هل الحياة فعلا فرص ولازم ننتهزها ؟
وهل كل فرصة تجيلنا تبقى مناسبة لينا؟
طب وهل لو رفضناها هانعرف نقنع اللي حوالينا ؟
حاولو تتخيلو معايا وتوصوله للي عايزة اقوله لاني مش
هاعرف اوضح انا عايزة اقول ايه فى كلام من قلة مابتكلم:)
المهم تخيلو كدا انكم عايشين عيشة الحمد لله بسيطة ولكنها راقية
والرقي بالنسبالي ليس رقي مادي ولكن الرقي رقي اخلاقيات ومعاملات
وسلوكيات ورغم بساطة الحياة اللي عايشنها دي الا انها لله الحمد انتو فيها
افضل حالا من ناس كتير ومرتاحين ومبسوطين فى ظل كل البساطة
دي وفجأة جاتلكم فرصة لو مشيتو فيها هاتوصوله لمكانة اعلى ممكن علميا
ثم ماديا ثم اجتماعيا اهي فرصة من وجهة نظر اي حد ماتتعوضش
ملحوظة صوغننة لو على المكانة العلمية تقدر تحققها من غير الفرصة دي
بعون الله وواحدة واحدة المهم بئا بالفرصة دي ممكن
تلاقو نفسكم زي الناس اللي بيقولوه عليهم كبار دول اللي مش بيبصو
للناس اللي على الارض ونيجي بئا للمشكلة فى الموضوع واللي عايزة اوصله
هل كل انسان اتعود على الحياة البسيطة يقدر يتعود على هذه الحياة ايضا
لما تقعد كدا تعيد فى شريط حياتك وتفتكر مواقف كتير اوي لدكتور جامعة
بيعاملك كاطالب باسلوب انت مين علشان تقف قدامي وتتكلم معايا
ولما تجيلك فرصة تقابل مسئول معروف وتلاقيه بيعامل كل من حوله
بطريقة دونية وكانه فى السما وباقي خلق الله فى الارض مع ان امكانياتك
اللي وصلتك تكون واقف قدامه كدا يعني فى الوقت دا لا تقل عنه فى شىء
بل تزيد كمان تخيل كمان انه ييجي عليك وقت تكون مقيد ومحكوم فى
تصرفاتك وفى تتعامل مع مين ولا تتعامل مع مين ووقتك كله مش ملكك تفتكرو
هاتقدرو على كدا ؟ تفتكرو هاتقدرو تسيبو كل البساطة اللي عشتوها دي تقدرو تسيبو
فرصة دعوة حلوة من حد بسيط قدرتو تساعدوه فى شىء هاتقولولي ماحنا فى مكانتنا
دي نقدر نساعد الناس البسيطة اكتر هاقولكم معلش وقتها النفوس بتختلف والا مكنش
يبقى في فقير فيكي يامصر وكمان ايه ضمنكم تقدرو تتمسكو بصفاتكم دي فى ظل كل الجو
اللي حواليكم دا وانكم ماتتطبعوش بطباعهم دي وحتى لو قدرتو هاييجي عليكم وقت
ماتقدروش تستمرو لان دنيتنا دي مش سهلة اذا مكنش في حد حوالينا بيساعدنا ويشجعنا
على الصح ممكن ييجي علينا وقت ونضعف مفيش احلى من روح الجماعة
كان في نقط كتير عايزة اقولها بس مش هاطول عليكم بس عايزة كمان
اقولكم على حاجة بردو تخلي الواحد يظل متردد وهي لو رفضت الفرصة دي
هل تعبتر رافض للنعمة وزي مابيقوله كدا بتضربها برجليك وانك
لا تستحقها خصوصا لو زي ماقولت فرصة فى ظاهرها لا تعوض
وهاعتبر اني لا استحقها فامن الممكن تكون لغيري كلها اقدار ربنا
فى نقطة كمان معلش هاتقل عليكم شوية كمان بس محتاجة رئيكم
النقطة دي اتكلمت فيها مع مدوناناية حبيبتي كانت بتسالني مالي وهي عارفة
القصة وفاكره اني مبسوطة بيها واني خلاص بئا هاجيب اسمه ايه من ودانه
محدش يسال ايه دا علشان مش عارفة واضح اني بدئت افصل المهم :)
لما حكيتلها قدرت كلامي اوي وقالتلي فى نقطة كمان ليه مايكونش الفرصة
دي استخلاف لربنا لينا فى الارض وهاحاول اختصر الحوار عليكم
قصدها ان ليه الاماكن المهمة دي مايوصلهاش من يمثل دينا صح
قولتلها مافيها المسلمين وللاسف اتطبعو بطباع غيرهم جات علينا يعني
قالتلي ماهو دا سبب ضياعنا الحقيقة الموضوع بجد محير جدا وحبيت
اشركم فيه وبجد في نقط كتير مخلياني مترددة بس مش هاينفع اذكرها كلها
كفاية عليكم كدا عايزة بس اقول اخر حاجة وياريت الناس بتوع حقوق
المراة مايخدوش الكلام عليهم كل واحد حر فى مبادئة وطريقة تفكيرة
رغم ان المبادىء والدين مابيتجزئش لكن عايزة اقول ان مش كل فرصة
