الفترة اللي فاتت قابلت كم وجوه مستغربة ماشاء الله
يحسسو الواحد انه هابط عليهم من كوكب آخر ولا حاجة
انك فى المواصلات لو فجاة لقيتي جمبك واحد ومالحقتيش
تاخدي المكانين وحطيتي شنطتك بينك وبينه تبصي تلاقي
وجوه مستغربة
انك تقولي لسواق لو سمحت ولا بعد اذنك ودا طبع مش تريقة
تبصي تلاقي ازبهلال على وجوه الجميع ولا اكنك بتغلطي فيه
وكل الوجوه مستغربة
انك تدخل مكان لاول مرة وتلاحظ اي حاجة غلط وتحاول تصلح
تبص تلاقي وجوه مستغربة
البنات ايه دا لا بجد ايه دا دخلت لدكتور لقيت شوية بنات قاعدين
وحاطين رجل على رجل عادي يعني ماهو سامحلهم بكدا والاقي
اللي تقولي اتفضلي وخدي راحتك مالك قاعدة متكتفة كدا ولما قولتلهم
عيب اقعد كدا قدام حد بصيت لقيت وجوه متكهربة مش بس مستغربة
نظرا لقلة خروجي الا لاماكن معينة وقلة الاختلاط بالناس نتيجة دا
ان فى بعض الكلمات والمصطلحات الدارجة بين الناس ماعرفهاش
وماعرفش معناها ولا اعرف انها مصطلحات عادية شوفو بئا لما تبقو
عاملين زي الاطفال اللي كل ماتقولولهم كلمة يقولوكم يعني ايه وطبعا
هاتلاقو وجوه مزبهلة ومستغربة :)
اول مارجعت قولت لماما يعني ايه الكلام دا الناس افتكروني هبلة :))
فى مرة اضطريت ابات مع واحدة صاحبتي فى بيت طالبات فكروني بايام
المدينة الجامعية فى قنا المشكلة مش بعرف ابات بعيد عن البيت وممكن
افضل ايام صاحية المهم جيت الفجر قولت اصحيهم فاابصحي صاحبتي
الاول قومي ياقمر قومي ياحبيبتي الفجر هاياذن وبلعبلها فى شعرها
ماما اللي عودتني على الحركات دي اللي جات على دماغي :))
المهم بقولها قومي ربنا يصلح حالك ويرضى عنك قومي ربنا يرزقك
بالزوج الصالح بصيت لقيتها قاعدة قدامي زي مايكون صاحية من ساعة :))
قولتلها يعني خلاص كان لازم الدعوة دي لقيتها بتقولي انتي بتعملي ايه
ولقيت وش مستغرب استغراب عجيب قولتلها ايه بصحيكي علشان الفجر
قالتلي حد يصحي حد بحنية كدا استغفر الله العظيم قولتلها معلش يعني
بس اصحيكي ازاي قالتلي احنا هنا اللي بيصحي حد بيصحيه بالشخط
والنطر والصوت العالي قولتلها وبتصحو يعني قالتلي لا :)) وبطريقتك
دي صحتيني وكدا مش هاينفع قولتلها انا هاقوم دلوقتي ارجع بيتنا تعبتوني :))
دخلت عند دكتور من بنها بعتني ليه دكتور تاني عندنا فى بني سويف علشان
اشوف حاجة قالي عليها دكتور فى القاهرة :)) معلش اصلهم بيلففوني كعب داير
المهم عزم عليا بحاجة قولتله جزاكم الله خيرا قالي شكلك اخوان :) طبعا هو بصلي
لقاني طبعا مستغربة :)
:)ماهو طبيعي بقيت ببص لنفسي يمكن نسيت وكتبت على وشي الشعار
بس بجد بتمنى ييجي عليا وقت ماخرجش من بيتي ابدا لا لضرورة
ولا لغيره كنت عارفة اني بيتوتية اوي لكن مكنتش اعرف انه اوي اووي يعني:)
اقل كلمة واقل موقف واقل تصرف من اي حد ماعرفش الدموع دي بتيجي منين
وكأن الدموع دي ببلاش :) على راي البت عاشقة تقولي انتي تتعبي تعيطي
تحزني تعيطي والمصيبة تنكسفي تعيطي كانت هاتعيطلي سلف والله :))
مش عارفة ليه الاستغراب اكيد في من النوع دا كتير يعني وبعدين :)
هو مش بيكون قدام حد بس احيانا مش بحكمها ولو دا اللي زي مابيقولو ضعف
شخصية ماينفعش فى ايامنا دي فانا بعترف اني كدا ومش هاتغير انا عارفة
لكن خير هاحاول ان شاء الله فترة وتعدي وهانتحمل ان شاء الله
لحد ماننجز ونقعد بكرامتنا :) اه نسيت اقولكم مرة واحدة بتقولي لما انتي مش
هاتشتغلي باللي بتعمليه دا لازمته ايه قولتلها علشان ان شاء الله اولادي بعد كدا
