوكيات ورغم بساطة الحياة اللي عايشنها دي الا انها لله الحمد انتو فيها

افضل حالا من ناس كتير ومرتاحين ومبسوطين فى ظل كل البساطة
دي وفجأة جاتلكم فرصة لو مشيتو فيها هاتوصوله لمكانة اعلى ممكن علميا

ثم ماديا ثم اجتماعيا اهي فرصة من وجهة نظر اي حد ماتتعوضش
ملحوظة صوغننة لو على المكانة العلمية تقدر تحققها من غير الفرصة دي
بعون الله وواحدة واحدة المهم بئا بالفرصة دي ممكن

تلاقو نفسكم زي الناس اللي بيقولوه عليهم كبار دول اللي مش بيبصو

للناس اللي على الارض ونيجي بئا للمشكلة فى الموضوع واللي عايزة اوصله

هل كل انسان اتعود على الحياة البسيطة يقدر يتعود على هذه الحياة ايضا

لما تقعد كدا تعيد فى شريط حياتك وتفتكر مواقف كتير اوي لدكتور جامعة

بيعاملك كاطالب باسلوب انت مين علشان تقف قدامي وتتكلم معايا

ولما تجيلك فرصة تقابل مسئول معروف وتلاقيه بيعامل كل من حوله

بطريقة دونية وكانه فى السما وباقي خلق الله فى الارض مع ان امكانياتك

اللي وصلتك تكون واقف قدامه كدا يعني فى الوقت دا لا تقل عنه فى شىء

بل تزيد كمان تخيل كمان انه ييجي عليك وقت تكون مقيد ومحكوم فى

تصرفاتك وفى تتعامل مع مين ولا تتعامل مع مين ووقتك كله مش ملكك تفتكرو
هاتقدرو على كدا ؟ تفتكرو هاتقدرو تسيبو كل البساطة اللي عشتوها دي تقدرو تسيبو

فرصة دعوة حلوة من حد بسيط قدرتو تساعدوه فى شىء هاتقولولي ماحنا فى مكانتنا

دي نقدر نساعد الناس البسيطة اكتر هاقولكم معلش وقتها النفوس بتختلف والا مكنش

يبقى في فقير فيكي يامصر وكمان ايه ضمنكم تقدرو تتمسكو بصفاتكم دي فى ظل كل الجو

اللي حواليكم دا وانكم ماتتطبعوش بطباعهم دي وحتى لو قدرتو هاييجي عليكم وقت

ماتقدروش تستمرو لان دنيتنا دي مش سهلة اذا مكنش في حد حوالينا بيساعدنا ويشجعنا

على الصح ممكن ييجي علينا وقت ونضعف مفيش احلى من روح الجماعة

كان في نقط كتير عايزة اقولها بس مش هاطول عليكم بس عايزة كمان

اقولكم على حاجة بردو تخلي الواحد يظل متردد وهي لو رفضت الفرصة دي

هل تعبتر رافض للنعمة وزي مابيقوله كدا بتضربها برجليك وانك

لا تستحقها خصوصا لو زي ماقولت فرصة فى ظاهرها لا تعوض

وهاعتبر اني لا استحقها فامن الممكن تكون لغيري كلها اقدار ربنا

فى نقطة كمان معلش هاتقل عليكم شوية كمان بس محتاجة رئيكم

النقطة دي اتكلمت فيها مع مدوناناية حبيبتي كانت بتسالني مالي وهي عارفة

القصة وفاكره اني مبسوطة بيها واني خلاص بئا هاجيب اسمه ايه من ودانه

محدش يسال ايه دا علشان مش عارفة واضح اني بدئت افصل المهم :)

