فى يوم كنت ماشي فى الشارع والدنيا زحمة خالص
لقيتها واقفة زي الملاك ولفتت انتباهي خالص
ومش عارفة تعدي الشارع وماحدش بيساعدها خالص
قولت ياواد روح ساعدها وعديها تلفت انتباها خالص
وشوية والكلام خدنا واتعرفنا على بعض خالص
وفى اسبوعين كنت مدهول وقولتلها انا معجب بيكي خالص
قالتلي روح كلم بابا وانا موافقة خالص
وروحت لابوها وفى شهرين كان الموضوع خلص خالص
واتجوزنا وقضينا شهر عسل حلووووو خالص
وفى اليوم الواحد وتلاتين الموضوع ابتدا يقلب خالص
كل يوم مشاكل واهلها بييجو والبيت بئا زحمة خالص
فات كام سنة وجبنا عيلين مش بيبطلو عياط خالص
وامهم مشغولة بصحابها وسيباهم ومش مهتمة بيهم خالص
طب وبعدين اسيب الشغل واقعد اغير للعيال اللي مبللاني خالص؟
ولا اجيبلهم دادا وتخلصلي على المرتب خالص؟
كام سنة والعيال كبرو ومصاريفهم ذادت خالص
اشي دروس واشي ملازم وحاجات كتير خالص
اعمل ايه بس ياربي وامهم مش بتبطل مصاريف خالص
شوية عند الخياطة وشوية عند الكوافير ولا بحسلها بتغيير خالص
فييين الي خطفتني بسحرها من كام سنة وشحورتني خالص
وبقيت اقوول ياريتني مامشيت فى الشارع يومها خالص
او كانت خبطتني عربية ولا كنت شوفتها ولا روحتلها خالص
انتــــــــــــــــــــــــــــــهــــــــــــــــــــــــــــــــــــــــــــى
انا كتبت الحكاية دي علشان الفترة دي انا تعبت خالص
الدنيا مالها كدا حالها اتشقلب خاااااااالص
اه والله مريت بتجربة عجيبة غريبة مريبة خالص
ربنا يقدرني واقدر احكيها لاني محتاجة لرئي ناس منكم خالص
لاني للاسف معنديش اي خبرة ولا هايبقى عندي ان شاء الله خالص
بس تقولو ايه هي الدنيا دي كدا اللي بيحاول يمشي صح فيها لازم يتعب خالص
بس على ميييييييييين يارب ثبتنا وارزقنا الاخلاص وابعد عنا الناس اللي معندهاش
حياااااء خالص .. بس كدا احسن انا متغاظة خااااااااااااااااااااااااااالص
اه صحيح اعذروني على قلة االزيارات والتعليقات بس بجد محتاسة الفترة دي خالص
ادعولي معاكم بئا وادعو لشباب اليومين دول ربنا يهديهم ويصلح حالهم
خاااااااااااااااااااالص كنت هنساها :)
30 comments:
يا هلا
فى الاول اتفكرته شعر خالص
:)
مش عارف يا ترى الكلام الى فى الاول ليه علاقة بالكلام اللى فى الاخر
ويا ترى الجواز لازم يبقى علاقة فاشلة
بالتاكيد لا
بس هى علاقة عشان تبقى ناجحة شايف انها عايزة مجهود كبير اوى
لانها زى اى علاقة وزى اى حياة عشان نبقى فيها سعداء لازم نوفرلها عوامل السعادة دى
المهم
ربنا يعين حضرتك وييسر امورك
ولا تغيبين عن التدوين كثير او قليلا خالص
:)
ننتظر دعاؤك ودعاء شكلتت
مش كل الزواج بينتهي كده
المشاعر تترجم إلى معاني أخرى
في رحمة الزوج وهو يمسح على رأس زوجته
في كف الزوجة وهي ترفع اللقمة لفم زوجها ...حتى لو إختلفت صورتها وإزداد وزنها واحمرت عيونها من السهر بجوار رضيعها...هو يحبها
في علامات القلق التي ترتسم على وجه الزوج عندما تتعرض زوجته للموت وهي تلد
