ربنا يكرمه ولون التاج دا هايخليني أجاوب على التاجات اللي فلت منها قبل كدا
يالا ربنا يسترها بس أستحملوا بقى لاني من طبعي يأما اسكت خالص يأما أتكلم
خالص خصوصا على النت يالا الله المستعااااااااااااااااان نبدء الاجابات
قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟
والله انا مافهمش فى التاريخ اوي بس انا قرأت قبل كدا عن الخلفاء ومنهم
طبعا عمر بن عبد العزيز واللي عرفته عنه
انه تفرغ لإقامة الحق والعدل وإشاعة الخير والسلام فى ربوع البلاد الإسلامية
،ورفع المظالم عن الناس، وعمل على إنصاف كل من ظلم فى عهود سابقيه
من بنى أمية، وعوض كل من حرم، واعاد عهد جده "عمر بن الخطاب"
الخليفة العادل الذى ملأ الدنيا عدلا، وكان بيتشبه بيه فى ذهده، وتقشفه،
وإيمانه بالله، وتمسكه بكتابه، وسنة رسوله صلى الله عليه وسلم
وكان بيشجع الناس على مكارم الأخلاق، وكان بيفرض العقاب الصارم
على أى عدوان مهما صغر وحقر؛ علشان يقضى على الفساد مش ينشره زيادة،
أول أولوية فى حياتك عيلتك ولا شغلك ولا اصحابك؟
طبعا عيلتي ومش كلهم كمان هما بس حضرة الناظرة والدتي ربنا يخليهالي ويباركلي فى عمرها
وسي السيد احمد اخويا ربنا يجوزه بقى قريب علشان ارتاح شوية من دور امينة اللي شغالهولوا ده
بعد كدا بقى اصحابي ولسه مفيش شغلي دي ممكن نقول دراستي وشغلي بس مش الدنيوي يعني
ايه أكتر حاجة بتحبها فى رمضان ؟
يااااااه رمضان وحاجة واحدة ماتمشيش بس انا ممكن اقول ان اكتر حاجة كنت بحبها ارتباطي بناس معينة
وعلاقتي بيهم اللي بحاول اخليها تستمر على طول بس ربنا ييسرلي الحال
اوصف أجمل فطار ممكن تفطره؟
دا على اساس ايه رمضان ولا دلوقتي ؟ عموما انا قولت قبل كدا موضوع
دا مش بيفرق معايا وذكرت السبب
فى تاج قبل كدا وبعدين انا فى تلت حاجات بشجعهم فى حياتي وهما
قلة الاكل
قلة الكلام
قلة النوم
هاتقولولي وعايشة ازاي هاقولكم فى احسن حاااااااااااااااااال والحمد لله بس ربنا يثبتنا
لكن لو هاجيبها من ناحية تانية اهم حاجة فى الصحبة وخاصة لو بنتكلم على رمضان احلى فطار
كنت بفطره مع الناس اللي قولتلكم عليهم قبل كدا. واللي اكتشفت ان انا اللي كنت محتاجالهم مش العكس
لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
اولا لو طلبوا مني احكم حد هارفض طبعا لانه لايجوز (لعن الله قوما امتهم امرءة) يرضيكم احكمهم
واحل عليهم اللعنة مش يبقى حرااااام ومش محتاجة اتاكد اني حاكم عادل او لأ لاني قولت مش هاحكم من اساسه
ايه اللى بيبوظ الحكام .. نفسهم ؟ ولا الشعب ؟ ولا الحاشية المقربة ؟؟
الحكام ربنا يهديهم هداية من عنده طبعا كل دا اولا نفسهم وطمعها فى الدنيا ونعيمها
ثانيا الشعب بضعفه واستسلامه للي بيحصل والسلبية اللي خلاص بقت نمط حياتهم العادي
وثالثا الحاشية المقربة بنفاقها وحبها للدنيا
مين أكتر اعلامى مصرى بتحترمه ؟
والله ايام ماكنت بتابع الاعلام ماكنتش بشوف حد يحترم او لو كان فيه حد يحترم ماكنش بيبان كالعادة
ودلوقتي لله الحمد عايشة فى حالة جهل اعلامي ربنا يديمها عليا يارب ويحفظها من الزوال لكن مايمنعش اني
