RSS

تاجات وكان واجب الرد

نظرا لبعض الظروف انا هاغيب لفترة عن المدونة مش عارفة اد ايه بس باتمنى من ربنا انها ماتطولش
وعلشان كده انا قولت اقضى كل ماعليا من متطلبات واوفي بكل ماعليا من وعود والحقيقة انا كان جالي تاجين
فى تاج من أخي امام الجيل ربنا يكرمه وكمان تاج من أخي مؤمن وانا بقولهم جزاكم الله خيرا على انكم افتكرتوا
مدونتي والحمد لله ان التاج بتاع اخونا مؤمن هو نفس احد التاجين بتوع اخونا أمام الجيل اصل ربنا حاسس بيه
وعالم اد ايه انا برد بصعوبه المهم نبتدي بقى
التاج الخاص بأخي امام الجيل
هل تحرص بصدق علي تجديد النيه قبل الدخول علي النت؟؟؟
لله الحمد لازم اجدد النيه قبل اي حاجة وخصوصا النت ولله الحمد موضوع تجديد النيه ده بالنسبة ليه من الثوابت
لان قبل مارجلي تتحرك لاي مكان عقلي بيتحرك ويزكرني بالهدف وبالتالي لساني بيتحرك بتجديد النيه توماتيكي توماتيكي
يعني نظرا للتعود والحمد لله
ما رأيك في جريده الدستور؟؟؟
بصراحة انا من بعد جريدة افاق عربية لا اتابع اي جرائد لكن اخواتي دائما بيشكروا فيها لكن الحقيقة
انا شخصيا ماقدرش احكم عليها لاني مش متابعاها
ما رأيك في شويه المدونات دي..(أنا إخوان..إبن أخ..حلم الحريه..مش حاسكت..جهاد المصري)؟؟
اه جه بقى وقت الاحراج الحقيقة انا زرت مدونة انا اخوان مره واحده. بس دايما بسمع عن
الاستاذ عبد المنعم ربنا يكرمه وبالنسبة لمدونة ابن اخ بامانة لاول مره باسمع عنها اما بقى مدونة
حلم الحرية انا دخلتها اكتر من مره واللي شدني ليها اسمها لان اول بوست ليه كان عن الحريه
ومدونة مش هاسكت برده اعتقد زرتها مرتين اما مدونة جهاد المصري للاسف برده لاول مره بسمع عنها
هل بعد قراءتك للإجابتين إللي فاتوا ..حسيت إن أنا أيه؟؟ولا تنسي الصدق.؟
هو الحقيقة السؤال مش واضح بس لو هاتكلم عن اللي انا حسيته انا بجد حسيت بالاحراج وحسيت
بالتقصير فى حق الغير بس والله غصب عني انا لسه مدونتي ان شاء الله يوم 13 هاتكمل شهر واحد
ولسه فيه مدونات كتير ماتعرفتش عليها رغم اهميته بس انا بعتذر وان شاء الله هاتبع اكتر بس ربنا يسهلي
في الفتره الجاية اللهم امين اما لو السؤال عن اللي انا حسيته عن حضرتك فالاجابة مش عارفة وهافترض ان حضرتك كنت تقصد بالسؤال خير من باب حسن النيه يارب كده بقى اكون جاوبت
هل تثق في جريده الدستور؟؟؟
فعلا التاج ده ماله ومال الدستور بس ماعلينا زي ماذكرت قبل كده انا لا اتابعها وبالتالي لا اكن
لها اي مشاعر ولا ثقة ولا غيره بس مره تانيه في ناس كتير بتثق فيها
أنا بحبكو في الله..فهل تحبونني...ولا تنسوا الصدق؟؟
معذرة اسمحلي احذف السؤال الغريب ده بس علشان مايتفهمش غلط
بس عموما زي مارسولنا صلى الله عليه وسلم قالنا انت مع من تحب فانا بقول لكل من يحب