قالتلي يعني الجيولوجيا هاتعمل لأولادك ايه قولتلها على سر خطير
اني ناوية ان شاء الله اطلعهم متسلقي جبال :)) ونظرا للظروف الاقتصادية
وازمة السكن العالمية فانا حاجزة جبل حلو كدا فى الصحرا الغربية هانعيش
ان شاء الله فوق السفح بتاعه اهو على الاقل محدش هايطالبنا بايجار
شوفتو بئا فايدة الجيولوجيا محدش بئا يطمع اتوسطله فى حجز جبل ولا حاجة
دا لابناء العاملين هناك بس :))
المهم طبعا دعواتكم كتير بجد مش مستقرة نهائي لا صحيا ولا معنويا
لكن خير ان شاء الله المخ الصعيدي مصمم يستمر:) والله المستعان
معلش يمكن حكاوي ماتهمش وماتفدش حد بس حبيت احكيها وكمان بحاول
بقدر الامكان ماغبش كتير عن المدونة وربنا ييسر
21 comments:
هههههههههههههههههههههههههههههههههههههههه
اول ضحكه واول تعليق كمان
انا عارفه احساس انك تتعملى وكأنهم مستوردينك من كوكب تانى مش من الارض
واضح ان قلة خروجك خلتك غير مواكبه للتطور انتى لو اعدتى اسبوع فى البيت الدنيا بتتشال وتتغير فيه
يالا ربنا معاكى لسه ياما هتشوفى ومش اللى حوليكى هم اللى هيستغربو بس انتى استغرابك هيكون اكتررررررررررررررر بكتير
تحياتى
غرباء
اللهم احينا فى هذا الزمن غرباء
انت صح
طالمه غريبه عن هؤلاء
جعلك الله من غرباء هذا الزمن
:)
جميل
جميل ان الواحد برغم اختلاطه اللى مش اوى يحافظ على اللى اتربى عليه وفطر عليه
ومش مهم بقى رأى الناس
المهم انه يتعلم من الحياة اللى يقدر يمشيه فيها
واللى يقدر يأمن بيه ويحذر من الناس
ومش عارف الناس اللى دمعتهم قريبة دول ليه كده :)
بس ليها فوائد كتير
بتنضف العين
:)))
لا صحيح بتعبر عن حاجات كتير
وجميل هدف دراسة الجولجيا
هدف اقتصادى بحت :)
وحضرتك دعى من يستغربون يستغربون
فهؤلاء هم الغرباء لا نحن
هم من تخلوا عن مسايرة الكون
ومسايرة نواميسه
وتخلوا عن كل الكائنات التى ما عرفت غير هذا الطريق
ثبتكم الله
كل ده شايفاه وشايلاه في نفسك وساكتة
يا بنوتة ده طبيعي جدا
لكن ميخلكيش توصلي لمرحلة انك تتمنى انك متنزليش من بيتكم الا للضرورة
فقد قال رسول الله صلى الله عليه وسلم "المسلم الذى يخالط الناس ويصبر على آذاهم ..... خير من المسلم الذى لا يخالط الناس ولا يصبر على آذاهم "
فكوني مسلمة معتزة بنفسك .. ولا تغيري شيئاً حسنا تعودي عليه لتواكبي عصرك كما يقال
فكوني في الارض ثابتة وفوق الارض مثمرة
دمتي بخير صحة وعافية
مش عارف انا اقول ايه دا كل سطر انتى كاتباه محتاج تعليق لوحده انا ازبهليت لما قريت ونسيت كنت هاقول ايه يووووووه مين اللى بيزبهل ده
اهم حاجه انتى بتحيبى الصور دى منين
بنوتى الجميلة
اولا بوستك جميل اوى
فعلا
ان بردوا باشوف الوجوه دى كتير
لحد ما بقت
عاااااااااااااادى
و مبقتش استغرب لما اشوف ناس مستغربة
هههههههههههههههههههههه
ربنا معاكى حبيبتى و يخفف عنك يارب
خالص ودى يا جميل
ربنا ييسر؟؟
انتي اخوان .......ههههههههههه
ياحبيبتي الموضوع وما فيه ان الناس اللي عندها ثوابت او زي زمان كده عرف عام انقرضت من الاف الايام
من ايام عصر البريكامبريان
اللي هيخليكي متشوفيش نفسك غريبة
ويخليكي تقدري تعايشي الناس
هوا انك تعترفي بالواقع وبان الناس الايلينت كترو اليومين دول
ويبقي هدفك الناس اللي تقدري تقنعيهم بالانضمام للارض مرة اخري
كنت ديما اتسائل ليه فعلا بشعر بحاله "ازبهلال" و"اندهاش" الا انى اكتشفت انها حالة جمود فالبعض يخاف يضحك الا يستطيع ان "يكشر" تانى :-((
لكن ف الحقيقه فان الامر لا يعدو كونه أحتجاجاً ع الزوق ف عصر قل فيه الزوء ..