وفي فرحة الزوجة بعودة زوجها عندما يغيب في سفر
في مجرد التواجد بمكان واحد...بلا كلام...ولا أشعار ولا أزهار...ولا قلوب متسلسلة
أسأل الله أن ينزل السكينة والمودة والرحمة على بيوت المسلمين وأن يجمع بين كل زوجين في خير
على فكره أسلوبك في التعبير عن فكرتك جميل خالص...خالص))
امام الجيل
ياهلا بحضرتك ربنا يكرمك
هو في نوع كدا من انواع الشعر سمعت
عنه قبل كدا ممكن يكون من النوع دا
اسمه شعر حلمانتيشي :))
طبعا حضرتك مش هاتسالني يعني ايه
علشان ماعرفش طبعا
صراحة حضرتك هو الكلام الاولاني حبيت اعبر بيه عن شوية حاجات لاحظتها الفترة اللي فاتت فى تفكير بعض الناس وازاي بيختارو وازاي بيبنو حياتهم بطريقة غلط وعلشان كدا حياتهم بتستمر او بتنتهي بطريقى غلط بردو
والكلام اللي بعد كدا حبة فضفضة على الماشي لاني مش عارفة احكي صراحة
موضوع الزواج طلع كبير اوي ومحتاج ناس تكون اد المسؤلية اصلا علشان ياخدو خطوة زي دي وزي ماحضرتك قولت بالظبط
انها علاقة علشان تبقى ناجحة لازم لها مجهود كبير ويبدو اننا هانتعب فى دنيتنا دي علشان ربنا يرزقنا بعلاقة ناجحة ومثالية كما نتمنى يعني
لان السعادة فعلا مهرها غالي اوي مع اني شايفة ان صعوبتها بس فى الاختيار
بعد كدا كل شىء بيتيسر من عند ربنا وهو الاختيار دي اللي هايتعبنا لكن الله المستعان مش عارفة الموضوع كبير فعلا
ونفسي اتكلم فيه باستفاضة بس مش عارفة لسه ابدء منين بالظبط لاني مش متعودة اتكلم فيها بس يبدو انه لازم وحتما ولا بد من كتر اللي بشوفه واللي لسه هاشوفه فادعوات حضرتك معانا
وجزاكم الله خيرا على دعواتك وان شاء الله بحاول والله ماغيبش بس بيكون غصب عني
والاخت شكلتت والله نفسي ابعتها لحضرتك شوية دي طلعت خطر على مستقبل الامة
شبطت فيا مرة اخدتها معايا المعهد ولا شيخ شرح محاضرته بسببها :))
عموما هابلغها السلام والتوصية بالدعاء وحضرتك كمان ادعيلها علشان هاتختم ثلاث اجزاء بكرة ان شاء الله
(ام البنين)
ياهلا بحضرتك نورتينا
اد ايه كلام حضرتك جميل واتمنى
كل الناس تحس بقيمته وبان ادي ايه كل دي احاسيس جميلة لو اتوجدت بين اتنين
كل مصاعب ومشاكل الحياه هاتهون
بس انا المشكلة اللي قابلتها هي التوافق بين اتنين ان يكون فعلا الشخصين مناسبين لبعض فى تفكيرهم او مشاعرهم
يعني لاحظت ان كل شاب عايز وعايز وعايز فى اللي بيتقدملها طيب وانت عندك ايه تقدمهولها مش بيفكر فى كدا
لا هو شايف انه مناسب ومايترفضش لمجرد انه ماديا كويس اوي
وانا شايفة ان الماديات دي اخر حاجة
اهم شىء التفاهم والحب وان ماكنش الاتنين هايعينو بعض على طاعات زيادة
او على الاقل يثبتو يبئا بلاها طالما حد منهم هايضعف التاني ايمانيا
معلش لخبط فى الكلام شوية لاني مش عارفة ارتب افكاري اصلا للخبطة الموضوع جوايا بس ان شاء الله احاول ارتبه
واهلا بحضرتك مرة تانية شرفتيني