النبيين والصديقين والشهداء جميعا اني احبهم فى الله وان شاء الله نحشر جميعا معهم في الجنة قولوا امين بقى
هل تعمل في السياسه والعمل العام أكثر من الربانيات والروحانيات؟؟؟
مين العاقل اللي يترك اي شىء يطغى على حق ربنا علينا بل بالعكس انا علاقتي بربنا ومسؤليتي الدعوية هي
الحافز ليه فى العمل السياسي ايام الكليه طبعا وفي العمل العام عامة حتى كمان في شغل البيت
هل الدستور تحب الإخوان,,ولا بتستغلها؟؟
الحقيقة ماقدرش اظن سوء في حد ماعرفوش بس انا هاقول انها على الاقل على حسب ماسمعت بتتكلم عن
الاخوان بحيادية سواء بقى كاستغلال او كا محبه انما الاعمال بالنيات واحنا مانعرفش نيات غيرنا ايه بالظبط
الحمد لله اول تاج خلص
التاج التاني وده هو هو اللي مررهولي اخي مؤمن ربنا يعزه وينفع بيه الامه
اسم مدونتك؟
اسم مدونتي على ماأذكر بنات افكاري
لماذا اخترته ..وماهي نيتك من وراء اختياره؟
الحقيقة انا اخترته على اساس اني من زمان بكتب مقالات وافكار وكنت ناويه انزلها بس اندمجت فى حاجات تانيه حسيت انها اهم
وكمان وانا بعمل المدونة ماكنتش لسه اختارتلها اسم فاهو ده اللي جه على بالي بعد اسم تاني بس عرفت ان فيه حد عامله
اما بخصوص نيتي فاهي كانت خير والله لاني كان نفسي فى اي وسيله اطلع فيها اللي جوايا بطريق غير مباشر يعني من
غير ماغير اي حاجة فى شخصيتي زى الكتمان مثلا وحاجات تانيه بس ماتشغلوش بالكم
هل فكرت في إغلاق مدونتك؟ والسبب؟
لااااااا طبعا اولا المدونة دي خلاص بقت جزء من حياتي وكمان ربطتني بناس محترمين وعرفتني بافكار ممتازة
والى الان لم تسبب لي اي شىء سلبي وكمان فيه ناس بتقدرني وتزورها رغم بساطتها تقولى بعد ده كله اافله
وثانيا انا لسه لحقت افتحها علشان اقفلها
صورتك في المدونة ورمزيتها ؟؟
الحقيقة الى الان لم اجد الصورة المعبرة وحاسة اني مش هلاقيها لاني
بفكر فى حاجة معينه ماعتقدش هلاقيها فى صوره
لماذا دخلت عالم التدوين من الاساس؟
والله قضاء وقدر وزي ماقولت قبل كده اهي حاجة اخرج فيها اللي جوايا من غير ماضطر للتغيير فى شخصيتي
جمله قيلت لك فى وصف مدونتك؟
الحقيقة مش فاكرة جمله بعينها بس بيفرحني دايما ان حد يقولي انه
سعيد بزيارة المدونة بحس اني ادخلت السرور على قلب مسلم واخدت حسنة على كده
وكمان بحب اوي لما الناس تدعيلي اي دعوه فى التعليقات
التعليقات بالنسبه لك ,اهميتها؟
التعليقات بتحسسني بوجودي وكمان بتعرفني اشياء فى شخصية كل معلق
بس كمان بهتم بالعداد بتاع الزوار وببقى مشغوله كام حد افتكرني النهارده
وكده يعني
احلى بوست كتبته ...ضع اللينك , ثم اذكر لماذا؟
يا فندم انا لسه مالحقتش يبقالي بوستات مهمة بس انا بحب بوست (محصول الكوسة فى بلدنا المحروسة) لاني بعاني منها
وحاسة انهم من ساعة ماراحوا يعملولي شهادة الميلاد وهما بيقولوا لازم وسطة المهم ربنا اقوى من كل شيء
