مش اول مرة اعملها واشهر سلاحي فى دراع حد
سلاح ايه ..ودراع ايه..بتخرف دي ولا ايه
طب هو النهاردة ايه.........ولا اعرف
خليكم معايا بس هاحكيلكم على مغامرة
من مغامراتي بس ماتزهقوش بسرعة مني
كنت فى طريقي للقاهرة علشان كان عندي
محاضرات من 9 صباحا ل7 مساءا بدون
اي خمس دقايق ريست بس الحمد لله
سابونا نروح ننام فى بيوتنا...ماعلينا
الطريق من بلدي للقاهرة بياخدلوا
حوالي ثلاث ساعات تقريبا وساعتين
ونص لو السواق شارب ومستغني
عن نفسه وعن الركاب قبله المهم
غالبا لما بحس اني مش هارتاح فى
القاعدة فى العربية باخد كورسيين
لوحدي وانا اساسا يدوب املى نص كرسي
الاااااااا لو مستعجلة وفيه ازمة والمضطر
يركب الصعب. طبعا الوقت بدري والناس
جاية تكمل نوم فى العربية قعد جمبي بقى
شخص لا يوصف حقيقي لا كما ولا كيفا يعني
بسم الله ماشاء الله عليه طبعا بيني وبينه شنطتي
ومن اولها قولت شكلي كدا مش هارتاح مع الاخ
ومفيش اول نص ساعة عدت وبدءت علامات
النعس قولت ااااااااااه بدءنا ..كل شوية بشنطة
ايدي واروح خبطاه فوق لو سمحت مش عارفة
ايه دا قولت معلش محدش عارف ظروف حد
جايز حد كدا ولا كدا ضاربه ومانمش طول الليل
المهم كل شوية وبشنطتي فوق لو سمحت
آآآآخر مازهقت قولت لااااااااا واضح ان الذوق
مش نافع واحنا لسه فى اول الطريق
بدءت عليا علامات النرفزة وانا من طبعي
هادية جدااا الا فى الاوقات دي قولت لااااا
مابدهاش لازم اطلع سلاحي احنا كدا
وصلنا لمرحلة الدفاع عن النفس ولاااازم
اوريه العين الحمرا بردو ماهنش عليا
كل شوية اقول اطخه وارجع اقول حرام
اطخه لاااا حرااااااااااام استحملي شوية
وفجاءة بس كداا ارفع ايدك فوووق ..قصدي
فوق لو سمحت مفيش فايدة شوفوا كدا بقى
انا عداني العيييييييييييييب وزيادة كمان
روحت مطلعة سلاحي
الاول في حد هنا ؟؟ حد شايف حاجة؟؟
حد واخد باله؟؟ لا الحمد لله الكل نايم
الا السواق الحمد لله كان صاحي
ومن تحت الخمار ورحت طخااااااه قصدي
شكاااااااه وفجاة لقيت صوت اااااااااااااه
ايه في ايه وانا من الشباك عمالة اتامل فى
جمال الصحرا قد ايه كانت جميلة والله
بحبها جدااا لاني بدرسها هابقى احكيلكم
عن الحب العميق دا بعدين...خلونا فى موضوعنا
المهم الراجل ياااعيني كان خلاص هايعيط
ويقول فى حاجة فى الكرسي ياأبلة خلي بالك
في حاجة بتشك فى الكرسي..قولتله لا حضرتك