وربنا يبارك لحضرتك فى البنين ويرزقك البنات ويجعلهم زرية صالحة اللهم امين
بالتاكيد عملية الاختيار هى اهم واول عامل حتى من اللطيف انه من حسن لبر بالابناء حسن اختيار امهم
بس عملية الاختيار بالرغم من اهميتها بس برضه لازم متخدش اكبر من حجمها
كان فيه واحد بيقلى ان اخت عرض عليها اكتر من تلاتين اخ ومقبلتش
:)
وكلهم اخوة طبعا مش معنى اخ انه يكون صالح وخلاص
بس كل واحد بيبقى عايز مواصفات تناسبه بس يبقى واقعى فى اختياره يعنى ميحطش مواصفات وشوروط هو نفسه ميقدرش يطبقها ويطلبها من الناس
يعنى يبقى واقعى وفيه عنده مرونة ومدام اختار حد عنده الاساسيات ومستعد انه يبقى احسن يبقى افضل
من الى وصل لمرحلة شايف فيها انه كويس
يعنى الموضوع مهم وكبير بس ساعات الواحد بيحط خيالات فبيصعبوا على نفسه
بس سبحان الله لما ربنا بياذن كل شئ بيمر وبيعدى وبنلاقيه سهل
يلا دنيا ولا دايم الا وجه الله
بس مهم الواحد يشوف التجارب الكويسة برضه زى ما بيشوف كتير التجارب السيئة عشان يتعلم منها
ويحقق فى نفسه قبل ما يطلب من غيره الشروط والمواصفات دى
سلامى الى شكلتت
امام الجيل
يااهلا بحضرتك
انا متفقة مع حضرتك فى كل دا
وفعلا مش لازم ندي كل الاهمية للاختيار
بس انا بركز عليها لان بيتبني عليها
حاجات كتير بعد كدا وزي ماحضرتك ذكرت
يعني الاخت اللي ماشاء الله تلاتين اخ
يعني دا عيب فى حقنا حتى ان يبقى تلاتين
من الاخوة عندنا مافيهمش يعني المواصفات اللي ترضي الا لو كانت هي فعلا حاطة مواصفات خيالية هما الاخوة بشر بردو بس طبعا بتفرق اننا المفروض
تفكيرنا بيكون اساسه هو بناء الاسرة المسلمة وعلشان كدا بنركز فى الصفات الاساسية بس كمان صراحة انا عرفت وشوفت تجارب كتير لناس ولاخوة بيختارو بناء على صفات عجيبة يعني لدرجة الموضوع عمل مشكلة كبيرة يعني مش عارفة اوضح بس يعني حاسة والله اعلم حضرتك هاتفهم انا اقصد ايه لاني مش عارفة اوضح بس بجد احنا كااخوات بنعاني منه حاليا ومن ضمن اللي عانيت منه ان البعض فعلا زي ماحضرتك ذكرت بيحط صفات معينة ومش بيتنازل عن اي صفة فيهم ولما بيختار ييجي الطرف التاني علشان يشوف فيه هو الصفات اللي يتمناها مايلاقيش وسبحان الله لما الناس تيجي تتنازل شوية وتقول مفيش مشكلة نعين بعض تلاقيه هو ييجي على اهيف صفة واللي فعلا مالهاش لازمة لناس كتير ويقول لا خلاص مش هاتنفعني او مش هاينفعني بعد مايكون الطرف التاني قدم تنازلات يعني هاقول لحضرتك
حصل مثلا ان حد راح اتقدم لاخت حضرتك وبما انكم ناس بتراعو ربنا حبيتو تسهلو عليه لان ربنا امرنا بكدا يسروولا تعسرو وعلشان مايقولوش الاهل هما اللي بيغلو علينا وتبسط الامور خالص وييجي هو بعد كدا اول حاجة يقولها هما مالهم كدا ماصدقو ولا ايه
طب مالهم يعني بيسهلو الدنيا كدا
لا اله الا الله يعني لا كدا عاجب ولا كدا عاجب طيب خلاص بلاها
