قبل ماقولكم الحوار وبعد السلام عليكم عايزة الاول اهنيكم بمناسبة ضيف كريم هايحل عليكم
بمناسبة 30 يوم لازم يساعدوكم ا وفى حياتكم هايفيدوكم ومن ربنا ها يقربوكم
طبعا هايعدي اول اسبوع وهايعدي الشهر كله بس لازم تعرفوا ان الشهور مش بعدد ايامها
والايام مش بعدد ساعتها .عامة وعلى كل حال انا كنت قاعدة كده من كام يوم فى وقت السحر
يعني بعد القيام ومنتظرة اذان الفجر كنت بتذكر رمضان وهايكون فيه ايه هذا العام
وبعدين سالت نفسي سؤال هو ليه واحنا صغيرين كنا بنبقى فرحنين برمضان
على الرغم من اننا مش فاهمين ومش عارفين فضل هذا الشهر الكريم
لكن براءة قلوبنا هي اللي كانت بتحسسنا بحلاوته لكن لما كبرنا والمعاصي والذنوب
ذادت فى قلوبنا كل ده جوه القلب خلاه مش عارف يحس برمضان قلت فى نفسي يااااااااه
كفايه ان رمضان هيدخل على احزان فى قلوب المسلمين هيدخل علينا واحنا متفرقين
واحنا مشتتين ومن غير اهداف عايشين هيدخل على دماء فى فلسطين
والعراق وافغانستان وكشمير والشيشان واندونيسيا والبلقان و.........كفاية وحسيت وكاني سمعت صوت
رمضان.. بيقولي كفاية كفاية ياس واحباط خلي عندك امل انا هادخل على كل ده وهاخرج ومعايا كل ده
قولتله.. ازاي يارمضان انت مش فاكر مش فاكر اول رمضان صامه المسلمين كان فيه انتصار
غزوة بدر الكبرى (يوم الفرقان) واحنا دلوقتي خليناك شهر كله انهزامات
مش فاكر دخول الرسول صلى الله عليه وسلم فيك مكه منتصر بعد 8 اعوام من طرده
وغزوة تبوك اللي المسلمين مشوا فيها الاف الاميال على اقدامهم فى الحر الساخن
وفيه ناس دلوقتي مش قادرين يوقفوا ساعة بين ايدين ربهم فى صلاة التراويح
فاكر لما المثني بن حارثة فى معركة البويب الفاصلة قال لجنوده (لا تفضحوا
العرب اليوم فاعتدلوا ويامعشر المسلمين عادتكم ان تنصروا الله ينصركم) لكن
احنا فضحنا المسلمين وخذلنا المجاهدين وعلى المقاطعة مش قادرين وتصور
حتى فى الدعاء فيه ناس مقصرين
فاكر لما 12 الف مسلم فتحوا اسبانيا ومليار و300 الف مسلم مش عارفين
يحرروا الاقصى
فاكر كيف انطلقت صيحة مسلمة ابيه كشف الروم عورتها وقام فى سبيلها جيش المعتصم
واحنا دلوقتي الامر بقى بمازجنا ولا حول ولا قوة الا بالله واقولك وبكل اسى ان 50 الف
مسلمة اغتصبت فى كوسوفو وزيهم فى البوسنا والشيشان
فاكر انتصار قطز على التتار وفاكر كيف فتح السلطان العثماني(سليمان القانوني) بلاد
المجر ورومانيا وبلغاريا ودول البلقان وازاي احنا ضاعت مننا كل البلاد دي
وبمجازر وحشية لم يشهد لها التاريخ مثيل لا وكمان مشغولين بالموضة والتقليد الغربي الاعمى
استنى استنى فاكر انتصار اكتوبر وفاكر صيحة الله اكبر واحنا وبكل شياكة حطينا ايدنا
فى ادياهم قال ايه بحجة السلام السلام اللي استبيح به دماءنا واحنا بنتفرج من غير
مانعمل اي حاجة ان شا الله حتى دعاء ولا مقاطعة
مش هو ده نفس الكلام اللي هاتقولوا لربنا يارمضان لما يسالك عنا
قالي.. ايه كل ده مين قالك اني هاقول كل ده انا هقول كانوا كده وتابوا
وحرروا ارضهم وجددوا مجدهم فيا فى رمضان
قولتله.. ازاي بس واحنا غيرناك وبدلناك وظبطناك على الاخر