بس خد بالك انت واوعاااااااااا تناااام تاني
بس بصراحة صعب عليا دي لو كانت حقنه
كانت هاتبقى فى الوريد يعني كام ملي تحت الجلد
مش عارفة انا بقى الرصاصة بتعتي اخترقت كام سنتي
بس ايه بقى باقي الطريق قاعدة مرتاحة البال
وهو ياعيني خايف حتى يسند ضهره لورا
على الكرسي اصل الكرسي فيه حاجة
وخلي بااااااااااالك
ماتعرفوش الكرسي كان فيه ايه؟؟؟؟؟
41 comments:
اخييييييييييرا دخلت مدونة مش بتتكلم عن الإضراب
الواحد خلاص قرب يفرقع من كتر الاخبار السيئة اللي بيقراها
والله ضحكتيني بجد
واختيارك للصور رهيييب
:D:D
بس بحد الراجل بردو صعب عليا
بالدبووووووس؟؟
ههههههه
لا حول ولا قوة الا بالله
ان كيدكن عظيم
:)
هههههههههههه
ياه بس درس مش هينساه ابدا يا اما هينام قبل السفر يا اما هينقل ويستقر محدش ضامن تطلعه مين تانى فى البخت :)
ربنا يكرمك ويبارك فيكى
جميل فيه للاسف بنات ملتزمات ممكن حد يضايقها بقصد او بدون قصد وتتكسف انها تواجه
بس اعتقد ده اقل واجب سواء بقصد او بدون
اه صحيح اختيار الصور جميل جدااااااااا
ومناسب للموضوع
خصوصا شايفين حاجة ولا لا والصورة الاخيرة
عساسيل
اكرمك الله يا فندم
ان كيدهن عظيم
الواحد مايعرفش ينام في العربية ولا ايه؟
يا ساتر
السلام عليكم
طيب كويس جدا اللي حضرتك عملتيه ده فعلا لانها حاجه صعبه جدا للاسف ,والمفروض هو ياخد باله اصلا من الاول بس انتي خلتيه هياخد باله علي طول ,والله المستعان
ربنا يحفظكم جميعا
جزاكم الله خير
هههههههههههههههههه
بنات افكاري صحيح :D
فكرتيني بمرة كنت راجعة من القاهرة وحصل الموقف ده بس اديته بالشنطة الحقيقة :D
بس بجد ماتعرفيش الكرسي كان فيه اييييييه؟
هههههههههههههههه
طبعا ده دبوس قرن غزال محترم
تحياتى
لا دا انتي طلعتي خبيرة بقى ماشاء الله
أحسن على الرغم من انه صعب علي
لكن علشان ياخد باله المرة الجاية
دمت بخير
iههههههههههههه
يستاهل
بس بصراحة
فكرتك رائعة
جزاكم الله كل خير
السلام عليكم
هههههههههههه
جميل يا قمراية
اكيد حرم
بنات أفكارك
كيف الحال
بصراحة شعرت بتواضع شديد بجوار مدونتك الجميلة .. والبوست لذيذ مسلي .. يشرفني زيارتك في مدونتي
جني وسماع آرائك .. وياريت تقصقصي ودانهم علشان نتكلم بشئ من الحرية ..
said
هههههههههه
---
أيوة أنا عارف الكرسي كان فيه ايه
كان فيه
دبوس حياء !