انتو غصب عنكم علشان ماتتكرش المشكلة جه حد تاني بعد كدا وحبيتو بئا تعرفوه قمية بنتكم فى البداية بس جس نبض يعني يقوم يقول لا هما مالهم كدا مصعبين الدنيا طيب وقتها بئا هاتعملو ايه يعني هاترضو مين ولا مين وبعدين فين اساسا حتة انك شاري الشخص دا وقابل تكمل معاه حياتك بكل مافيه وربنا يعينكم وتساعدو بعض على التغيير للاحسن اصل احنا مش ملايكة كل اناس وليه عيوب ومميزات مش عارفة بصراحة دا مثال بسيط
انا بس اللي عايزة اقوله ان المفروض هما فى البداية بيكونو اتنين بعد كدا بيكونو شخص واحد يعني المفروض يكملو بعض فى كل شىء فى صفاتهم فى طباعهم فى كل شىء يعني اللي عنده نقص فى حاجة التاني يكملها لكن لو صفاتكم متكررة هاتستفيدو ايه يعني
وبعدين الدنيا مش ماديات وبس
انا طولت بس علشان عايزة اوصل لحضرتك حاجة انا مش عارفة اتكلم فيها للاسف
بس يارب حضرتك تكون فهمتني وخصوصا فى نقطة الاخوة والاخوات دي اللي فيها كلام كتير اوي بس لاسف مش عارفة اوضحه لان لازم يكون في اتفاق فى الفكر كمان لو ربنا بس يقدرني احكي اللي حصل والله الناس هاتستعجب على اللي احنا بقينا فيه دا الله المستعان
وعند حضرتك حق مش لازم نبص بس للتجارب السلبية بس هي جات معايا كدا بصراحة مريت بفترة توهان ومشكلة لما يكون الانسان بيفكر لوحده ومحدش فاهمة او كدا يعني لكن الله المستعان
بييجي وقت الاستخارة ولما بييجي النصيب زي ماحضرتك قولت هو ربنا يسهلها من عنده سبحان الله
وربنا يارب يرزق كل الشباب والبنات بازواج صالحين وزوجات صالحات ويعينا على تاسيس بيوت مسلمة صح
والاخت شكلتت جمبي اهي وبتسلم على حضرتك ماله يعني لما نقعد نربي فى زهروات واشبال وخلاص هما دول المستقبل ولا زواج ولا غيره الواحد هايرجع للعقد تاني ولا ايه ربنا يستر :)
انا تانى
اولا مش معقول ان تلاتين اخ مرة واحدة او اكتر هيبقى فيهم عيوب
بس الاخت دى كان حاطة مستوى معين مش عايزة تتنازل عنه سواء مثلا فى القرآن او فى العبادات او فى العمل الدعوى يعنى ميقلش عن مرشد
:)
وحاجات كده تعرفى حضرتك ممكن يجيلها حد كده بس مثلا تبقى فيه صفات تانية سيئة زى اى بنى ادم ساعتها بقى مش هتتذكر كل الصفات الجميلة دى
وانا بكلم حضرتك مخصوص عشان العقدة
:)
عشان تجارب الاخرين الفاشلة متاثرش على حضرتك سواء دلوقتى او فى المستقبل اصل خطيبة اخويا عايشة برضه فى الهم ده خايفة من كتر ما شافت من تجارب الناس فاذا مرة اتكلموا واتضايقوا شوية تقولوا شفت اديك هتبقى زيهم
:)
كده بقى يبقى الواحد عايز يجيب الهم لحد عنده وخلاص يعنى كما قيل تعيس اللى يبقى طول عمره حزين على الماضى ومتوجل من الحاصر ومهموم على المستقبل
سينا ايه كده عشان منعش فى حزن طب المستقبل ده بتاع ربنا هنشيل همه ليه
وبعدين اى علاقة ناجحة فى الدنيا لازم تبقى عايزة مجهود يعنى كل ما تنام وتهدى يحاولوا يرجعوها احسن وانشط بس المشكلة ان الكثير من الازواج والزوجات بتلهيهم الدنيا والاعباء انهم يعيشوا حياة كويسة يعنى يبقى الحل قدامهم وهما عاجزين انهم يوصلوا ليه