بسمع عن ناس كتير كويسين لكن انا شخصيا ماعرفهمش ولذلك ماقدرش اذكر حد معين
قريت ديوان "........." صاحب بلوج ".........." عن دار "......." ولا لسة ؟؟
لو كنت قريت ايه اللي هايحصل؟ ولو لسه ايه اللي هايحصل؟اعرف وبعدين اجاوب وبالمره اعرف النقط دي
كان فيها ايه اكيد مش فيل يعني مش عارفة ايه التاجات دي اموت واعرف اللي اخترعها
لو ممكن تشتغل شغلانة تانية كنت تتمنى تبقى ايه ؟؟
هو انا لسه ماشتغلتش بعد التمهيدي ان شاء الله لكن لو هاتمنى
شغلانه غير اللي هاشتغلها ان شاء الله اتمنى اني اكون عامله فى
دار مسنين وعامله مش مشرفة ولا مديرة حتى لو انا اللي عاملة الدار دي
علشان اخد بالي من النزلاء واقضيلهم كل طلباتهم
وكمان اقضي معاهم اكتر وقت ممكن ماتتخيلوش بحب السيدات كبار
السن قد ايه ومرتبطه بيهم لدرجة اني احيانا بفكر زيهم
ايه تانى بلد تتمنى تعيش فيها بعد مصر ؟؟
دولة تانية يعني.؟ لا انا لا أرضى بغير مصر بديل وماتمنيتش اني اعيش
فى غيرها ابدا ولو حصل هايكون غصب عني اكيد
اوصف ترتيبات اجمل فرح ممكن تحضره ؟
امممممممم ماليش انا فى نظام الافراح ده حتى الاسلامي دانا حتى اصحابي بروحلهم فى اليوم اللي قبل الفرح
اللي بيسمه الحنة وماعرفش ليه برضه بيسمه كدا. بسجل حضور وامشي على طول حتى فرح اخويا قرب
ومش عارفة هاحضره ازاي دانا بفكر ماحضرش فرحي دا اذا وافقت على مبدء الزواج من اساسه وقالولي هانعملك فرح
وبعدين مش فاهمه يعني هي الناس عايزة ايه بعد الموضوع
ما تمم بخير زي مابيقولوا مايعرفوش يفرحوا يعني غير بهيصة
وكلام من دا طبعا بعد الكلام دا كله عرفته اني ماينفعش اقولكم على ترتيبات اي فرح انا لغيت الفكرة
نهائي اصلا. وعجبتني اوي اجابة الاستاذ عصفور
بتراعى كلام الناس والقيل والقال ؟؟ ولو اه او لا قول ليه ؟
لا طبعا وبالثلث كمان لان ببساطة لو اه يبقى عمري ماهمشي بما يرضي الله ابداااااا
وبعدين كل انسان بصير على حالة وعارف كويس ان ربنا مطلع عليه اولى بقى اننا نركز فى
علاقتنا بربنا ونسيبنا من البني ادمين اللي زينا واللي منهم شياطين الانس اللي عايزة تبعدنا عن الطريق الصحيح
صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
هما الناس فى الوقت دا ماكنوش سعدا يبقى ليه انا ماكنش سعيدة يعني
.وبعدين صعب اوي نربط بين سعادتنا وبين اشياء
صحيح ليها اهميتها لكن مش لدرجة انها تقيم حياه او تهدمها دي
كلها كماليات زايدة ونعم ربنا هايحاسبنا عليها اكيد
السعادة هى ..؟
قيل للسعادة اين تسكنين؟...................................قالت فى قلوب الراضين
قيل فبما تتغذين؟.......................................قالت من قوة ايمانهم
قيل بما تدومين؟.......................................قالت بحسن تدبيرهم
قيل فبما تستجلبين؟..............قالت ان تعلم النفس ان لن يصيبها الا ماكتب الله لها
قيل فبما ترحلين؟................قالت بالطمع بعد القناعة
وبالحرص بعد السماحة وبالهم بعد السرور وبالشك بعد اليقين
عندك أمل ؟ اسبابك ؟