---
تحياتي
يستاهل
فى ناس فى نومها حاجه صعبه
آلام آمال
اهلا بيك نورت اول تعليق يافندم
وفعلا انا كمان زهقت من الاخبار السيئة
والحمد لله اني قدر اضحكم يارب دايما
والصور فعلا انا اختارتها بمزاج شوية
والراجل صعب عليا بردة
بس ماكنش في حل غير كدا للاسف
معلش بقى نصيبه كدا
السلام عليكم
امام الجيل
اهلا بحضرتك اتمنى فعلا يكون درس مايتنسيش
ولو يستقر هناك نرتاح اكتر بردو
وفعلا الملتزمات بيكون عندهم
خجل زايد حبتين انا صراحة
بتردد مية مرة قبل ماعمل اي تصرف
بس فى الاخر بيبقى لابد منه وربنا يرجمنا
ويرزق الرجال شوية نخوة كدا اليومين دول اللهم امين والصور فعلا جميلة
وعساسيل على الاخر جزاكم الله خيرا
السلام عليكم
a.samir
اهلا بحضرتك فى المدونة
ونام براحتك يافندم بس ياريت
بضوابط وخد راحتك لما يكون اللي
قاعد جمبك رجل بردو ولا اييييه
هايكون مصيرك الله اعلم دبوس ولا غيره
السلام عليكم
الفاتح الجعفري
اهلا بحضرتك يافندم
وكان المفروض فعلا هو ياخد باله
بس نقول ايه بقى ربنا يهدي
وربنا يتقبل دعائك يافندم
جزاكم الله خيرا وشرفت المدونة
السلام عليكم
همسة قلم
اهلا بيكي ياقمراية نورتيني
وخلي بالك من سلاحك قصدي من دببابيسك
اكيد هاتحتاجيلها فى يوم من الايام
هو زمنا دا عايز كدا
والكرسي الحقيقة عماله افكر
ياترى كان فيه اييييييييييه
لما اعرف هاقولك
نورتيني ياقمر
السلام عليكم
الطائر الحزين
اهلا بحضرتك
وهو شكله كان تاثيره نفس
تاثير قرن الغزال دا
والله خايفة المرة الجاية
تقلب معايا لحاجة زي دي
ربنا يسترها ادعيلنا معاك
السلام عليكم
صاحب المضيفة
اهلا بيك يافندم
هو يصعب عليك اه لكن لو شوفته
مش هايصعب خالص يلا حظه معانا
نعمل ايه اقدار بقى
وانا واثقة انه هاياخد باله ان شاء الله المرات الجاية
وشرفتنا يافندم
السلام عليكم
مؤمن محمد
اهلا بحضرتك بعد غياب
وهو يستاهل فعلا
علشان كدا ربنا حطه
فى طريقي للاسف
وجزانا واياك يافندم
شرفتنا
وعليكم السلام
جني
اهلا بحضرتك لاول مرة
وانا زورت حضرتك فعلا
ربنا يكرمك ان شاء الله
واحنا اللي فة قمة
التواضع وسط الناس دي
ربنا يكرمك يارب
ويرزقنا الاخلاص ان شاء الله
اهلا بيك مرة تانية
السلام عليكم
بنت ابيها
اهلا ياسكر نورتيني
وهو فعلا منظره كان بيقول
انه خلاص حررررررررم
وحشتيني ياقمر
السلام عليكم
خبيب
اهلا حضرتك
كويس والله في حد
عرف الكورسي كان فيه
ايه خلي بالك يافندم
احسن الدبوس دا هاينتشر
ان شاء الله بانتشار الحياء
دمت بخير ونورتنا
السلام عليكم
محمد الشاعر
اهلا بيك يافندم شرفتنا
وفعلا في ناس نومها مش بس
صعب لا دا يحرج كمان للاسف
ومحدش بيراعي اللي جمبه بنت
ولا ايه بالظبط خلاص مبقاش
فيه حياء للاسف
السلام عليكم
هههههههههههههههه
بجد سرد رائع
سلمت يداك أختى الكريمة
وبالفعل إيجابية منك أنك تخليه يقدر يمسك نفسه ويحاول يبقى يظبط نفسه مع الركاب قبل ما ينام ويزعجهم فى المواصلات وغيره
الراجل عايز ينام
لازم تقلقوا منامه يعنى
:)
ودبوس...
مااااعلينا
تحياتى
ههههههه
ايه ده
ده انتى قوة عظمى في المواصلات اهو والواحد لازم يعمل حسابك
جميل جدا البوست ررررائع
وكمان الصور ودلالاتها على الموضوع
فنانه قديرة جدا يا بنتى
استمتعت حقيقى بالبوست
صحيح صعب عليا الشخص ده
بس انتى اهم
لازم يراعى ان جنبه انسه
هو ماخدش باله انك جميله ولا ايه
هههههههه
ازيك يا فندم من زمان ما سلمناش والله
وده تقصير مننا انا عارف
كيف الحال
حركة حلوة
لكن الحكاية أحلى
ربنا يكرمك ويرجعك بالسلامة
جميل البوست قوي
بس على فكرة هو مش لازم يكون نايم علشان تعبان ممكن قوي يكون بيستهبل
السفر ده قطعة من العذاب بجد
ربنا معانا
برافوووووووو عليكى انا كل ما يحصل معايا الموقف ده ما بعرفش أطخ قصدى أشك ممكن تشريحيلى الميكانيزم ههههه.