او يكون كل طرف منتظر من الطرف الاخر اسعاده وميفكرش ابدا انه هو اللى يبدا او ليه مش هما واحد زى ما كانوا بيقولوا اول الزواج
لما قلت لحضرتك انها محتاجة لجهد عشان تنجح فده زى اى علاقة يعنى لو حضرتك مهتمتيش بشكلتت مثلا وكان كل علاقتك انك تحفظيها فى المسجد وبس وتشوفيها مرة او اكتر فى الاسبوع كان هيبقى فيه العلاقة دى بينكم
ولا كانت هتدعيلى :)
اعتقد وجهة نظرى وصلت
نسالكم الدعاء بقى
امام الجيل
انا تاني واهلا بحضرتك تاني
انا متفقة مع حضرتك فى كل دا
ووجهة نظر حضرتك وصلت
انا بس كان في بعض الاسباب الموجودة
هي اللي خلتني اتكلم فى الموضوع دا بس انا للاسف مش عارفة اوضح اللي عايزة اقوله لكن خير
وبالنسبة لاخت صاحبة التلاتين يعني
لما هاتاخد واحد بكل الشروط دي امال هي هايكون تاثرها فى حياته ايه
يعني لما هاتاخدة مش اقل من مرشد هي هاتوصله وهاتعينه يوصل لايه يعني مش فاهمة بس نرجع نقول كل واحد وطريقة تفكيره بس كمان في نمازج بتقبل بالعكس
يعني بتقول لا انا عايزة شخص ان ماكنش هايعيني على الثبات مايعينيش على اني ااقل عن المستوى الايماني او الدعوي اللي انا فيه يعني مرة فى حلقة لبنات الجامعة بنت بتقولي هو لو اخت جالها حد اقل منها دعويا وايمانيا وكل شىء وحصل نصيب بينهم دا يبقى ابتلاء او لو حصل العكس مع اخ يعني فانا قولتلها وليه مايكونش ربنا وضعك سبب انك تعينيه يكون افضل وبعدين اي شخص مهما كان اكيد جواه خير يعني امال احنا وظيفتنا ايه اصلا بس للاسف بردو هو الاخوات من كتير اللي بيحصل صراحة تفكيرهم بيتشتت كتير
يعني مرة اخدت جالها اخ علشان هي بتخفظ القران وهاتختم وهو مش حافظ بس عايزها تعينه وتساعده قالت وماله بعد ماشفاها تخيل حضرتك رجع فى كلامه ليييييييييييه ال ايه يعني طلعت رفيعه:)) يعني مش عارفة صراحة
نموذج زي كدا تفتكر حضرتك هاياثر على تفكير اخت زي دي بايه غير بالسلب
عموما هي النماذج مفيش اكتر منها
وزي مافبه كدا بنتمنى يكون فيه النماذج الايجابية خصوصا بينا احنا كاناس اصحاب فكر بيقوم اساسا على بناء اسرة مسلمة بداخلها مش خارجها فقط والله المستعان
وان شاء الله مفيش عقد هي اتفكت لاسباب اقوى من ان تجارب زي دي ترجعهاان شاء الله بس ربنا يعينا يعني
انا حتى سبحان الله كل ماتيجي قدامي مشكلة زي كدا اروح فى ورقة كاتبة اسباب المشكلة وعواملها ولازم بلاقي حل
بس لو فعلا الطرفين حاولو كل واحد يتنازل فى سبيل ارضاء التاني شوية
وديما سبحان الله بطلع العيب عند النساء
والحل بردو بيكون عندها
بس فعلا زي ماحضرتك ذكرت هموم الدنيا بتلهيهم عن الوصول لحل وكل انسان وليه طريقة تفكيره فعلا علشان كدا بيكون جميل لو الاتنين تفكيرهم متوافق ومكمل لبعضه
الكلام فى الموضوع دا ممكن مايخلصش بس صراحة في اسباب وعوامل كتير
لو ماتعبناش شوية فى التغلب عليها هانتعب زيادة للاسف
ونرجع ونقول وقت النصيب لا مفر