أفضل بوست قرأته؟ وضع لينكه؟
مال الاسئلة كتيره كده ولا انا اللي اجاباتي طويله ماعلينا
افضل بوست قريته شوف حضرتك انا كل مدونة بادخلها مش بقرا اول بوست بس لاااااا لاني طبعا لسه جديده
باطلع على كذا موضوع المهم اني بخرج فى النهايه بحاجة عجباني جدا ولذلك فاهما كتير ومتنوعين وماينفعش
ان الواحد يفضل فيهم حاجة عن حاجة
أفضل مدونة قرأتها؟
برده كتير بأمانه فيه مدونات كتير بقت قريبة مني جدا ولازم اتابعها باستمرار
حتى لو مش فيها موضوعات جديده بس بدخل ازورها وامشي بنية صلة رحم وحاسة
ان ربنا فعلا بيديني على زيارتهم ثواب صلة الرحم ازاااااي دى حاجة بيني وبين ربنا بقى
حد يقدر يعترض
حد قل أدبه فى التعليق إيه رد فعلك؟
لا طبعا وان شاء الله مش هايحصل لان كل زوار مدونتي ناس محترمين
وبالبلدي كده ماتطلعش منهم العيبة ابدا وبقترح تشيل من السؤال كلمة قل ادبه دي او تغيره
علشان حاسه ان هى فى حد زاتها غلط
أسوأ بوست أسوأ مدون
الحمد لله لسه ماحصلش وشوفت نموذج زي كده
ولا بوست ولا مدون وعلى فكره انا شايفة ان السؤال ده ممكن
يفتح مجال للغيبة والله اعلم
هااااااااااااااااه ماقربناش ولا ايه انا اتكلمت كتير النهارده
هيحصل ايه لإيميلك لما تموت ؟؟
ان لله وانا اليه راجعون اكيد هايحصله نفس اللي هايحصلي بس انا كده هابدء
افكر بجد فى طريقة تجعله قيمه وتخليه يفضل حي مهما حصل نشوف الموضوع ده بعدين
اديت الباسورد لمين؟
ماحصلش الكلام ده بس شاكلي هاديه لحد قريب ربنا يستر
كانت إيه طبيعة علاقتك بيه؟
ولا حاجة والله العلاقة معدومة الى الان
انا حاسة اني فى تدريب على تحقيق رسمي وربنا يستر
اسمك؟
اااااااه رجعنا للاحراج تاني على العموم لو محدش عنده مانع
انا اسمي (صفاء) يافندم
المشهور بيه وسط اصحابك؟
والله هما كتير اصل اصحابي واخدين بالهم مني اوي
بس اكتر اسم هو صافي
شخصيتك نوعها إيه؟
ياجماعة والله مش بعرف اتكلم عن نفسي بس انا دايما اصحابي بيقولولي اني اهدى انسانة فى عالم
الهدوء واني مش بخرج اللي جوايا بسهوله واني طيبة زياده عن اللزوم واني ولا كفاية كده
السفر بالنسبة لك؟
الحقيقة انا كل سفرياتي الحمد لله داخل مصر من ساعة مادخلت الكليه والتنسيق طبعا انته عارفين
مايتوصاش فى حتة توزيع الطلبه على الجمهوريه دي وبعدين كمان مجال دراستي بيلزمه رحلات
كتير بس الحقيقة انا حبيت الموضوع جداااا لاني استفدت منه كتير واتعرفت على حاجات كتير
وبعتبروا من النعم اللي ربنا انعم عليا بيها
وقت فراغك بتعمل فيه إيه؟
الحقيقة بقضيه فى متابعة ورد الحاسبة بتاعي هاتقولولى كل وقتك هاقولكم معظمة
انا اصلي بغلب على مابلاقى العقاب المناسب لنفسي لما بكون مقصرة فى حاجة بس
مين لازم يكون فيه عقاب كمان حفظ القران ومراجعته بياخد من وقت فراغي بس مش كتير لانه من الاساسيات
اللي بعملها فى وقتي العادي