اممم
بتقولى المدونات ليها ودان
فنقول بس خلاص هوس
هههههههههههههه
السلام عليكم
لها ودان؟
ربنا يستر
كنت لسة هقولك الصبح هعمل مدونةان شا الله بس ملحقتش
فعلا حكاية لو سمحت دى بئت غريبة بس يعنى مجاتش ع دى
ساعات بحس ان الناس لو مش شايفين ال قدامهم دا شبههم يبئا كائن تانى
وع العموم مش هطول عليكى من اول كومنت
سررت بوجودى ف مدونتك
السلام عليكم
gana magdy
اهلا اهلا بالقمر
واهلا بضحكتك كمان منورانا :)
والحقيقة والله قلة خروجي عاملة فيا
كتير اوي :) لكن انا حابة كدا جدا
وفعلا انا كمان بستغرب لحاجات كتير
بس انا رد فعلي مش بيبان اوي
علشان كدا الناس مش بتاخد بالها
لكن خير ادينا بنتفرج وناخد خبرة :)
ام البنات
اهلا بحضرتك ياامي
وفعلا وصف غرباء كويس اوي وماشي :)
واتمنى فعلا اكون صح او افضل
ثابتة على الصح دا الله المستعان
واللهم امين ربنا يتقبل من حضرتك
واياكي يارب اللهم امين
هممممممممم
يبدو إن أنا هبقى من الوجوه المستغربة دي
إني إزاي مشفتش البلوج ده قبل كده :)
تحياتي ليكي
امام الجيل
اهلا يافندم
وبنحاول والله نحافظ على فطرتنا
دا حتى الاختلاط القليل دا لان الواحد
بيشوف حاجات كتير غريبة عليه
فابالعكس الواحد بيتمسك اكتر بفطرته
وراي الناس مش شاغلنا اوي بس زي
ماحضرتك قولت اننا نتعلم اللي
يمشينا ويخلينا نامن ونحذر من الناس
دا اللي صراحة مش عارفة هاقدر اكتسبه
ولالا ربنا يسترها فعلا دي مشكلة عندي
وبالنسبة للدموع بئا :)
اللي مش بتنتظر ومابتصدق حقيقي
ليها معاني كتير منها ان بعض
الناس بتعتبرها نكد :))
لكن والله هي بتيجي كدا مش بارادة
الواحد يعني والحمد لله مش ديما بتكون
قدام حد الا فى اوقات معينة :)
والجيولوجيا الحقيقة اهدافها متعددة
بس وقتها الرد دا اللي طلع مني :)
وهو اقتصادي بحت بس مهم جدا طبعا :)
وعلى فكرة بقلق لما حضرتك
بتقلب بالفصحى اذ فجاتن كدا :))
علشان مرة في كلمات مافهمتهاش بس
يعني عملت فاهمة ماتقولكش بئا يافندم:)
بس فهمت المرة دي الحمد لله:)
والحمد لله قلة الاختلاط بردو خلتني
يعني مش بهتم بتصرفات الناس اوي غير
فى الضروريات فقط يعني والله المستعان
ربنا يثبتنا واياكم يارب
والمسلمين اجمعين ..اللهم امين
بنت ابيها
اهلا ياقمر حوشتيني من امبارح :))
شوفتي انا كاتمة جوايا اد ايه :))
بس انتي مافهمتنيش ياقمراية
انا ماقصدتش ان تصرفات الناس دي
هي اللي مخلياني مش عايزة اخرج
لا دا طبع فيا انا بيتوتية زيادة:)
وعندك حق فى كل اللي قولتيه ولله الحمد
وقت مابنخرج يعني بنحاول بقدر الامكان
نكون اد اي وضع او مسؤلية خصوصا
لو وضعي كابنت مسلمة يعني نسال
الله الثبات اللهم امين
وهاحاول اواكب عصري حاضر :)
فكرتيني بابن عمتي ديما يقولي
انتي بتتكلمي زي امي وجدتي :))
يلا حسن الختام بئا :)
ودمتي بالف صحة وعافية حبيبتي يارب
ابو عمار السويفي
اهلا باهل بني سويف متجمعين يارب ديما
وكان المفروض تعلق على كل سطر :)
