اول مرة اعملها والف فى محافظتي رغم اني عايشة فيها
بس عمري ما الفيت ولا حاولت اتفسح فيها ليييييه ماعرفش
جايز لاني بيتوتيه زيادة عن اللزوم وخروجي للضرورة فقط
ورغم اني لفيت محافظات كتير وعرفت فيها اماكن كتير
بس بردو محافظتي اللي هي بني سويف ممكن اتوه فيها لقلة
خروجي فيها يمكن عشت سنتين فى محافظة قنا للدراسة
هابقى اكلمكم عنهم بعيدين بس تقريبا حفظت كل شوارعها
نبطل رغي وندخل فى المفيد
عن اليوم دا ومغامراتنا مع الامن فيه مش عارفة ليه الامن ورايا وريا
ماتعرفوش ليييييييييييييه؟ بس هي نسيت تحكي المعاناه
اللي عنيناها فى اليوم دا علشان نصور .طبعا اول ماروحنا
دخلنا وبعد ماتمشينا شوية وبنصور لقيتها بتقولي
احنا نسينا نعد الابواب بعد مسافة مش قليله
قولتلها وماله نرجع نعد الابواب ورجعنا علشان نعد الابواب
شوية كمان يااااااااااااااااااه نسينا نعد التندات
رجعنااااااااااااااا علشان نعد التندات وبعديييييييييييين
انا كنت راجعة اساسا من كورس الماني ودماغي
مليانة كلام مش مفهوم ومش نايمة قبلها
وحالتي صعبة المهم شوية ياااااااااااااااااه تصدقي نسينا
نصور المباني المهمة قولت لاحول ولا قوة الا بالله
طيب بصي نكمل للاخر وبعدين ربنا يدينا الصحة
ونرجع نصور المباني ونبقى نركب من هناك
طبعا كل دا قبل مانعرف ان الممشى بتاع الكورنيش
حوالي 2 كيلو متر شوفوا بقى مشينا ورجعنا كام مرة
خلصنا ال2 كيلو رايح قولنا بقى نرجع علشان نصور
المباني المهمة قولت لبنت ابيها انا لو فى الفيلد
فى رحلة جيولوجية يعني مش هاتعب كدا على الاقل
فيه جبال بنطلعها وننزلها والواحد متعود
حد يبقى يفكرني بردو احكيلكم عن الرحلات دي
وبصورها ان شاء الله شوية وبنت ابيها لقيتني جبت اخري
لدرجة اني ماشية فى وسط العربيات مش سامعة صوت اي حاجة
قالتلي لاااااااااااااااااااا كدا بقى يبقى انتحار قولتلها وماله
بصتلي تقولي كان لازم يعني الكعب العالي النهاردة
قولتلها اعمل ايه الطقم حكم بكدا وبعدين اعرف ازاي
انك هاتمشيني كل دا المهم فضلنا نصور وقربنا نوصل لاخر مبني
عمالين رجل ورا ورجل قدام لقينا عربية بحصان كنا خلاص هانعيط
ونركب معاهم بس قولنا نجمد بقى علشان عييييب وصلنا الحمد لله
لآآآآخر مبني ويلا ياحبيبتي صوري وخلصيني وفجاااااااااة
الموبيل (البطارية لا تكفي) قولت ماشاء الله يامحاسن الصدف
بعد ماوصلنا لحد هنا قولت لبنت ابيها موبيلك ايه قالتلي نوكيا بردو
طيب هاتي بطاريتك الحمد لله يادوب جات على نص الموبيل بتاعي
تحايلنا عليها لحد مالقطنا الصورة وواحنا راجعين بئا
شوفت المنظر اللي قالتلكم عليه بنت ابيها طبعا الظابط لو كان شافني
محدش عارف كان ممكن يعمل ايه وهو كاره نفسه اساسا
طبعا علشان اصور مفيش بطارية ولا فيه بنت ابيها معايا
علشان اخد بطاريتها المهم الرغي دا كله
تشوفو الكورنيش بتاعنا وجماله لونه مش هايبقى احلى
من كورنيش قنا ابدا واللي عايز يعرف مغامرة اليوم يعدي
منكم فى شخابيط هو حر انا مش بخوفكم لا سمح الله
انا بهدد بس وانتو عارفين!! مش عارفة عارفين ايه
بس مش مشكلة معلش انا اصلي بمر بفترة توهان وعدم
تركيز ولخبطة داخلية وعدم قدرة على اتخاذ قرارات مهمة
علشان تدعولي بردو معاكم بس كفاية كدا عليكم النهاردة
اه نسيت اقول ان انا مش ناوية الف فى المحافظة دي تااااااااااااااني
حاجة كمان ماتركزوش مع صور الاطفال دي اصلها بتعبر عن حاجات
جوايا كدا مش بس للتدوينة يعني اتفرجو وانتو ساكتين انا قولت اهو