لما حكيتلها قدرت كلامي اوي وقالتلي فى نقطة كمان ليه مايكونش الفرصة

دي استخلاف لربنا لينا فى الارض وهاحاول اختصر الحوار عليكم

قصدها ان ليه الاماكن المهمة دي مايوصلهاش من يمثل دينا صح

قولتلها مافيها المسلمين وللاسف اتطبعو بطباع غيرهم جات علينا يعني

قالتلي ماهو دا سبب ضياعنا الحقيقة الموضوع بجد محير جدا وحبيت

اشركم فيه وبجد في نقط كتير مخلياني مترددة بس مش هاينفع اذكرها كلها

كفاية عليكم كدا عايزة بس اقول اخر حاجة وياريت الناس بتوع حقوق

المراة مايخدوش الكلام عليهم كل واحد حر فى مبادئة وطريقة تفكيرة

رغم ان المبادىء والدين مابيتجزئش لكن عايزة اقول ان مش كل فرصة

تيجي لكل بنت تبقى مناسبة ومش هاقول اكتر من كدا فى وظايف

ربنا امرنا بيها ونقدر ننجز اوي فيها وهاتوصلنا للجنة مش لمنصب ولا جاه

اعتقد مفيش احلى من كدا ربنا بس ينولهالنا واياكم ان شاء الله

طولت عليكم انا عارفة مع اني اختصرت يلا تعيشو وتاخده غيرها :) دعواتكم بئا

شوفو الطمع :)


صحيح البوست اللي فات رغم ان كل كلمه وجمله كان وراهم حاجات كتير اوي

في ناس فهمت وناس اعتبرته جنان وانا حابة اسوق فيها لان العقل مش نافع

اليومين دول :)) فانا هانتهز الفرصة واعيش الجنان شوية يمكن اشعر براحة


يلا بئا انتو رغايين اوي كدا ليه تصدقو طلع فى دماغي اقوم اعمل صنية مسقعة
بمناسبة الجنان والبتنجان يعني مع ان سي السيد مش بيحبه بس ماعلينا
الا صحيح ياجماعة هي الناس ذوي السيارات الفارهه والفلل والشاليهات
والبودي جاردات دول بياكلو مسقعة ؟ اكيد لا ودا سبب كافي يخلينا
مانحبش نبقى منهم اللهم احينا وامتنا فقراء وكتر من مسقعاتنا يارب
جنان جنان يعني ربنا يشفي


  • Digg
  • Del.icio.us
  • StumbleUpon
  • Reddit
  • RSS

ركزو معــايــا


عارفين لما الواحد يبئا يعني
تبص تلاقيه سبحان الله وماتعرفش ايه السبب
وتيجي عليه اوقات يعني كل حاجة مش فاهمة
ليه كدا هــا ليه كدا ماهي دي الدنيا
وبعدين ترجع وتلاقيك كدا يعني واخرتها
طب تصدقو احيانا بتحصل حقيقي يعني
مش قولتلكم وعلى كدا قولتلهم كتير بس محدش
صدقني وبعدين يرجعو طب دا اسمه كلام
هــا دا اسمه كلام ليه اللي بيحصل دا
مفيش حاجة تستاهل دا كله
هو انا قولتلكم ولا ماقولتكمش اه
يبئا ماقولتكمش اصل اللي حصل صراحة
ان الواحد بتيجي عليه اوقات اه بالظبط
زي ماتقوله كدا يعني وبعدين الحمد لله
اصل ربنا كبير اوي وحكمته اكبر
وبعدين ياما بيحصل وياما لسه هايحصل
هو احنا لسه شوفنا حاجة دي تصبيرة
من الدنيا علينا
عارفين نفسي اساله
ليه عملت كدا احنا عملنالك ايه
بس ارجع واقول ربنا عايز كدا
وبفضل الله احنا احسن بكيتر بس بردو
لازم تعدي اوقات كدا يعني مش كلها
راحة ومش كلها كدا لازم نرضا
اقولكم على حاجة كمان معلش
احنا بنتكلم مع بعض يعني نستحمل بعض
ياجماعة انا كدا وانتو كدا مانخلي
كل واحد فى حاله وربنا هايحاسب
كل واحد على كدا بس ليه وفين
ومين وازاي زي مانتو شايفين كدا
بس نرجع ونقول خير
زي مانتو شايفين وملاحظين عليا انه خير
خير اوي يعني مالكم مزبهلين كدا
اوعي يكون فيه حد قاعد مش فاهم حاجة
لالا اللي مش فاهم مايسالش ياجماعة