قالي.. لو سمحتي انتوا اللي اتغيرتوا انا ماتغيرتش عن اول مره جيتلكم فيها
قولتلوا.. خلاص يارمضان علشان خاطري قولي ازاي اديلك حقك
قالي..مش هقولك
قولتله..كمان مره علشان خاطري
قالي..خلاص اتحايلي عليا شوية لحد المره الجايه
خلاص بقى ياجماعة اكملكم المرة الجايه اكون انا اتحايلت عليه شويه
طلعت نفسه عزيزة على الاخر مش زينا علشان مصالحنا عدونا ممكن يبقى حبيبنا
42 comments:
هموم الناس قدرى
هموم الناس قدرى
كل عام وأنتم بخير
يهل رمضان من بعيد
حاملاً لي أحلى الذكريات دائماً
أصدق العبرات حتماً
أخلص العبادات دوماً
لرمضان عندي مكانة خاصة
ولكم أنتم أيضاً
يا أحبابـــي
فكل عام وأنتم بخير
وأنتم إلى الله أقرب وعلى طاعته أدوم
السلام عليكم ورحمة الله
كل سنه وانتى طيبه يا بنات افكارك
تقبل الله قيامنا وصيامنا واعمالنا
بالنسبه للحملة
حضرتك ممكن تتواصلى معانا على ايميل بنات القاهره
كل المطلوب من حضرتك تجميع عدد من المصاحف اللى تقدرى عليه طبعا
وحضرتك نازله القاهره تجيبيهم واحنا هناخدهم منك
هناخد ازاى ؟؟
الاول هنكلمك ماسينجريا
وبعدها هنتفق هنتقابل ازاى عشان ناخدهم منك
نورتى مدونتى
فنانه بجد ما شاء الله عليكي جميل اوي الحوار ده مع رمضان
والله رمضان بقي بيجي وهو مكسوف مننا علي التقصير والخيبه والتحضيرات المقززه اللي بيستقبلوه بيها من خيم رمضانيه ومسلسلات تافهه علي اساس ان رمضان فرصه للعربده مش للعباده
ربنا يعافينا من المصايب دي ويجعلك سبب في نهضة الاسلام وان شاء الله رمضان ييجي يوم القيامه ويبقي فخور بيكي
انا هضيفك للينك ليست بتاعي عشان حبيت مدونتك قوي وحبيتك انت كمان
باذن الله انا كمان هشترك في حملة نشر الاسلام وربنا يكتبلنا كلنا الثواب
اسف للتاخير فى الرد
نبتدى بايه
صحيح كنت هقول زى ما حضرتك قلتى ان احنا اللى اتغيرنا مش رمضان
رمضان هو هو اللى كان فى غزوة بدر بنفس افضاله وكرمه من الله
بس المشكلة بقى فينا احنا اللى فرطنا وضيعنا ومبقناش عارفين قدره
زى ما حضرتك ذكرتى مش بس غزوة بدر لا غزوات وفتوحات كتير حتى فى وقتنا الحاضر
وهكذا يصب الله علينا من رحمته وكرمه وفضله علينا ولكن ما بالنا غافلون عن كل هذا الكرم
والله الواحد مرعوب جدا الشهر ده انه ميفهوش حقه
ليه ميكنش شعار كل واحد فينا لن يسبقنى الى الله احد
احنا اذا تذكرنا الاخرة بجد وتذكرنا نعيم ربنا بجد وتذكرنا مشاكل الدنيا وهمومها سبحان الله مكناش غفلنا عن فرصة زى دى ابدا
بل لكنا نتمنى ان يكون العام كله رمضان
مستنين رمضان هيقول ايه المرة الجاية
ومن حقه نفسه تبقى عزيزة
ده كان بييجى على خير الناس
وخير من مشوا على الارض
فما حاله وقد اظلنا وراى فينا ما راى
نحمد الله انه ينعم علينا كل عام برمضان
وما نحن باهل له
ولكنها رحمة الله وفضله
ننتظر دعائك
وصلنى ردك.... وكل عام وانت بألف خير ولو ان كل شبابنا ورجالنا وبناتنا ونسائنا ..تأملوا وتفكروا مثلك لأصبح لهذا الوطن الغالى شأن أخر / وأخيرا لكى تحياتى والى الامام واللهم اعد رمضان عليكى بالخير والبركات
ممكن سؤال وياريت الرد بالاجابه على مدونتى
كيف اضع صوره فى البروفيل؟
السلام عليكم ورحمة الله وبركاته كل عام وانتي الى الله اقرب وعلى طاعته ادوم