تيجي لكل بنت تبقى مناسبة ومش هاقول اكتر من كدا فى وظايف
ربنا امرنا بيها ونقدر ننجز اوي فيها وهاتوصلنا للجنة مش لمنصب ولا جاه
اعتقد مفيش احلى من كدا ربنا بس ينولهالنا واياكم ان شاء الله
طولت عليكم انا عارفة مع اني اختصرت يلا تعيشو وتاخده غيرها :) دعواتكم بئا
شوفو الطمع :)
صحيح البوست اللي فات رغم ان كل كلمه وجمله كان وراهم حاجات كتير اوي
في ناس فهمت وناس اعتبرته جنان وانا حابة اسوق فيها لان العقل مش نافع
اليومين دول :)) فانا هانتهز الفرصة واعيش الجنان شوية يمكن اشعر براحة
يلا بئا انتو رغايين اوي كدا ليه تصدقو طلع فى دماغي اقوم اعمل صنية مسقعة
بمناسبة الجنان والبتنجان يعني مع ان سي السيد مش بيحبه بس ماعلينا
الا صحيح ياجماعة هي الناس ذوي السيارات الفارهه والفلل والشاليهات
والبودي جاردات دول بياكلو مسقعة ؟ اكيد لا ودا سبب كافي يخلينا
مانحبش نبقى منهم اللهم احينا وامتنا فقراء وكتر من مسقعاتنا يارب
جنان جنان يعني ربنا يشفي
14 comments:
أحجززززززززززززززز
أول تعليق
هييييييييييييييييييييييه
حجزت
حجزت
هييييييييييييه
ياما أنت كريم يارب
ههههههههههههههههههههههه
أروح أقرأ بئا
صافى
بجد الموضوع فعلا صعب جدا
و محير جدا جدا
و بتبئى متحيرة و مشتتة
و مش شرط بنت
أنا أعرف شخص
راجل مش بنت
:)
و رفض العرض بردوا تقريبا لنفس الاسباب
بس الوقتى فعلا النية مهمة جدا
و كمان الصحبة زى ما ذكرتى
بصى ..تقريبا أنتى ذكرتى كل اللى عاوزة أقوله
و مش عارفة لو فصلت فى كل نقطة هأعمل كام بوست على بعضه
ههههههههههههههههههههههههههه
بس المهم
لازم نحط فى دماغنا
إن فعلا اللى عاوز يوصل لمكانة يقدر يحقق من خلالها شئ
محافظا على دينه
لازم يتحارب
فهل انتى عندك القابلية لكدا
و عندك الاستعداد؟؟
و هل ناقشتى الناس القريبة منك فى النقطة دى؟؟؟
أعتقد الموضوع بردوا عاوز مناقشات أكتر من كدا
أنا هأبعت للناس اللى عندى
يمكن نوصل لرؤية أفضل
دمتى بود يا قمرى
بسم الله
يعنى هو طبعا تبعا لان الواحد مش عارف التفاصيل فيعلق طبقا للى فهمه من حيث المبدأ
يعنى هى كل حاجة تقدر بقدرها يعنى لو فيها نفع كبير
علميا
ثم ماديا
ثم اجتماعيا
وفيه ناس خاضوها قبل كده وماثرتش عليهم بل هما اللى تركوا اثر فيها يبقى ليه لا
وليه نشوف نسيب مثل هذه المناطق والمكانات لناس تانية قد نكون نحن اقدر منهم لذلك
ناس ممكن يكونوا عندهم صفات علمية بس معندهمش صفات اخلاقية واجتماعية راقية وبمعنى الرقى اللى حضرتك اشرتى ليه
بس اذا كان هذه المكانة وهذا الوضع هيؤثر ويغير ومفيهوش حدود تخلى الواحد يتمسك بما هو فيه سواء من ثوابت او من اضافات شخصية اضفاها على شخصيته وتميزه او فطر عليها
يبقى الاخرة خير وابقى
لان الانسان ده اغلى ما فى الكون وتأتى هذه الميزات التى يتميز بها على كافة الكائنات لتعلى من شأنه وتميزه بحق
فان تخلى عن كل هذا فصار مثل الجميع
فقد تنازل قد لا يكون اجرم ولكن تنازل
يعنى نقول حل وسط
اذا هذه المكانة الجديدة ستعرض حضرتك لاى نوع من التنازل سواء حاليا او مستقبلا فاعتقد انها ستكون بداية التنازلات وهذه التنازلات قد تكون بسيطة جدا مش فى ثوابت بس اذا بدأ شئ بتنازل فما بعده سيكون اشد
بس اذا الامر اهون من ذلك ومفيش تنازل ولا حاجة وفيه تجارب سبقت وانجزن واضفت كمان الخير للمكان والمكانة دى
يبقى تخلينا عنها سيكون ربما تقصير كمان
لان دى فرص زى ما حضرتك ذكرتى
يعنى حضرتك اوزنيها بمقياس الدنيا والاخرة او بالاحرى بمقياس الاخرة
وبالنسبة لنقطة ان مش كل الاعمال تصلح للمراة فعند حضرتك حق واعتقد اسوء شئ ان المراة تفقد ما يميزها وهو حيائها اللى للاسف بيقل ويتلاشى احيانا بكثرة مخالطة الرجال