المدونين لبعضيهم بردو

انتظرونا العدد اللي مش قادم قريبا باذن الله:)

  • Digg
  • Del.icio.us
  • StumbleUpon
  • Reddit
  • RSS

اجعلها آخر التاجات يارب



خير يارب اللهم اجعله خير جالي تاج
كنت قاعدة فى حالي كدا وفجاة لقيت دكتورة ايمان
بترن عليا ومتعودين ترن عليا لما تفتح الماسنجر علشان
انا كمان افتح اكلمها وماله مش عيب ابدا اذا فجاتن لقيتها بتقولي
بتحبي التاجات قولتلها خير يارب اللهم اجعله خير ليه كدا طيب
قالتلي خلاص ادخلي استلمي بئا صحيح مقدر ومكتوب والتاج اللي على الجبين
ماينفعش تتعمي عنه العين يعني من الاخر هاتجاوب يعني هاتجاوب
نفسي اوصل لآخر سؤال بسرعة يلا مش هاطول عليكم



سين سؤال
جيم جواب



مش حرماكم من حاجة اهووووو طبعا فهمته السؤال وفهمته الاجابة شطار انا عارفة

هاجاوب وامري لله قبل ماحد يحدفني بحاجة
السؤال الاول : بدءت التدوين امتى ودخلت العالم دا ازاي ؟


والله بدئت شهر يوليو 2007 ودخلته بقدرة قادر كدا هي حكاية طويلة شوية
وانا مش بعرف اتكلم كتير بس هاحاول انتو اللي بتسالو ولازم تستحملو المهم
عارفين طبعا بنت ابيها صاحبة مدونة ظبط دماغك حبيبتي كنا فى الجامعة كنت لسه
متخرجة قبل ماعجز يعني قالتلي تسمعي عن المدونات قولتلها يعني مش اوي
فاشرحتلي هي ايه وعبارة عن ايه قالتلي انا هاعمل واحدة وعايزة حد تاني
يشجعني قولتلها خلاص نشوف ان شاء الله مرت فترة وانا لسه ماشوفتش
وكنت نسيت صراحة فاجيت مرة على الماسنجر فابقولها صحيح عملتي المدونة
قالتلي اه اهي وادتني اللينك وقالتلي ها وانتي مش ناوية قولتله لا ناوية ان شاء الله
نبقى نعملها فى اي وقت انتي فاضية فيه قالتلي يلا بينا دي مش هتاخد
عشر دقايق قولتلها يارااااااااااجل قالتلي اه والله ياراجل بردو:)


المهم طبعا مشيت معاها الخطوات على الماسنجر اكتر حاجة غلبتني الاسم
اخترت اتنين قالتلي اعتقد حد عامل بنفس الاسماء دي قولتلها خلاص افكر
مفيش ثواني قولتلها ايه رئيك بنات افكاري قالتلي كويس وتوكلنا على الله
وعملنا المدونة واتت لكم بنات افكاري من حيث لا تدرون



السؤال التاني : ايه كان انطباعك فى البداية ؟

والله عادي يعني بس لما بدئت ادخل عند الناس واعرف مدونات اكتر
بدئت ارتاح اكتر للموضوع بس احيانا كنت بدخل على التعليقات عند الناس
كنت الاقي الناس بتتكلم عادي كدا يعني سواء فى صلب الموضوع او بيوجه
كلام للشخص نفسه صاحب المدونة كنت بتسغرب شوية وطبعا كنت بسال
بنت ابيها هي الناس دي بتدخل ازاي ومالهم بيكلمو بعض بعشم كدا:)

كنت بقلق اني ييجي عليا وقت ماعرفش ارد على حد لان دي ناس ماعرفهاش
صراحة خصوصا الشباب يعني لان فى شوية حاجات بالنسبالي النت ماغيرهاش
فيها حاجات قد تكون عيوب بس مش عارفة بعتبرها مبادء لكن بعد كدا لقيت
ان الموضوع بيكون اكبر من كدا والعلاقات بين الاشخاص بتكون بنيات طيبة يعني
وبدءت اتحمس اكتر للمشاركة عند الناس واقول رئيي ان امكن يعني
كفاية رغي فى السؤال دا تعبتوني