وليه لأ الحمد لله الامل فى الله كبير بس فعلا زي ماقال الاستاذ عصفور فى حاجات لابد وان ينقطع فيها
الامل او بمعنى اصح مانضيع وقت فى التعلق بيها
لما بتحب تهرب من كل شئ بتروح فين ؟؟
والله هو غالبا انا بقعد لوحدي وفى الاوقات دي بقفل على نفسي غرفتي وافضل اكلم نفسي شوية وبعدين
علشان انسى اي شىء ممكن اجبر نفسي على حاجة معينة اعملها بتكون طاعة يعني الحمد لله بس بقالي فترة كدا
ليه صديقة قريبة مني اوي عمرها حوالي 8 شهور كدا فى الأوقات دي بروح اخدها من ماماتها والست مابتصدق الحمد لله
وافضل اتكلم معاها والاعبها وهي تفضل تضحكلي وطول ماهي بتضحكلي
انا بنسى كل حاجة ونفضل على الحال دا لحد ماتنام مني
امتى اول مرة خدت فيها نفس طويل وقلت ياااه انا فعلا كبرت ؟؟
والله انا محسيتش بالموضوع دا غير لما بدءت احس بالمشاكل اللي حواليا
وللاسف كان فيه مشاكل يعني اكبر من سني اوي
بس الحمد لله كل شىء بيعدي وكمان بحس اني كبرت لما حد اكبر مني
ييجي ياخد راي فى اي موضوع مهم لكن رغم كل دا الناس مش محسساني بكدا
ابدا حتى فى البيت دا اخويا كل ماعدي من جنبه فى البيت يقولي
اركني على جنب ياشاطرة حتى لما يشوفني خارجة يقولي اوعى تمشي فى وسط الناس
احسن حد يفتكرك لقمة يركنك على جنب ولما يكون بيعمل
شغل على الاب توب احب اروح اتفرج عليه يقولي امشي ياماما
اللعبي بعيد اروح اشتكي لماما وقولها شايفة احمد بيقولي ايه
تقوله ليه بس تقول لاخت كدا معلش ياحبيبتي ماتزعليش تعالي اللعبي جنبي هنا
.دا حتى الناس الغريبة مش بتصدق اننا خلصت الكليه وبحضر دراسات عليا كمان
بالزمة حد يتعامل المعامله دي ويحس انه كبر مش عارفة ايه الظلم دا
بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
امممممممم ليه كدا طيب انا هابدء من الجزء التاني فى السؤال والله شعوري
بيكون شفقة على حالهم وخصوصا لو ست
وهي بكدا اصلا خرجت عن كونها ست من اساسه ومش هاتكلم فى النقطة
دي كتير وبالنسبة للرجال انا بقى بعتبر
التدخين دا اكبر دليل على ضعف شخصيتهم لان اللي يسيب مجرد شىء
زي السيجارة تتحكم فيه يبقى غير قادر على انه يتحكم فى
اي امر والواحد ليه كذا موقف مع المدخنين ربنا يهديهم خصوصا فى المواصلات
وانا للاسف مريت بفترة صعبة
وكنت بنزل القاهرة للمتابعة ولما والدتي او اخويا كانوا بيبقوا
معايا كانوا بيعرفوا يتصرفوا فعلا لاننا اي دخان
ممكن ينزل نسبة الهيموجلوبين فى الدم عندي بسرعة غريبة
لكن لما اكون لوحدي انا من النوع اللي استحاله ادخل فى حوار مع اي حد غريب
وخاصة الرجال بس اخر مره حصل معايا فيها موقف زي كدا
كنا اليوم اللي قبل رمضان على طول
وكنت نازلة القاهرة ولوحدي فافيه رجل وكبير فى السن مالقاش غير المكان
اللي جنبي يقعد فيه واول ماقعد قال بس انا كدا مش هاينفع ادخن
انا عارف الحريم طبعا انا كان المفروض فعلا اقوله يطلع مكان تاني لان
اننا فعلا مش هاستحمل الدخان بس سكت وياريتني ماسكت
اول مالعربية طلعت لقيته بيطلع السجاير طبعا لو سيبته انا لوحدي يعني لو
حصلي حاجة مش هلاقي حد يساعدني فاقولت بصوت غير مسموع
لو سمحت السجاير بتتعبني طبعا ماسمعش عليت صوتي شويه لقيت