برضه بقدر يعنى فيه اللى بتخالط رجال كتير بحكم عملها ومحافظة على ما هى فيه
يعنى
نصيحة اخيرة
حضرتك فكرى فى القرار ده بناء على مستقبلك وعلى شخصيتك وعلى حضرتك فى الفترة دى بس دون النظر الى المستقبل وما قد يحدث فيه من تطورات لانها من عند الله وغير مامونة العواقب يعنى المهم حضرتك فكرى فى نفسك وما سيعود عليها وما سيزيد فيها وما ستتخلى عنه ان كان الامر يستدعى ذلك
يعنى فى النهاية الامر بس حضرتك اللى ممكن تفصلى فيه عشان حضرتك الى تعرفى تفاصيله
نسأل الله ان يهديك الى ما فيه رضاه
واستعينى بالله قبل كل شئ
فهو نعم المولى ونعم النصير
بس مش عايزين المكانة دى تخلى حضرتك متدعيلناش بعد كده ولا حاجة
:)))
السلام عليكم
بالطبع عندك حق في تخوفك
بس انا سمعت مره انسان بيقول
شوفو اليهود بقو فين من حكم العالم
مسيطرين
متحكمين في كل شئ
وده يرجع في الاساس لقوتهم الماديه
كمان بيخدعوا المسلمين بان الانسان المفروض يعيش فقير ويموت ممعهوش حق الدفن مع ان القران الكريم ذكر فيه الغني وحث علي اكتساب المال والجاه
امال هنجهز الجيوش ازاي
وهنساعد المحتاجين منين
هنبني نفسنا بايه
ولا هنفضل نستني المعونه
خدي كلامي العام
وطبقيه بوجه خاص
طالما انت انسانه كويسه وعارفه نفسك ربنا هيقدرك
كمان طالما عندك النيه للكويس
اكيد ربنا هيعينك
وفي الاخر
انت الوحيده صاحبة القرار
ورأيي مجرد رأي
تحياتي
وعلي فكره
سول هي اللي وصلتني ليكي بشكرها لانكم متفرقوش عن بعض
من لا يستطيع أن يواجه يهزم
الحياه نوع من الصراع على مستويات مختلفه
ولكل أنسان طاقته
كونى قويه تهزمى من يقف فى طريقك
وتنتصرى انتى
دمتى بكل أحترام
سووووووووول كتثبتي حبيبتي
والله بتفرحيني بالهيصة اللي بتيجي بيها دي :) وتحجزي واول تعليق ومحسساني ان المدونة بكل الاهمية دي علشان تلحقي اول تعليق بجد ربنا يكرمك وماتحرمش من وجودك يارب :)) وتعيشي وتحجزي
وبالنسبة للموضوع يمكن انتي تعرفي
التفاصيل وحكيتلك كل حاجة تقريبا
فاهاتقدري اكتر انا اختصرت بس علشان ماطولش على الناس ويملو من الحكاية
بس زي ماقولتي فعلا
إن فعلا اللى عاوز يوصل لمكانة يقدر يحقق من خلالها شئ
محافظا على دينه
لازم يتحارب
ولو على الاستعداد لحاجة زي دي والقابلية فالحمد لله بل بالعكس انا بفضل الله لما بتحمس لشىء واقتنع اني هاقدر انجز فيه بنجز فعلا ومش بفتخر بس بقول اني فعلا اقدر لو عايزة
لكن المشكلة فى شخصيتي انا انها يااما مش هاتقدر تستمر لان الناس هي اللي مش هاتستحملني لانهم مش هايقدرو يغيروني وانا ليا صفات ماتنفعش مع الناس دي وانتي عارفة كويس
ياما بئا هاضطر اتغير علشان المصلحة والفرصة دي وانا عندي شخصيتي ومبادئي اهم حتى لو دا هايعتبر جنان مني
وزي مابيقوله اني خياليه زيادة عن اللزوم ودا مش هاينفعني ولكن اعتقد
ان فعلا رحم الله امروء عرف قدر نفسه
ولو على راي القريبين مني فاهما سايبنلي حرية الاختيار لكن زي ماقولت شايفنها فرصة بس مش متخيلين اللي انا بقوله لاني مش بحكي كتير عن اللي جوايا لكن فى النهاية هم الحمد لله اهم شىء عندهم راحتي والله المستعان
ربنا يلهمنا الصواب باذن الله
والناس بدئت تيجي من ريحتك اهي
ربنا يكرمك حبيبتي مانتحرمش ابدا
:)
امام الجيل
اهلا بحضرتك يافندم
معلش انا اختصرت بس لاني كنت هاطول اوي وخوفت الناس تمل بسرعة من الحكاية
لكن انا هاقول لحضرتك الموضوع وما فيه ان جاتلي منحة مقدمة من اكاديمية البحث العلمي لدراسة الماجستير وبترشيح من الكلية طبعا الاكاديمية هي اللي بتحدد الاماكن البحثية للباحثين
والماكن اللي اتحدد ليا كان فى