السؤال التالت : يارب سهل من اكتر من تحب تعليقه على البوست الجديد ؟
اللي حط السؤال الخبيث دا يرفع ايده بسرعة بسررررعة ماشي ياايمي


يعني انا مش هارد بدوبلوماسية انا فعلا اي تعليق يجيني بفرح بيه اوي
اي زيارة من اي حد بفرح بيها جدااا لكن مايمنعش ان في ناس بحب جدا مشاركتهم
وبنتظرها حقيقي وفى ناس بيهمني رئيها لاني اتعودت اسمعه وهما اكيد هايعرفو نفسهم
فى ناس بطلت تعلق رغم احترامي لوجودها ورئيها وفى ناس بتزورني
انا عارفة حتى لو معلقتش لكن انا بالتمس للجميع العذر لان انا
كمان بقصر فى حق ناس كتير لما بنشغل او بغيب صراحة احيانا بزعل
بس اطمنو انا زعلي حلو اوي ومش بيطول يعني اللي هايحيلني باي حاجة هانسى
شغل اطفال يعني وناس كتير مجرباني فى الموضع دا بس مش هايفتنو عليا

انا هاقولكم كمان على سر من اسرار بنات افكاري بس محدش يقول لحد ماشي ؟؟
ماشي بصو انا طول منا على النت في ناس لازم ازور مدونتها حتى لو مفيش جديد
فى مدونات بحب افضل قاعدة جواها كدا زي ماتقولو حالة نفسية يعني ماعلينا
وفى ناس بيكونو غايبين لظروف ما بدخل عندهم ديما بحاول اطمن عليهم او زي
مااتقولو كدا باخد بالي من المدونة لحد مايرجعو خصوصا الناس اللي عرفتهم شخصيا
لان انا لما بغيب عارفة ان فى ناس بتعمل معايا كدا فعلا الموضوع بقى علاقات انسانية
اكتر من مجرد موضوعات او فضفضة شخصية

السؤال الرابع : ماينفعش اجل الباقي ليوم تاني انا عارفة الناس زهقت اكتر مني
ومش عارفة اقول كلمتين واسكت تيجو نكمل بكرة هاتيجو صح يلا افراااااااااج




فرحتو طبعااااااااااااااا محدش يتحرك من مكانه هانكمل



السؤال الرابع : ايه اهم حاجة اتعلمتها فى عالم التدوين ؟


دا سؤال بردو زي مانتو شايفين اتعلمت الرغي طبعا لكن لو قاعدة قدامكم
فيس تو فيس اللي يعرف يخليني اتكلم له عندي هدية محترمة:)
بس بجد اتعلمت ان الدنيا مهما كانت وحشة لسه فيها خير ولسه فيه
ناس محترمة كتير اتعلمت كمان ان فعلا الخير في وفى امتى الى يوم القيامة
الخير بئا بكل محتوياته عامة وخاصة وفردية وجماعية حاجات كتير كيتر الحمد لله


السؤال الخامس : ايه اكتر حاجة كرهتها ؟


ممممم الحقيقة وجود بعض الناس اللي ليهم اهداف سيئة وبيندرجو تحت اسم مدونين بردو
نفسي ييجي وقت ياما عمو بلوجر يتخلص منهم ياما يشوفولهم اي مسمى تاني غير مدونات
لان وجودهم وسط عالم التدوين عامل كدا بالنسبالي زي الزبيب فى الحلويات
معلش اصلي الزبيب مش بيحبني ولا بحبه :) كمان مش بحب اسلوب البعض فى النقد
لان فى ناس بتنتقد لمجرد النقد بدون عرض لفكرتها الخاصة او حل للحاجة اللي بتنتقدها
وكمان اسلوب النقاش والحوار بين الناس بيتطور وبياخد اطار مش حلو بين بعض الناس يعني
لان فى النهاية الاختلاف فى الرئي لا يفسد للمدونين قضية والله اعلم