يلا خير هانعديها المرة دي
وصور الاطفال دي كنز عندي ومش
هاقولك طبعا جبتها منين :)
سول ويسبر
حبيبتي اهلا بيكي ياقمر
ولو البوست جميل انتي اجمل ياكتثبتي :)
ومش عارفة هاوصل لمرحلة العادي
دي امتى ربنا يسهل ان شاء الله :)
وربنا يتقبل منك حبيبتي
ادعيلي كتير ربنا يكرمك يارب :)
مسملة وافتخر
اهل بني سويف وخليفتي فى الملاعب
قصدي فى الجيولوجيا :))
ايه ياقمر انا اخوااان ؟؟؟؟
طب انتي شايفة ايييييييييه :))
بلاش شاسفة ايه انتي تعرفي عني ايه :)
وعندك حق فعلا احساس جيولوجي
عالي اوي احب اللي يفهمني
هما فعلا الناس بيحسسوني اني
من عصر البريكامبريان والبرميان كمان
وهما من الكواترناري ريسنت :))
ومش عارفة بجد ياقمر هاقدر اتعايش
مع كال الوقاع اللي بشوفه دا
حقيقي اشك انا بتعامل مع اللي
بقدر اتعامل معاه اكتر من كدا
خليني بعيد عن ارض الواقع احسن :)
نورتيني ياقمراية هاشوفك امتى بئا
مش بتنزلي الكلية ليييييه :)
احمد عمر
اهلا يافندم بحضرتك شرفتنا
كلام حضرتك مظبوط وهو فعلا
عصر قل فيه الذوق بس الحمد لله
لسه فيه شوية فاضلين اتمنى مانينتهوش
اللي تشوفه
ايه النور دا بجد
يعني اول يوم اتعرف عليكي فيه
تعملي مدونتك فيه :) يامحاسن الصدف
ومعلش ياقمر معذرة بجد النت فصل
عندي الصبح ونا بكلمك خير يعني :)
وبالنسبة للناس فعلا كل واحد بيكون
عايز اللي قدامه شبهه او زيه فى
تصرفاته علشان يقدر يتعامل معاه
ودا صعب علينا اوي يلا خير ربنا يرحمنا
وعلى فكرة المدونة ليها ودان اه :))
وكبرت دلوقتي وبئا ليها عنين ومناخير :))
وطولي براحتك ياقمر احنا نطول
دي المدونة نورت وقربت تولع بوجودك :)) ياريت اشوفك ديما
وربنا يوفقك فى عالم التدوين :)
حسام غانم
اهلا بيك يافندم شرفتنا
ويبدو اني كمان هاستغرب
ازاي فعلا ماشوفتهاش :)
عموما خير نتمنى ان شاء الله
تفيدكم ولو بكلمة واحدة
ومدونة حضرتك كمان كويسة جدا
ربنا يوفقك ان شاء الله
طوبى للغرباء
الواحد فعلا ساعات بيحس إنه هبط من الفضاء والمركب بتاعته تاهت في الزحمة ومكتوب عليه يعيش وسط الناس العجيبة دي
أنا مرة كنت قاعده أنا و أم لزميل أولادي وقت التمارين في النادي
وبعدين الجرسون وقف جنبنا وقلتله : لو سمحت عايز واحده قهوة
لقيت الست بصتلي حتة دين بصة وقالتلي :
ما تقوليله يتفضل يقعد معانا
قلتلها : أفندم؟
قالتلي : انتي بتكلمي
جرسون ولكل مقام مقال
قلتلها : وعلشان هو جرسون لازم ارقعله صداغه مثلا؟؟؟؟
قالتلي لا بس مش لازم لو تسمح ومن فضلك
مردتش والحمدلله ابني غير نشاطه الرياضي بنشاط في نادي تاني
تعرفي يا فتاتي انا دايما التاكسي بيمشي ويسيبني وميدينيش فرصة اقوله عايز اروح فين علشان بابتدي الكلام : ممكن لو تمسح توديني
اوبس
الاقيه رفع ايده ومشى وسابني
تفتكري لو مسكت ورقه وقلم وعملت اني باكتب النمر وقلتله عالقسم يا ابن ال.............
حيوصلني؟؟؟؟
سبحانك ياربي القيم ابتدلت في البلد دي
Post a Comment