( هيئة الطاقة الذرية قسم مواد حارة ووقود نووي )
ونحط تحت كلمة نووي دي مية قنبلة :))
علشان كان ممكن فى يوم من الايام تلاقو امريكا اقتحمت المدونات ولا حاجة بحثا عن بنات افكاري لانها دخلت اسلحة دمار شامل البلد ولا حاجة :))
ادي الحكاية طبعا هاتكون دراسة وبعدين عمل
والفرصة فعلا هايكون فيها نفع علمي ثم مادي ثم اجتماعي ولكن لما فكرت لقيت ان الاضرار ممكن تكون اكبر ولو على النفع العلمي بفضل الله هانكمل ونقدر واحدة واحدة نوصله اما بالنسبة للمادي والاجتماعي فالاني عمري مافكرت فيهم مش قادرة اديهم اي اهتمام ممكن يكون دا غلط بس انا حاسة اني بوضعي دا لله الحمد مرتاحة اوي ومبسوطة بفضل الله عليا يعني
والحقيقة انا لما دخلت المكان لقيت الناس كلها هيئة واحدة وخصوصا النساء منهم ولا اعتقد ان فيه حد ممكن يكون كان ليه نفس فكري واستمر بهذا الفكر والله اعلم طبعا ولكن هاخليني فى نفسي لان المشكلة فيا انا اكتر
انا بشخصيتي دي ماعتقدش اني هاقدر استمر قد يكون دا دليل على ضعف شخصيتي وبعترف بكدا ولكني بردو لا اعتبر الضعف اللي من النوع دا عيب لان دي خلقة ربنا انا لقيت نفسي كدا وبعدين انا بتصرف ببساطة ماتنفعش مع كل الناس يعني مثلا فى مرة قولت لدكتور فى جامعة القاهرة كان بيكلمنا ومش عارفة استخف بعقولنا زيادة وسرح حبتين فامصدقتوش مش اسكت وخلاص لا قولتله على فكرة يادكتور اللي بيكدب بيروح النار :) يعني كنت خلاص على راي زمايلي كان ناقص اضربه على ايده واقوله كدا غلط دا تصرف عفوي مني ومااكتر تصرفاتي دي فى الوقت دا الدكتور لانه احرج وعارف انه غلط اخد الموضوع هزار لكن ماعتقدش اني فى مكان زي دا لو قولت لمشرفي او حد من العاملين حاجة زي دي هايفهم ويقدر اني فعلا ماقصدش وبتكلم عادي عيلة يعني من الاخر ومحدش ياخد على كلامها :)
وكمان نقطة الاختلاط دي مشكلة كبيرة عندي وسببتلي مشاكل كتير ان حتى دكاترتي مكنتش بقدر اسالهم فى اي حاجة حتى لو ايه الا لو معايا حد انا حتى ماعرفش اروح اشتري حاجة من مكان واقف فيه واحد حاجة صعبة يعني بجد واوفر انا عارفة بس هاتخليني اكيد اقصر فى عملي لو استمريت ياما بئا اتغير ودا لاممكن ابدا :) وعلشان كدا كنت بفضل تكون مشرفي دكتورة وكنت ناوية على كدا
كمان الناس دول وفى القسم دا بالذات عليهم ضغط امني جامد والمكان نفسه لا وعرفت كمان ان ممكن الواحد يبات جنب التجارب لحد ماتخلص يعني حاجة صعبة عليا
انا علشان اتدرب فى مركز بحوث البترول شهر وانا فى سنة رابعة خليت ماما اخدت شهر اجازة وفعدته معايا فى القاهرة اخليها بئا تاخد اجازة سنتين وتقعد معايا دا لو عرفت تشوفني اصلا :)) بجد حاجة صعبة يعني
كمان مستقبليا ودي لازم الواحد يفكر فيها ان الناس دول معرضين للسفر خارج البلد فى اي وقت هل وقتها هاقدر اقولهم ديني يمنعني وعاداتي ومحرم وكلام من دا ماعتقدش هايسمعه وهتبدء المشاكل اما اني هاتخلى عن مبدء من مبادئي او اني هاتخلى عن العمل كله بعد مابدءت فيه وفى كلتا الحالتين حاجة مش حلوة وكمان حتى لو كنت متزوجة يعني ولنفرض الراجل دا تحت امرهم فى اي وقت يسيب حاله ويسافر معايا ولا حتى يسمحلي اسافر الموضوع كبير فعلا ومش سهل
وفى نقط كتير بس كدا طولت على حضرتك اوي نيجي للنقط اللي ذكرتها حضرتك
ان فعلا ماينفعش نسيب الاماكن دي لناس قد يكونو مميزين علميا فقط ولكن كمان لازم اللي هايمثلنا فى الاماكن دي يكون قادر على الوقوف امام كل الظروف اللي هاتقابله يعني حد قوي بجد
ومن وجهة نظري كابنت ماينفعش خالص
ومش هاقدر على البقاء علشان كدا بقول
كفا الله المؤمنين شر القتال