المود بتاعك؟
والله انا مودي طبيعي جدااااااا وهادي حتى لوفيه حاجة مضايقاني مش بتبان عليه غير لما
بتكون الحاجة دي تخص حد غيري يعني حد انا اتسببتله فى اي شيء بضايق جدا
وبيبان عليا اوي ومش بعرف اتعصب ابداااا
الصفات اللي أخدتها من بابا؟
وبعدين بقى فى الاسئلة دي
والله انا والدي ترك المسؤليه لوالدتى وانا عندي 12 سنه ومش متذكره ليه اي ذكريات
بس لما بابتسم او اضحك والدتي دايما تقولى انتي بتفكريني بباكي علشان كده وهي
زعلانه من حاجه استحالة ابتسم حتى ادامها علشان ماتزعلش اكتر وتبقى مشكله
ربنا يصلح حاله ويهديه اللهم امين
الصفات التي أخدتها من ماما ؟
ياااااااااااااه ماتعدش انا والدتي ادتني كل حاجة وانا خدت منها كل الصفات الجميله
يعني احيانا الناس بتحبني بس لانهم بيحبوها اخدت منها الحنيه وتحمل المسؤلية مهما واجهتني صعوبات
اخدت منها التمسك بالعادات والتقاليد اللي الشباب دلوقتي بيقولوا عليها موضة قديمة كمان علمتني لما
اشوف اي حد محتاج مساعدة اروحلوا ماستناش لما يطلب المساعده وحاجات تانيه كتير ربنا يخليهالي
اكتر ست حاجات بكرهها؟
هما كتير بس كفاية السته وهما مثلا
الاستسلام للظلم-اهمال الام لطفلها-النفاق-الحكم على الناس بالمظاهر
وكمان عدم الاحساس بالناس ومراعاة شعورهم
اكتر ست حاجات بحبها؟
دول بقى اكتر ومنها الاطفال-قيام الليل خاصة فى رمضان-الدعوه الى الله
الايثار-بحب قوي لما حد يطلب مني حاجة واقدر احققهاله-كمان بحب الستات الكبار فى السن
الانترنت بالنسبه لك؟
بقالوه اهميه كبيره بس احيانا بخاف من سلبياته والحقيقة انا كل اطلعاتي حاليا من عليه
سواء ابحاث اواخبار وكل حاجة هو نعمه واكيد هانتحاسب عليها
امرره لمين ؟
هيييييييييييه اخر سؤال
الحقيقة كل اللي اعارفهم الحمد لله صابهم داء التاج ده بس اي حد يزرني وماجوبوش انا بهديهوله
وهمرره لبنت ابيها ظبط دماغك
وحور الجنة
دول مدونات من محافظتي وهامرره
لاجدد مدونه اكون او لا اكون
ايه ده لسه فيه سؤالين كانوا عند اخونا مؤمن
اكلتك المفضلة؟
كل اللي يقسمه ربنا
كان زمان الموضوع ده لكن من ساعة مابقالي مسؤليه دعويه واتعاملت مع ناس
بييجي عليها وقت تتمنى اللقمه الحاف وانا بستحي اني افضل حاجة عن حاجة
او اقول على ده اه وده لا
الشغل بيمثلك ايه؟
الحقيقة انا لسة خريجة هذا العام وان شاء الله هابدء تمهيدي ماجيستير العام القادم
وبالنسبة للشغل امامي احد وظيفتين بس لسه ماحددتش ربنا يسهل ويكون العمل بالضوابط اللي
انا عايزاها فى التعامل مع الاخرين منعا للاختلاط الزائد وربنا ييسر
تم بحمد الله بجد اتكلمت كتير
انا فى النهاية بقول للناس اللي قدروني جزاكم الله خيرا وعايزة اطلب منكم جميعا طلب
ياريت اي حد يزور مدونتي اليومين دول يدعيلي كتير وخلوا بالكم منها لحد مارجع
حفظكم الله جميعا من كل سوء