بس الراجل شكله طيب ده فى ناس تانية عايزة ال................. ما علينا ربنا يهديهم.
السلام عليكم
انا بصراحه الراجل صعب عليا جدا هو ايه !!
!الناس مفيش فى قلوبها رحمه اليومين دول
واحد حب يريح شويه فى طريق سفره نقوم نطلع على جتته البلا الازرق ده
وبعدين ماكنش فى اى مكان تانى غير اللى
جنبه ؟؟
يلا اهى علقه والسلام بس ما تحاوليش تعملى كده تانى فى ولاد الناس ؛ اتفقنا؟
أولا مبروك نتيجة التظلم يا ستي
فرحتيني
يعني نعدل البوست قبل اللي فات ونسمية لو ليك حق اتمسك بيه
جملة خبرية مش استفهام
نرجع ناخد كرسيين تاني.. مش كان اسلم؟
بدل ما نشك الناس ونعمل بنتفرج علي الصحرا
الحشري
اهلا بحضرتك
وجزامم الله خيرا يافندم اهوالواحد
فاض بيه كان لازم يطلع شوية الايجابية دول علشان يرتاح نورتنا يافندم
السلام عليكم
حطم القيود
اهلا ياقمر انتي معايا ولا معاه
ينام ياستي بس بعيد عننا
ربنا يرحمنا ويسترنا واياكي
اللهم امين نورتيني
السلام عليكم
الباحث عن الحقيقة
اهلااااااااااااا بحضرتك
وجزاكم الله خيرا على الاطراء
ولا قوة عظمة ولا حاجة بس اعمل حسابك بردو وشوفت حضرتك ماراعاش هو مين قاعدة جمبة وادي جزات اللي مايشوفش كويس ربنا يكرمك يافندم
فعلا زيادرة بعد غياب ويارب يجعلكم بخير دايما وشرفتنا حضرتك واحنا كمان مقصرين معلش بقى مشاغل
السلام عليكم
شاعر الاحزان احمد هيكل
اهلا بحضرتك
وشرفتنا بالزيارة وربنا يوفقكم
السلام عليكم
دكتور حر
اهلا بحضرتك
وجزاكم الله خيرا يافندم
الله يسلمك
السلام عليكم
the others
اهلا ياقمر نورتيني
وفعلا كتير اوي بيستهبلو
ربنا يرحمنا يارب ويحافظ
علينا جميعا اللهم امين
السلام عليكم
واحدة
اهلا بيكي ياواحدة
منورانا والله وانتي تؤمري
ممكن تراسليني اشرحلك
الميكانيزم بالظبط وفوقيه
افكار اخرى هدية وفعلا في ناس
كتير محتاجين ربنا يهديهم من عنده
السلام عليكم
فتاة الجنة
يعني ياقمر انا مصعبتش عليكي
ينام ياستي بس بعيد عننا
وبعدين انا اللي قعدت الاول
هاشوف مكان تاني ازاي يعني
وولاد الناس اعتقد بيكون عندهم
شوية من الذوق والحياء والدم
كفاية كدا عليهم
المهم انك نورتيني ياقمر
السلام عليكم
saso
اهلا ياقمراية ازيك
الله يبارك فيكي وهو انا
صراحة مالحقتش اعمل التظلم
الحمد لله وفعلا اللي ليه حق
لازم يتمسك بيه
ومالحقتش ياقمر اخد كرسيين لا الوقت
ولا ظروف المواصلات سمحتلي بس بحاول
يكون دا نظامي دايما شرفتيني ياسكر
السلام عليكم
Post a Comment