وفعلا حاسة اني هاخسر كتير ماييجي على المعاملة هناك والتشديد وهيئة الناس اللي الواحد فى وسطهم حاسس انه غريب
وفعلا قد ابدا بتنازلات بسيطة لكنها هاتكون البداية فعلا زي ماحضرتك ذكرت
وماسمعتش صراحة عن نساء انجزن واضفن خير للمكان دا قبل كدا والله اعلم بردو قد يكون فيه بس محبوسين ولا حاجة :)
وزي ماشرحت لحضرتك انا فعلا كدا بحاول انظرلها من كل ناحية خصوصا على الحاجات اللي مكن اخسرها خصوصا فى شخصيتي وشايفة ان الفرصة لاتستحق الخسائر البشرية دي كلها :)
قد تكون من نصيب حد يستحقها اكتر مني
انا ابسط من كدا بكتير واتعودت على البساطة دي زي السمكة لو خدوها من البحر وحطوها فى حوض جميل اوي وغالي بس مليان مية معدنية مش هاتعيش
وانا سبحان الله استخرت وروحت وشوفت المكان ودخلت وتقريبا خلصت الاجراءات وفجاة لقيتني مش مرتاحة نهائي بعد كل دا واكتفيت بان ربنا قالي انك قادرة ومش اقل من الناس دي ممكن توصليلهم واكتفيت كمان باني اتعرفت على المكان ودخلته واعتبرته شرف ليا كمان بس
وشايفة انه كفاية عليا كدا لا استحق المزيد ابدا ومازالت المداولات مستمرة :) والله المستعان
ودعاء ايه بئا لا هايبقى فيه دعاء ولا شكلتت ولا اخوات يملو عليا البيت ولا مسجد ولا حلقات يالله اسيب كل دا ازاي ماعتقدش هاقدر دي كلها حاجات بتسمد منها راحتي هناك اجيب كل دا منين
حقيقي احساس الكبرياء والغرور والكلام دا صعب اوي ربنا يعافينا يارب
ويرزقنا الاخلاص اللهم امين ونحاول ننجز فى اي شىء تاني بس ربنا يقدرنا
طولت ورغيت كتير اوي فابعتذر
حضرتك بئا اللي تدعيلنا وانا هابقى افتكركم بحاجة :))
حنان الشافعي
اهلا وسهلا بحضرتك شرفتيني
انا بردو بقول الناس الحلوة دي
اكيد من طرف سووول حبيبتي ربنا
يكرمك على زيادرتك وكلامك
وعندك حق فى كل دا حبيبتي بس هي
المشكلة مش رفض للماديات او المكانة
اد ماهو رفض لاني شخصيتي تتغير من
غير ماحس لظروف العمل والمكان اللي
هاتجبرني على كدا وعندك حق
لو نوايانا كويسة ربنا هايعينا
ان شاء الله وانا والله نيتي
اني لما اتحط فى مكان اكون اده
بس من غير ماخسر نفسي بردو
اتمنى تكوني فهمتيني ياقمر
وان شاء الله ربنا يقدرنا
وننتصر على اليهود وغيرهم مش بس
بالقوة المادية في ماهو اقوى ان شاء
الله وهو دينا واخلاقياتنا اللي بنجاهد
اوي علشان نقدر نتمسك بيهم
والله المستعان ولو اضمن اني
هاقدر اتمسك بيهم فى وسط
كل اللي شفته دا انا هاستمر
من غير ماتردد بس زي ماقولت
انا فعلا شخصيتي غريبة شوية
اتشرفت برايك اوي ويارب
ديما تنوريني كدا وفرحت
بجد بزيارتك ليا ربنا يكرمك
ويارتني اجي حتى جزء من سول
دا كتير عليا اوي يعني :)
mohamed
اهلا بحضرتك يافندم شرفتني بجد
وجزاكم الله خيرا على نصائحك
فعلا الحياة صراعات مختلفة
وفعلا من لا يستطيع ان يقاوم يهزم
ولكل انسان طاقته حقا
وياريتني املك هذه القوة
اللي تخليني اقدر اقاوم
الله المستعان
اهم شىء اكون اد المسؤلية
ربنا يكرمك يافندم شكرا
لزيارتك نورت المدونة
السلام عليكم بنات افكارى
تحياتى
ولو ان الواحد مش فاهم حاجه .. لكن الموضوع هل ننتهز الفرصه .. ام لا ..وهل الفرصه مناسبه ام لا ..
يعنى حاجات من هذا القبيل
انا رأى الاتى
اولا : اذا كانت الفرصه مناسبه وليس فيها ما يغضب الله ورسوله .. فما المانع
ثانيا : الخوف من المستوى المادى المرتفع عشان مش تاكلى مسقعه .. ما تخافيش انت حره كلى اللى انت عايزاه .. مسقعه ممكن .. برضه لحمه ممكن .. لو اسكالوب ممكن .. حتى لو فول وطعميه برضه ممكن
انا مش حاقول الفرصه مناسبه ليكى ولا لأ
لكن زى ما اتفقنا لو لم تغضب الله ورسوله ..انتهزيها ومش حتبقى انتهازيه ولا حاجه ..