  • Digg
  • Del.icio.us
  • StumbleUpon
  • Reddit
  • RSS

14 comments:

مشروع انسان said...

السلام عليكم
اولا شكرا لحضرتك على الرد على التاج برغم عدم محبتك للاجابة والتحدث عن نفسك كثيرا
ثانيا مش عارف اعلق على ايه ولا ايه كل اجابة لحضرتك تحتاج لتعليق بس جميل ان الواحد يقضى فراغه فى الاعتناء بورده وقلبه وحاله مع الله قلما او يندر ان نرى هذا فى هذه الايام اسالى الله لنا الوصول الى هذه المنزلة اختنا
ازعجنى موضوع اباكى ولكن لنصبر ونحتسب قد يكون ( وعسى ان تكرهوا شيئا وهو خيرا لكم ) اكيد طبعا حنان الاب ميتعوضش بس لا نعلم حكمة الله من وراء ذلك بس حضرتك مذكرتيش حاجة انا لاحظتها انك بتقللى من نفسك اوى وتحطيها فى وضع اقل مما هى فيه وارجو ان يتغير ذلك لان من كلامك واضح ان حضرتك شخصية متميزة وغير ما تضعيه لنفسك وحتى الاكلة المفضلة اللى نستيها عشان الناس بارك الله فيكى
بس ليه بس النظرة التشاؤمية من المرض دى حسستينى ان فيه شئ كبير لما قلتى ارد الامانات وكده يعنى خير ان شاء الله نسال الله العظيم رب العرش العظيم ان يشفيك
وارجو من حضرتك الدعاء

بنات افكارى said...

السلام عليكم
اهلا بك يأخي اسعدتني زيارتك والحقيقةانا اسفة اني وصلت لحضرتك احساس باني برد غصب عني على التاج بس والله المشكلة اني فعلا ماتعودتش اتكلم عن نفسي او اخرج شيء من جوايا بسهولة
انا بعتذر مره اخرى وبخصوص متابعتي لورد المحاسبة والله الموضوع ده من اسهل مايكون بس محتاج مجاهدة نفس ومحتاج انك تقسوا على نفسك فى الدنيا خوف من عقاب الاخرى وانا واثقة ان حضرتك وكل انسان بيدعوا الى الله يقدر يوصل لاكتر من كده فى علاقة بربنا انا مش مثالية لهذه الدرجة انا لسة فى بداية الطريق ربنا يهدينا جميعا
وبالنسبة لموضوع والدي الحقيقة فعلا الموضوع كان له حكم كتير ومنها اني اتعلم ازاي ان اولادي يكونوا هما كل حياتي بدون شريك والحقيقة حنان الاب مايتعوضش بالنسبة للي مش عنده ام زي امي انا لله الحمد والدتي عوضتني عن حنان الاب وكل شيء ومعتقدش لو كان موجود كان هايوفرلي كل ده ربنا يباركلي فى عمرها هي وكل امهات المسلمين
والحقيقة انا كان نفسي يبقى موجود حتى علشان اخد ثواب بره بس انا لله الحمد بتابع اخباره باستمرار ربنا يصلح حاله اللهم امين
وبخصوص اني بقلل من نفسي انا مش شايفة كده لان الحقيقة اني بجد من ابسط مايكون وحتة الشخصية المتميزة دي
جزاكم الله خيرا امال حضرتك وكل الناس المتميزة اللي عرفتهم دول هيبقوا شخصيات ايه لما انا متميزة ربنا يسترنا واياك يأخي
ولله الحمد مفيش نظرة تشاؤميه ولا حاجة
انا بس خايفة الغيبة تطول فعلشان مايكونش بالي مشغول بالوعود والمسئوليات وماشبه ذلك احاول اقضيهم
والله المستعان انا لله الحمد بخير ونحمد ربنا على كل حال وهو ادينا بنكفر عن ذنوبنا فى الدنيا محدش عارف الاخرة هايكون فيها ايه
باشكر حضرتك زيارتك وتعليقك والدعاء ربنا يكرمك وان شاء الله هاحاول اتابع
بس ماعتقدش اني هاقدر انزل موضوعات هذه الفتره

Anonymous said...