واللهم بارك لنا في شعبان وبلغنا رمضان
جزاك الله خيرا اختي الفاضلة على الاستعداد للمشاركة في حملة انشروا الاسلام وانا كنت رديت على حضرتك في مدونتي ان المركزين الرئيسيين هما القاهرة والاسكندرية واي حد عاوز يشترك في الحملة يشوف ايه اقرب له القاهرة ام اسكندرية ويتصل باحد المشرفين على الحملةمن القاهرة او اسكندرية على الاميلات الموضحة بالموضوع وبارك الله فيك وجزاكي خيرا
هموم الناس قدري
انا زرت مدونة حضرتك بارك الله فيك
واعانك على خدمة الدين والناس
السلام عليكم
صاحب البوابة
نحمد الله ان حضرتك بخير وكل عام وحضرتك بخير وتقبل الله طاعتكم وبلغك وايانا رمضان وجعله شهر انجازات لحضرتك ان شاء الله
السلام عليكم
بارك الله فيك والحقي هاتي لنا الأسرار قبل الهلال
رضواى
اهلا بيكي فى مدونتي المتواضعة نورتيني
وان شاء الله هاشارك وهاحاول انشر الموضوع اكتر لتجميع كميات من المصاحف اكتر وهاتواصل مع حضرتك ان شاء الله عن طريق الماسنجر
وكل عام وحضرتك بالف خير وبلغك الله رمضان وتقبل صيامك وقيامك اللهم امين
السلام عليكم
صانعة الحرية
اهلا بيكي ياقمر نورتيني
وانا معاكي فى الفكرة بس ليه نتفق على يوم واحد ليه مايكونش الدعاء ليهم شىء اساسي فى دعائنا اليوميفى القيام بالاخص ومفيش مانع ان شاء الله نحدد يوم نختصهم هم فقط بيه وربنا يتقبل ويفك اسرهم واسر المسلمين جميعا
اهلا بيكي مرة تانيه
السلام عليكم
اميرة محمد محمد محمد
يادي النور يادي النور
اسعدتني زيارة حضرتك بارك الله فيكي
واشكرك على الاطراء الجميل
وفعلا من الاشياء المحزنة الطرق المبتدعة لاستقبال رمضان وان شاء الله يفخر بينا رمضان جميعا وبكل شباب المسلمين يوم القيامة
ويسعدني انك تضيفيني عندك فى مدونتك الجميلة هو احنا نطول
واني احبك فى الله وجمعنا الله يوم القيامة فى ظلة يوم لاظل الا ظله اللهم امين واتمنى اشوفك ان شاء الله
السلام عليكم
امام الجيل
لاداعي للاسف يأخي اعانك الله فى جميع احوالك المهم تشريفك لنا بالزيارة
وفعلا احنا اللي اتغيرنا واتبدلنا وبقينا بشر غير البشر اللي المفروض نزل لاجلهم رمضان وكله بايدينا زي ماتغيرنا نقدر برضة نرجع زي اجدادنا زي الصحابة صحيح عمرنا ماهنكون زيهم لكن على الاقل نكون اهل لاننا نكون احفادهم وان شاء الله هانتغير وهانبقى كويسين طالما انه احنا ناويين بس المهم نتخذ الخطوة الاولى اللي هي اصعب خطوة والباقى هيكون اسهل بامر الله
وانا شايفة ان التغيير لازم يبدء بينا علشان نقدر بعد كده نمشي اولادنا عليه وهكذا وان شاء الله حضرتك واحنا نوفيه حقه هو صحيح مش هانوفيه كل حقة لكن نسال الله انه يعينا اننا نبذل كل مافى وسعنا علشان مانتعبش من التقصير بعد كده واهم حاجة اننا نحس ان احنا عملنا اللي علينا وانا مع حضرتك فى رفع شعار لن يسبقني الى الله احد
وياريت كمان كلنا فى رمضان وعند بداية يوم من ايام رمضان وفى صلاة الفجر نقول لرمضان يارمضان اذكرني عند ربك وان شاء الله يذكرنا جميعا بالخير والكلام معاه على فكرة سهل ومش محتاج لا وسطة ولا روتين ولا تحديد معاد
وندعوا الله ان يبلغنا رمضان ويعيننا على التغيير فيه