هى المشكله فى فرصه علاقات انسانيه .. اذا لم تكن متوازنه فلا والف لا
مثلا : يعنى لو واحد زى حالاتى وكان غنى .. طبعا انا مش غنى ولا حاجه لكن يعنى .. وسنه كبير واتقدم لواحده سنها صغير ... لا لا لا
لكن يا بنات افكارى الانسان انسان وليس ملاك .. قد تكون هذه الفرصه غير مناسبه لى او لك او لغيرنا شخصيا .. ولكن قد نقبلها ما دامت ستنقلنا الى حال افضل .. نحن بشر .. وما دامت لم تغضب الله ورسوله
هذه زيارتى الاولى لك.. وارشدنى الى هذه المدونه اسافوا انوروزا المغربى
تحياتى
اولا جزيتى خيرا يا فندم على التفاصيل
ثانيا : فيه نقطة كنت عايز استفسر عنها وهى طالما ان الدرجة دى حضرتك ممكن توصليلها كده كده طب ايه الفرق ما بين ان حضرتك تخوضيها دلوقتى وبين ان حضرتك تخوضيها درجة درجة اقصد من ناحية المحذورات اللى حضرتك خايفة منها
معلش انا مش عارف الفرق بين ان حضرتك تاخدى المنحة وبين الطريق التانى اصلى تعليم حكومى :))
اقصد يعنى الخوف من ناحية العالم الجديد والترقى العلمى ولا من ناحية الترقى المادى والاحتماعى
انا مع حضرتك ان من حق الواحد يخاف انه يتغير وان مش الكل بيصمد فى كل الظروف وخصوصا اذا كانت قوية
هو الموضوع محير جدا
بس المشكلة ان حضرتك مقررة تقريبا :)
بس يعنى طالما حضرتك استخرتى الله ولقيتى فيه صد يعنى ممكن تبقى النتيجة وضحت
بس اعتقد من شروط الاستخارة عدم الميل القلبى لاى من الطريقين
يعنى اعتقد ان حضرتك اذا رفضتى هذا الطريق فيجب ان حضرتك تكملى حتى فى الطريق اللى ابو خطوة خطوة ده :)
اللى شكله مفيهوش فلوس ده :)
انا على فكرة عندى نفس الفكر العجيب ده :) من حكاية الفلوس انى طالما عايش كويس الحمد لله ومش محتاج يبقى روضا :)
وبرضه الموضوع مش هيقدر يفصل فيه غير حضرتك وبس لان ده مستقبل حضرتك
وفى نقطة الشخصية مش ضعيفة ولا حاجة بس يعنى الانسان عبارة عن تجارب مر بيها وتعايش معها
ومش شرط كل الناس يبقوا زى بعضيهم يعنى من الجميل ان الواحد يطور شخصيته بس يحافظ على صفائها ونقائها
وده اللى ببحث عنه اليومين دول من السفر مش مجرد لوضع مادى بس
لا لتطوير شخصية وده ممكن يكون عندى اهم من اى شئ
ليه بئااااااااا :))
لان ممكن الواحد يبقى عنده صفات جميلة اوى جواه بس بسبب نشئته او بسبب شخصيته ممكن يقفل على نفسه دى وعلى الصفات الطيبة والجميلة اوى دى اللى فيه ومتطلعش عشان كده زى ما قلت من قبل النوايا الطيبة وحدها لا تكفى
لانى ممكن اكون كلى نوايا طيبة وملهاش مثيل بس فى فعلى مش باين النوايا دى لان الناس اهم ما يحتاجوه مننا الفعل مش النوايا
وده قصدى فى نقطة الشخصية ان الواد يطور شخصيته للاحسن يطور شخصيته ويبقى جمالها كما هى
يطورها عشان يجملها اكتر
يطورها عشان يبرزها اكتر مش عشان يغيرها
يعنى ساعات ممكن نحط من ناس حوالينا انهم شخصيات مثالية وقد لا يكونون كذلك
يعنى احنا ناخد من كل حاجة احسنها
ومن كل صفة حلوة مننا احسنها ونخلطة خلطة طيبة نقية ونتخلق بها
انا طلعت بره الموضوع باين
وفى نقطة الاختلاط اعتقد ان من اجمل ما تتخلق به البنت هو الحياء وده مفيش اجمل منه
بغض النظر بقى عن نظرات الناس واراء خقوق المراة بشوف ان حضرتك بتعمليلهم حساب اوى مش فاهم ليه :)
السنا على الحق :)))
وانا مع حضرتك ان البنت ليها حدودها فى التعامل وفى الاحتكاك ولكنه المهم ان حضرتك لو صرفتى نظر عن هذه المنحة ان حضرتك تسعى فى الواحدة واحدة دى
وربنا يعين حضرتك
بس فيه نقطة مهمة جدا ان حضرتك متقلليش من شأن نفسك وان ده مكان اكبر من حضرتك وان شخصيتك اقل من انها تتعامل وتنجز فى هذا المكان