ادعو الله تعالى ان يوفقك لما فيه الخير

صاحب البوابــة said...

حقيقة إجابات جميلة جدا

تحياتي أختاة

بنت أبيها said...

ازيك يا قمر


وحشتينى كتيير

مش عارف الواحد فعلا التاجات بتكون تقيلة عليه


لكن ما دام جات منك تبقى جميلة خالص وخفيفة جدا

بس بجد اجابات كتيير ليكى عجبتى

يلا ربنا يوفقك ... لانك تستاهلى كل خير

عصفور المدينة said...

اللهم يسر لك جميع أمرك
ومن يتق الله يجعل له مخرجا

بنات افكارى said...

الى الاخت المجهوله
الحقيقة انتي مجهولة للجميع بس عارفاكي
جزاكم الله خيرا على الدعاء واتمنى اشوفك
فى عالم التدوين قريبا
ياريت تدعيلي كتير
السلام عليكم

بنات افكارى said...

اخي صاحب البوابة
جزاكم الله خيرا على الزيارة والتعليق
حقيقي اسعدتني ربنا يباركلك كل مجهوداتك اللهم امين
السلام عليكم

بنات افكارى said...

بنت ابيها
حبيبة قلبي والسبب فى دخولي عالم التدوين
اخيرا كتبتيلي تعليق ربنا يباركلك وانا عارفه انك مشغولة
وعلى فكرة اجاباتك على التاج جميلة جدا رغم هروبك من بعض الاسئلة بس انا عزراكي واشكرك على مجاملتك الرقيقة
ماتنسينيش بقى من الدعاء

بنات افكارى said...

اخى عصفور المدينة
حضرتك عندنا يامرحبا يامرحبا
كان لازم نوجه الدعوة بالزيارة من زمان حقيقي شرفتني
وجزاكم الله خيرا على الدعاء
وربنا يقبل منك اللهم امين
واتمنى تكرار الزيارة
وربنا يوفقك الى مايحب ويرضى
السلام عليكم

Alaa said...

يارب يحفظك و يباركلك و يحميكي
و يدخلك الجنة
التاج أسئلته جميلة جدا
و طبعا الاجابات ممتازة
:)
ربنا يحفظك
دعواتك

جمعاوى said...

البوست دسم جدا
ولكن الواضح من الإجابات
إن حضرتك

دبلوماسية جدا

mahdy83 said...

السلام عليكم
والله الواحد بيفرح جدا لما بيلائي ان لسه في ناس مؤمنين بارك الله فيكي بارك الله فيكي ومدونة جميله فعلا

بنات افكارى said...

السلام عليكم
اولا بعتزر للجميع عن التاخير فى الرد



الاخ علاء
اللهم امين ربنا يتقبل منك الدعاء
واشكر لحضرتك زيارتك


الاخ جمعاوي روش طحن
اعتزر عن دسامه البوست غير المقصوده
والحقيقة مش فاهمة كلمة دبلوماسيه دي ماذا تقصد بها لكن يكفيني تشريف حضرتك لي بالزيارة


الاخ المهدي
جزاكم الله خيرا واسال الله ان يجعلني حقا من عباده المؤمنين واشكر لحضرتك تشريفك لي واشكرك على اطرائك لمدونتي البسيطة
ربنا يكرمك واتمنى الزيارة باستمرار