كل شىء ربنا بييسره من عنده
بس ندعي ان ربنا يهدينا جميعا
ويثبتنا ويرزقناالاخلاص فى كل شىء لوجه الله مش لانفسنا بس الدنيا ااقل من احنا نديها الاهمية دي كلها
وجزاكم الله خيرا يافندم ولاحرمنا الله من نصائحكم دئما وحضرتك كمان ادعيلنا معاك بقى :)
انت حاجة حلوة خالص
ووحشتينى خالص خالص
ونفسى أكلمك خالص
وبتتكلمى عن حاجة مهمة خالص
أنا شايفة ان الاختيار الصحيح هو أساس الزواج الناجح
الاختيار اللى بيتم على أساس الدين الأول
ثم التوافق بين الشخصين والقبول بينهم
وأنا زيك بالظبط بشوف العجب فى المواصفات اللى بيضعها الولاد والبنات لشريك حياتهم الاخر
واللى يغيظك ان العدوى انتقلت لصفوف الملتزمين اللى لازم يكون أساس اختيارهم الالتزام ثم الاتزام ثم الالتزام ثم الأشياء الأخرى
تحياتى لأسلوبك الجميل خالص
وخلينا نشوفك وحشانى مووووووووووووووووووووت خالص
مفتقدة الحديث معاك
دمت فى حفظ الله
دعوة لصيام يومي الأثنين 24/11 - 1/12 والدعاء لإخواننا في غزة والتبرع بثمن وجبة الافطار لأهالينا في غزة
والي عايز يشارك يسجل معانا في حملتنا بوضع البانر في مدونته والمشاركة في الجروب ويدعو الناس كلها للمشاركة معانا
هدفنا 1.000.000 مسلم يدعو ويتبرع لاخواننا الرقم سهل ونقدر نحققه بس عايز تعاون وجدية
والي ميقدرش يصوم يوم يصوم التاني بس لازم نصوم من اجل اخواننا في غزة
البانر علي المدونة
www.bahebalhorea.blogspot.com
http://www.facebook.com/group.php?gid=37720052122
ايه الجمال ده
انتى جميله خالص
وحببتينى فى الزواج خالص
مع انى متزوجه من زمان خالص
وبس بقى علشان انتى عدتينى خالص
هههههههههه
بسم الله الرحمن الرحيم
كل عام وانتم بخير
الموضوع بقدر ما فيه من الفكاهة بقدر ما هو واقعي الي حد كبير لكني اعتقد اننا لو قمنا بالنظر اليه من وجهة نظر ايمانية سنجد ان السبيل الوحيد للتغلب على هذه الحيرة هي التوكل على الله والرضا بالقضاء..في الحقيقة الواحد بينسى كتير الكلام ده وكتير بيفتكره وميقدرش ينفذ عموما ادعو الله لي ولكم بالتوفيق والسداد واكرمكم الله واراح بالكم
بنات افكارى
السلام عليكم ورحمة الله وبركاته اجمل التهانى بمناسبة عيد الاضحى المبارك اعاده الله عليكم وجميع الاهل بالخير والبركة ، وجعلنا واياكم من الملبين فى العام القادم
والسلام عليكم ورحمة الله
بنات أفكارى
بنوتى الجميلة خالص
و بتقول حاجات حلوة خالص
و رغم انها محتارة خالص
لكن متأكدة إن ربنا معاها خالص
و عجبنى الحوار بينك و بين امام الجيل خالص
لأنها بتوضح أمور مهمة خالص
و أفكار لازم تتغير خالص
كل سنة و أنت طيبة خالص
و أتمنالك عيد سعيد خالص
بس بئا عشان تعبت خالص
هههههههههههههههه
تحياتى خالص خالص
أول مرة ادخل المدونه دى خالص
لكن فيها كلام من الآخر خالص .
المهم انه خارج من القلب خالص
ههههههه
جميله جدااا .. وفكرتنى بشعر اشرف عبد الباقى فى راجل وست ستات .