ده لو حضرتك شايفة كده يبقى تدخلى المنحة عند بقى :)
ولو المنحة دى هتمنع حضرتك من الدعاء يبقى بلاش منها
انانية بقى :))
ربنا يكرمك يا فندم ويهدى حضرتك الى ما يحبه ويرضاه
fashkol
استاذ فشكول بحاله عندنا
يامرحبا يامرحبا بجد اسعدتني
زيارة حضرتك ربنا يبارك فى عمرك
ومعلش يمكن الكلام فعلا مش مفهوم
انا بس ماردتش افصل واطول على الناس
بس انا رديت على الاخ امام الجيل وقلت
ايه هي الحكاية بالظبط هي فرصة دراسة
وعمل مش حاجة تانية يعني :)
اولا الفرصة الحمد لله فى ظاهرها لا تغضب
الله ورسوله طبعا لكن تخوفي من بعد كدا
لان اللي اعرفه ان هاييجي عليا وقت
مش كل القرارت هاتكون بايدي وهاكون محكومة بقيود وقوانين المكان اللي مش عارفة هاتكون صح ولا خطا وماضمنش اني اقدر اعترض واحاول اسلك الطرق الصح
خصوصا فى موضوع الدراسة كمان اكتر
لان الاشرف مش هايكون زي اشراف الجامعة
الدكتور ياخد رايي فى كل شىء لا الوضع هايختلف شوية حاسة ان دماغي مش هاتكون ليه يعني :)
ثانيا هي الناس دي بتعرف تعمل مسقعة فعلا :) عندهم وقت طيب ربنا يكرمك يارب انا بجد اللي خايفة منه هو اني افقد روح البساطة اللي اتعودت عليها واللي بتخليني احس باللي اقل مني واحمد ربنا ولما ربنا يرزقني احس باحساس حلو كدا باني كنت محتاجة وربنا اداني
معلش انا خيالية شوية فى الحاجات دي
والحمد لله يافندم ماهياش فرصة علاقات انسانية والا كان فعلا هايبقى لا والف لا :) وبالثلث كمان هي زي ماذكرت لحضرتك فرصة دراسة وعمل بعد كدا
وصحيح هاتنقلني من حال لحال لكن مش
ضامنة هارتاح فى الحال الجديد زي
مانا راضية ومرتاحة فى حالي دا او لا
لكن اسال الله انه يلهمني الصواب
ويرضيني بيه ان شاء الله وعايزة حضرتك
ماتنساناش من دعواتك :)
وبشكر تشريف حضرتك لمدونتي المتواضعة
اوي حضرتك نورتنا ربنا يكرمك يارب
انا اول ماشوفت حضرتك قولت
اكيد اللي قالت لحضرتك سول :)
امام الجيل
اهلا يافندم كتبت رد اااد كدا وطار
يلا خير ان شاء الله
الاول بما ان حضرتك تعليم حكومي
وانا ابن عم حكومي هاقول لحضرتك
الفرق :) بالنسبة للمنحة يافندم هي
فرصة لانها منحه:) يعني الجهة البحثية
بتخصص راتب شهري للباحث
وكمان بتصرف على الرسالة من اولها
لحد مايتم تسجيلها كمان بيوفرو له
كل المعدات اللي يحتاجها وكمان
المعامل بتكون مفتوحه ليه وتحت
امره فى اي وقت يفجر فيها براحته :)
كمان الرسالة بتتنشر عن طريق
الاكاديمية وكمان بتسافر للخارج
لموافقة عليها بسهولة اكتر من الطريق
العادي ابو خطوة خطوة :) دا ببساطة يعني
بالنسبة للطريق العادي واللي انا اصلا كنت
ماشية فيه وهو طبعا بيكون كل حاجة
على حساب الباحث يعني مجهود مادي
اولا وربنا يخلي حضرة الناظرة وسي
السيد ومايحرمهمش مني ومن مشاكلي :)
كمان مجهود معنوي من اول اختيار
موضوع البحث لحد المشرفين بس
دي ميزة بالنسبة ليا عن المنحة لان
انا اللي بختار لكن المنحة الجهة البحثية
هي اللي بتحدد كل حاجة حتى موضوع
البحث وانا بس اتبع الاوامر يعني :)
كمان الطريقة العادي متعبة من حيث
استخدام المعامل بيحتاج مواويل كدا
وروتينيات مصر اللي تحبط اي حد
دي بس انا صبورة وان شاء الله
ناوية اخنقهم يعني الله المستعان
كمان احيانا بنحتاج ننزل فيلد علشان
نجمع عينات للبحث ودي كمان موال
اخر لان الرحلات الجيولوجية داخل
صحراء مصر مش سهله بردو
وطبعا ليها ضوابط كتير خصوصا
ليا كابنت يعني فالله المستعان
كفاية كدا على حضرتك فى النقطة دي
بالنسبة لتخوفي فاهو مش من الترقي
العلمي بالعكس انا اتمنى لان دا انا بعتبره