وان شاء الله لن ننساكم بالدعاء فى رمضان وبعد رمضان لوكان فى العمر بقيه ان شاء الله
السلام عليكم
المستقبل
اهلا بحضرتك مره اخرى
وجزاكم الله خيرا على الكلمات الطيبة والله لا استحقها ربنا يسترنا واياكم
وان شاء الله ازور حضرتك واشرحلك كيفية وضع صورة ويارب اقدر اوصل الشرح
السلام عليكم
الجمعاوي الاصيل
اهلا بحضرتك وكل عام وحضرتك بخير وتقبل الله طاعتكم وان شاء الله نشارك
وانا فعلا توصلت للاخت رضوى وهاتابع معاها جزاكم الله خيرا
واعانكم على خدمة الاسلام والمسلمين
السلام عليكم
عصفور المدينة
اهلا يافندم ربنا يعزك يارب
وان شاء الله نكمل الاسرار قبل الهلال
اكيد لازم حضرتك تتطلع عليها
وانا كمان اعتقد مش هاقدر اتابع فى رمضان لسه مش عارفة الله المستعان
السلام عليكم
كلام جميل بس عايزة تعرفي تدي رمضان حقه
بيتهيألي لو كل واحد فينا عمل كل اللي يقدر يعمله مش بس في طاعة ربنا كمان في مسؤليته تجاه نفسه والناس اللي حواليه
رمضان متغيرش احنا اللى اتغيرنا
أصبتى أختاه
وفى انتظار باقى الحوار
اللهم نلغنا رمضان وأعنا فيه على الطاعات
بنت مصر
اهلا ياجميل يارب تكوني بخير
وفعلا عندك حق لو كل واحد فينا عمل اللي عليه تجاه ربنا اولا ونفسه والناس اللي حواليه ثانيا
يبقى هاندي لرمضان حقة جزاكي الله خيرا
وبلغك الله رمضان وماتنسيناش وانتي بتدعي عند الفطار وفى القيام وفى كل وقت ولكي مثله ان شاء الله
السلام عليكم
اللؤلؤة المكنونة
بتسعديني بزيارتك
وفعلا احنا اللي اتغيرنا بس للاسف للاسوء
لكن فيه امل ان شاء الله نرجع زي الاول
بس احنا ننوي ونعمل اللي علينا
وكل عام وانتي الى الله اقرب وعلى طاعته ادوم ان شاء الله وبلغنا الله واياكي رمضان
السلام عليكم
الاخت بنات افكارى
السلام عليكم ورحمة الله وبركاته
لم اكن اتصور انى سأقرأ موضوع عن رمضان يدمى قلبى مثل هذا
لا حول ولا قوة إلا بالله
اللهم انك عفو كريم تحب العفو فأعف عنا
جزاكم الله خيرا على هذه التذكره
وهذه الدفعه الحماسية ان شاء الله
الباحث عن الحقيقة
اهلا بحضرتك لاول مرة فى مدونتي المتواضعة
والحقيقة بما ان حضرتك من الباحثين عن الحقيقة فاللاسف هذه هي الحقيقة التى نغفل عنه ولكن ماذال الوقت والفرصة امامنا وان شاء الله هانستغلها طالما عندنا النية السليمة والله المستعان
وجزاكم الله خيرا على الزيارة وان شاء الله باقى الحوار هايكون مبشر اكتر ورمضان هايرضى عننا اكتر ان شاء الله
بلغنا الله واياكم رمضان ورزقنا حسن صيامة وقيامه اللهم امين
السلام عليكم
السلام عليكم
ربنا يبارك فيكى وجزاكى الله كل خير على البوست الجميل ده
ويارب يكون رمضان السنه دى أحسن وأحسن
وكلنا نرفع شعار سأعبدك ياربى كمان لم أعبدك من قبل
ولو كان عندنا الأخلاص فى النيه والدعاء يبقى أن شاء الله ربنا عمره ما بيكسف عبده ابدا
حوار رائع منتظرين بقيته
تحياتى
كل عام وانتى بالف خير
حياة الاحلام
وعليكم السلام ورحمة الله وبركاته
نورتي المدونه ويارب تنوريها على طول
وجزانا واياكم يافندم وان شاء الله رمضان السنه دي يكون افضل على الجميع
وان شاء الله طبعا عمر ربنا ماهيكسفنا ويرد دعائنا ابدا ربنا يتقبل منا جميعا