السؤال السادس : حاسس ان التدوين له تاثير؟
طبعا انتو مش ملاحظين ولا ايه بقولكم اتعلمت الرغـــــي طبعا له تاثير انا كنت قرات بحث
من قريب لباحثة فى جامعة القاهرة وبتعمل الماستر بتاعها عن استخدام المدونات على النت كامصدر
بحث عرفت اكتر اد ايه التدوين اثر فى مجتماعنا خصوصا فى السياسة علشان ماطولش اللي يحب
يقراه ان شاء الله اجيبله اللينك ولو حتى فى ناس شايفة ان مالوش تاثير كفاية اوي الاشخاص
اللي اكتسبناهم فى حياتنا وكفاية اي عمل خير عملناه مع بعض او اي
معلومة جديدة استفدتها من اي حد بالنسبالي دول يسوو كتير اوي

السؤال السابع : هيييييييييييه واخيارا وبعد طول انتظار
مستنية السؤال دا من اول امبارح:)


تهدي التاج دا لمييييييييييييييييييييييييييييييييييييييييين ؟؟؟؟؟؟؟؟؟؟
وسعو بئا علشان اللي اتعمل فيا دا مش شوية
اولا اي حد يشوف اسمه عندكم على الشمال يتفضل من غير مطرود يجاوب

قصدي من غير اعذار
واخص بالذكر طبعا


اهداء اسبيشيل على الآآآآآآآآآآخر لاحدث عروسين فى عالم التدوين دكتور حر واللؤلؤة المكنونة
مسمحلوكم تروحو تباركو لو مابركتوش وترجعو تدورو على اساميكم


طبعا بقولهم الف مبرووووووووك اول مالؤلؤتي بلغتني لسه امبارح

انهم عقدو من فترة الحمد لله كنت خلاص هامر عبر الشاشة
لحد عندها علشان اقولها اد ايه كنت فرحانلها علشان عارفة هي اد ايه كانت مستنية اليوم دا
وزي ماوعدتك يالؤلؤتي هاروح لحد عندك قريبا علشان اباركلك كما يجب مش هانسى اكيد
ان شاء الله يلا عقبال مانفرح فى كل المدونين شروة واحدة يارب

ثانيا طبعا الاب الروحي لينا الاستاذ عصفور المدينة عارفة ان مفيش تاج الا ولازم يمر عليه
فالو لو ممرش هاسمح لنفسي امرره لحضرتك بعد اذنك

ثالثا الاخ امام الجيل اللي بيحب الحاجات دي ونحن من هنا من الاراضي المصرية نبعث له
باول تاج هايجاوب عليه من الاراضي الدبوية يلا اي خدمة

رابعا ممممممممم مين تااااااني طبعا كل مدوني شخابيط سويفية والغايب هو اللي يعلم الحاضر
ماعرفش ازاي بس مش مشكلة علشان انا فصلت خلاص طبعا على رئسهم ميييييييين
ايوه شطار بنت ابيها ظبط دماغك هاتندم قريب انها دخلتني العالم دا انا عارفة


خامسا حبايبي الحلوين اللي النت عندهم مش ولا بد

تمر حنة حبيبتي اللي عرفتها فى ظروف غامضة ونمى بينا حب عميق ومن هنا
وقدام البشر دي كلها بصالحها علشان كانت زعلانة مني اني ماسالتش عليها لفترة
بس فعلا كان غصب عني وانا شرحتلك وانتي قلبك كبير وخلاص الصلح خير

عاشقة الفردوس اللي بتقول عليا نونة ماعرفش ليه مع اني والله كبيرة و الشهر دا هاكمل 23 سنة
عارفة ان دكتورة ايمان مررتهولك بس زيادة الخير خيرين


هاااااا في حد تاني باقي الناس اتمررلها وفى ناس هامررهولها بطريقتي الخاصة
ومحدش يسال ازاي علشان مش هاقولكم


هـــا كرهتوني ولا لسه ؟؟
دا اخر سؤال وعليكم الاجابة دا لو لسه فى حد جوا المدونة ومخصماكم لمدة شهر
دا لو قدرت يعني يلا ربنا يسامحني
اللي يلاحظ اي اخطاء يطنش لسه هاراجع كمان :)

  • Digg
  • Del.icio.us
  • StumbleUpon
  • Reddit
  • RSS