الراجل بصلي وماتعرفوش الصوت دا طلع منين قنبله انفجرت فى
وشي (ماهو دا اللي قولنا عليه من الصبح انا قولت ماقعدش جنب حريم علشان كدا
عارفين انتوا الصعايدة لما بيتعصبوا .تعرفوا
لو الشباك اللي جنبي كان مفتوح كان زماني بره العربية من الخضة
وانا بخاف فعلا يعني اي حد يزعق فيا ممكن اعيط فيها .الناس طبعا فضلت تهدي فيه
دا على اساس انه انهار ياعيني وانا فضلت طول الطريق ادعي
ربنا يهديه وعندنا المسافة من بلدنا للقاهرة حوالي ساعتين ونص بحاول استغلهم
فى الدعاء بما ان دعاء المسافر مستجاب وفجأة سمعته بيقول يلا اكننا النهاردة اول يوم رمضان
قولت ياااااااااااه اخيرا افتكرت ربنا يهديك ياولدي وفضلت الطريق كله ادعيله هو بس
بيني ويبنكم كان خوف والله مش اكتر
وتشوفهم بقى عند اي كمين كلوا يطفي السيجارة كلوا يطفي السيجارة
خايفين على عشرة جنيه غرامه ومش خايفين على صحتهم
تعرفوا انا بتمنى ان اي مدخن عايز يتجوز مايلاقيش اللي توافق عليه
علشان يعرف ان الموضوع دا مش هايدمروا صحيا بس لا اجتماعيا كمان
واقتصاديا ودينيا فعلا ربنا يهديهم ويصلح حالهم معلش
رغيت فى السؤال دا كتير بس بجد بعاني منه تقريبا يوميا
بتعرف ايدك اليمين من الشمال ازاى ؟؟
سبحان الله ايدي اليمين بحس انها بتتحرك من غير اشارة من المخ
لكن الشمال لكعية لازم المخ يزقها باشارة علشان تتحرك
الا ايه الاسئلة الغريبة دي؟
ايه اكتر الة موسيقية بتحبها ؟
الحمد لله مفيش ومش بسمع اصلا لا موسيقى ولا غناء حتى بفضل الاناشيد اللي بدون معازف
فى رأيك ليه الذوق والنخوة اتعدموا ؟
لا هما ماتعدموش هما ممكن يكونوا قلوا لانهم لو اتمنعوا يبقى هانعيش فى
غابة بمعنى الكلمه ربنا بس يحافظلنا على الشويه اللي فاضلين
ايه الحاجة اللى لو حصلت لك حتبقى سعيد اوى ؟
طيب هاستأذنكم احتفظ بالاجابة لنفسي
تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟
ولا حاجة من دول الحمد لله على نعمة الفقر ربي احييني فقيرة وامتني فقيرة
دي كلها نعم هانتحاسب عليها وكشف الحساب مش ناقص الحاجات دي
البحر ولا النيل ؟
لا انا بخاف من الميه عامتا بس ماتقولوش لحد
مركب ولا طيارة ؟
لا دا ولا دا لو فيه جمل وهودج زي زمااااااااااااان ياريت
مجنون ولا عاقل ؟
اممممممم انتوا شايفين اييييييه؟ انا شايفة ان الاتنين عندي شغلين كويس اوي بس ربنا مايوريكم
تأثير الاولنيه بيكون ازاي لي تصرفات لاتوصف بغير انها تصرفات جنان فعلا بس ماتقلقوش فى الغالب يعني عاقلة
تقرا كتاب ولا تتفرج على فيلم ؟
طبعا كتاب هو انت ممكن تلاقي كل اللي فى الكتب فى افلام؟ لا طبعا ممكن العكس كل اللي هاتلاقيه فى الافلام
ممكن ببساطة تلاقيه فى كتب دا على الافلام اللي ليها فكرة وموضوع وبعدين انا نسيت اختراع المفسيديون من
زمااااااااااااااان
تمرر التاج ده لمين ؟
انا اللي هامرر برضه شكل الناس كلها اتمررت خلاص بالتاج دا اصدي اتمررلهم يعني بس ممكن
امرره لبنت ابيها ظبط دماغك معلش بلدياتي بقى ومين تاااااااااني
معلش طولت عليكم علشان تحرموا تبعتولي تاجات تاني انا بقولكم اهو