السلام عليكم
عصفور بلا اجنحة
اهلا بحضرتك فى المدونة وكل عام وانت الى الله اقرب وعلى طاعته ادوم ان شاء الله
السلام عليكم
وجعتي قلبي والله
وعموما الحل ف تغيير ما بأنفسنا كما قال ربنا سبحانه وتعالى
وربنا يرزقنا توبة صادقة نصوح
اللهم انصر الاسلام واعز المسلمين
جزاكي الله خيرا
بارك الله فيك وجزاك خيرا وبلغك رمضان
عندما نستلذ بالطاعه ستكون مفتاح التغيير
رمضان كريم
جميل قوى البوست ده
ربنا يكرمك
صحيح رمضان احنا مقصرين فى حقه كتيييير
لكن ان شاء الله رمضان السنادى هيغير كتيييييير
ده شعار نرفعه حتى لو مغيرش على مستوى العالم
فلازم يكون على مستوانا كاشخاص
لازم رمضان السنادى يغير كل عاداتنا
واخلاقنا ... وكله للاحسن
ومستنية الجزء التانى بفارغ الصبر
مستنية رمضان هيقولك ايه عشان نوفيه حقه
السلام عليكم
الام وامال
اعلم ان حضرتك مش ناقص وجع قلب بس هي جات مع حضرتك كده ربنا يخفف الامك اللهم امين
وفعلا ان الله لا يغير مابقوم حتى يغيروا مابانفسهم ربنا يروقنا واياكم التوبه النصوحة والتغيير للاصلح
وجزانا واياكم يأخي وتقبل الله طاعتكم
السلام عليكم
السلام عليكم
الطائر الحزين
اشكر لحضرتك زيارتك وجزانا واياكم يافندم وتقبل الله دعائك وربنا يصلح احوالنا جميعا
وان شاء الله ربنا يرزقنا لذة الطاعة والتغيير للافضل اللهم امين
السلام عليكم
بنت ابيها
اهلا بيكي ياقمر
فعلا لو ماكنش التغيير على مستوى العالم لازم على الاقل يكون على مستوانا الشخصي وان شاء الله يكون فعلا تغيير للاحسن طالما النية موجوده والله المستعان وقريبا جدا هانزل باقى الحوار ان شاء الله
ومنوراني دايما ياقمر
السلام عليكم
كل عام وأنت بخير وجزاك الله خيرا على حسن ظنك ودعائك
عصفور المدينة
جزانا واياكم يافندم وكل عام وحضرتك الى راية دينك رافع اللهم امين
وفعلا هانفتقد حضرتك لكن طالما غياب حضرتك للخير يبقى نستحمل نفع الله بك دائما وجعل نصائح وكلماتك لنا في ميزان حسناتك اللهم امين
ولا تنسانا من دعائك
اشكر لحضرتك المرور الكريم
السلام عليكم
كل عام وانتم بخير وعادة الله عليكم وعلى الاهه الاسلاميه بكل خير
كل عام وانتم منصورين واقوياء
كل عام ومصر بخير
احمد الجيزاوى
كلامك جميل قوى
كل سنه وانت طيبه
ربنا يتقبل منك صالح الاعمال اللهم امين
رمضان كريم
حوار رائع جدا ، بوست مميز بجد
ماشاء الله عليكِ ، معلش امبارح كنت مستعجلة فسجلت حضور كدا والحمد لله رديت النهاردة
وكل عام وانت إلى الله اقرب وعلى طاعته ادوم ... والقلوب عند بعضها اننا كنا بنتصفح مدونات بعض في نفس الوقت
أحبك في الله :)
انا بحبك يامصر
كل عام وحضرتك بخير وتقبل الله طاعتكم
واشكر لحضرتك تشريفتا بالزيارة
وجعلنا الله منصورين واقوياء بفضل هذا الشهر ان شاء الله
السلام عليكم
رفقة عمر
اسعدتني جدا زيارتك وكل عام وانتي بخير
وتقبل الله منك
ورمضان كريم
السلام عليكم
نور
منوره ياقمر واحبك الذى احببتيني فيه
وكل عام وانت الى الله اقرب وعلى طاعته ادوم واسعدتني زيارتك حتى لو كانت عن استعجال وتنوريني فى اي وقت وان شاء الله هانتعرف اكتر
ولا تنسينى من صالح دعائك
السلام عليكم
Post a Comment