هههههههههه
كل وسنه وانتى طيبه يا قمر
مدونه رووعه بجد
أجمل تحيه لكِ اختى
كل سنة وانتي طيبة خالص
ويا رب اسمع عنك قريب اخبار حلوة خالص
:)
هههههههههههههههه
حقيقى حاجة ظريفة خالص
ربنا يرضى عنك خالص و خالص و خالص
و كل عام انتم بخير خالص
مش اى خير
ده خير خالص خالص مالص
د.حماس
تدوينه جميله خالص
وكلمات رائعه خالص :)
الؤلؤة المكنونة
حبيبة قلبي خالص
انتي احلى خالص خالص
ووحشتيني اكتر خالص وبتصل بيكي
مش بتردي خالص بس عارفة الامتحانات
ربنايعينك ويوفقك يارب خالص
بس ان شاء الله هاكلمك واحتمال
اجيلك كمان قريب انتي تؤمري خالص :)
وطبعا زي ماقولتي الاختيار اهم حاجة
والمشكلة بئا فعلا فى العدى
اللي انتقلت لصفوف الملتزمين وكله على دماغنا لكن لعله خير يارب
عارفة انتي طبعا وحكيتلك كل حاجة
ادعيلنا معاكي بئا وخلي بالك من نفسك ومذاكرتك واشوفك على خير يارب قريب وتكوني فوقتي خالص وانا كمان
خاااااالص :))
هاني جابر
اهلا بحضرتك وتم التنفيذ يافندم
جزاكم الله خيرا وربنا يتقبل
وينصر اخوانا ويخفف عنهم ويحنن قلوب
العالم كله عليهم
وربنا يجعل كل مجوهداتكم فى ميزان
حسناتكم جميعا واهلا بحضرتك مرةتانية
دنيتي الجميلة :)
ربنا يجمل دونيتك ديما
الناس اللي بلدياتي خالص
اهلا بيكي خالص خالص
واحمدي ربنا انك اتجوزتي وفلتي
الناس زمان غير دلوقتي خالص
ربنا يسعدك يارب ويجعلك زوجة
صالحة خالص ويرزقك بالذرية الصالحة
خالص اللهم امين ونورتيني ياقمر
ابو الحسن
اهلا بحضرتك يافندم
وكل عاموحضرتك طيب
وحقيقي التوكل على الله والرضا
بقضائه اهم شىء لكن زي ماحضرتك
ذكرت اننا اوقات ننسى واوقات
مانقدرش ننفذ لكن نسال الله السداد
وربنا يارب يرزق الجميع التوفيق
شكرا ليكي افندم
بيرم المصري
اهلا بحضرتك شرفتنا
وكل عيد وحضرتك بخير
وتقبل الله دعاؤك ورزقنا واياك
زيارة بيته الحرام اللهم امين
سول ويسبر
حبيبتي الجميلة خالص
انا اللي بنوتك بردو ولاانتي
يابكاشة خالص خالص :))
ودعواتك ديما ان ربنا يكون
معانا جميعا خالص
وفعلا الحوار انا كمان استفدت
منه وكنت محتاجاه خالص ربنا يكرم
الجميع يارب ان شاء الله ..خالص
:))
انا كمان صراحة تعبت خالص
ادي اخرة اللي يدخل خالص فى كل حاجة كدا :))
يلا بئا اشوفك بالليل بس مش خالص:)
ضي القمر
اهلا بيكي لاول مرة ويارب
ماتكونش الاخيرة خالص :))
المهم انها عجبتك خالص ونورتينا خالص
والحقيقة ماسمعتش شعر اشرف عبد الباقي
دا بس مش مشكلة مقبولة منك خالص :))
بنت ابيها
حبيبتي انتي خااااااالص
يارب وانتي طيبة وبخير خالص
وربنا يقدرنا ونسمعك اي حاجة
حلوة نشيد ولا حاجة :)))
ان شاء الله اشوفك قريب ونحكي
خالص :))
د. حماس
اهلا بحضرتك جدا خالص
وربنا يرضا عنا جميعا خالص
ويتقبل من حضرتك خالص ويارب يرزقنا
جميعا كل خير اللهم امين
حضرتك نورتنا خالص:)
م/الحسيني لزومي
وتقبل منكم يافندم
جزاكم الله خيرا
وشرفتنا بالزيارة
اقصوصه
انتي اجمل خالص
ربنا يكرمك ومدونتك
ماشاء الله وربنا مايحرمنا
من زياراتك خالص :)
ماشاء الله
كلام حلو خالص
Post a Comment