ترقي بديني واخلاقي كمان وحياتي بعد كدا
لكن بالنسبة للترقي المادي والاجتماعي
هو اللي مسببلي قلق فعلا لان انا اصلا
حتى مش فى نيتي حتى اشتغل
ودي ناس كتير بتستغربلها يعني ان بعد
كل دا حتى لما تجيلي فرصى العمل بتردد
لانها مش من ضمن الاساسيات اللي بكمل
بسببها ولذلك الماديات مش فى دماغي
والترقي الاجتماعي انا الحقيقة
الحمد لله مرتاحة كدا فى البساطة
اللي انا فيها دي يكفي ان الواحد لما
يشوف حد اقل يحمد ربنا ويحاول يساعد
وكمان لما ربنا يرزق الواحد بحاجة
كدا محتاجها فى وقت هو مش معاه او
بحاجة مش منتظرها بيكون ليها طعم تاني
يحسس الواحد برضا ربنا عليه لكن لو
معايا واقدر اجيب كل اللي انا عايزاه
هاحس الاحساس الحلو دا ازاي
فكر عجيب عجيب يعني :)
قد تكون خيالية زيادة لكن
هانعمل ايه خلقة ربنا هانعترض
بس ولذلك الحقيقة فعلا الموضوع
محير جدا ولكن الله المستعان
وانا مقررة داخليا فعلا ولكن مازال
في عليا بعض الضغوط حتى من الجامعة
لان هما كمان هايعود عليهم نفع اكيد
وكل انسان بيدور على مصلحته فعلا
وربنا يستر بعد الرفض من المعامله
اللي هاشوفها منهم لكن ان شاء الله
يكون خير ونقدر نتعامل معاهم
وان شاء الله لو ماستمرتش
فى موضوع المنحة بامر الله هاكمل
طريقي عادي فى ابو خطوة خطوة:)
اللي مفهوش فلوس بس هايدفع فيه
فلوس ان شاء الله :)
وربنا يقدرنا ان شاء الله ونقدر ننجز
على اد مانقدر بدون خسائر فى الارواح
عند حضرتك حق جميل ان الواحد
يطور من شخصيته بس مهم انه
يحافظ على صفائها ونقائها او
حتى صفائها كفاية اوي يعني :)
لييييييييه بئا اهو كدا وخلاص :)
وعلى فكرة الموضوع اللي حضرتك
ذكرته دا بجد محتاج من حضرتك
بوست بئا لانه مهم فعلا وناس كتير
بتتاثر فعلا ناس بتتغير وناس
بتتطور وكل حسب ظروفه وشخصيته
والوضع اللي بيتحط فيه وان شاء
الله يافندم فرصة السفر تساعد حضرتك
ان شاء الله وتستفيد منها اكيد
حتى التنقل من مكان لمكان
داخل بلد واحدة بيفيد كتير
مابال بئا من دولة لدولة :)
ربنا يعين حضرتك ان شاء
الله ويرزقك كل خير
وبالنسبة لبتوع حقوق المراة طبعا
نحن على حق اوي :) ومش حكاية
بعملهم حساب ولا حاجة بس انا
اصلي ليا موقف مع واحدة منهم
كانت خلاص من كتر كلامي كان
هايجيلها هارت اتاك :)) بس
ربنا ستر فانا براعي مشاعرهم بس
دي لحقتها كانت قدامي اللي ورا
الشاشة هاتصرف معاهم ازاي :)
والحقيقة مش بقلل من قدر نفسي ولا حاجة
بس يعني بردو رحم الله امروء عرف
قدر نفسه . هي امروء كدا صح ولا غلط
طبعا حضرتك هاتقول صح انا عارفة:)
انا فيا عيب اني مش عاملة حدود
لقدراتي ودا بيخليني يجي
عليا اوقات اتولى اكتر من مسؤلية
اوقات انجز فعلا لكن اوقات تانية
في حاجات مش بقدر انجزها ولذلك
دا عيب مش ميزة ومش عارفة الحقيقة
فى المكان دا هاقدر اصلا يكون ليا
حتى حرية الصد والاعتراض على الخطا
ولالا مش عارفة فعلا
جزاكم الله خيرا يافندم على التشجيع
وانا بقول اسيبها بالذوق علشان ماعرفش
هاستمر فى اللي كنت بعمله ولالا
فى حاجات كتير هافتقدها وكلها
بقت اساسيات فى حياتي وصعب عليا
اني استغنى عنها لاني انا اللي
محتاجاها مش هي اللي محتاجاني
الله المستعان زي ماربنا
يريد ان شاء الله واتمنى يكون خير
وهاندعي ان شاء الله بس حسب
الظروف يعني بفكر اخد شكلتت
تفكرني ال اسيب شكلتت ال
دي كفاية اني اتخلى عن اي حاجة :)
خير ان شاء الله ازمة وتعدي
ربنا يكرمك يافندم وحضرتك
ادعيلنا بس وان شاء الله لن
ننسى الدعاء ابدا بئا طبع خلاص
الاهم ربنا يتقبل ان شاء الله
رد بس مش اطول من اللي طار
ربنا يثبته يارب :))
Post a Comment